Kulturys īsacejumi nedeļai: Rēzeknis stuosti, dzīduošona dobā i soldonuos buļbis

Kulturys īsacejumi nedeļai: Rēzeknis stuosti, dzīduošona dobā i soldonuos buļbis

Rokstu sagataveja: portals lakuga.lv

Navar da gola saprast, bet izaver, ka itūnedeļ iz pavasara nav kuo cīši cerēt, deļtuo pyrmūdīnis īsacejumi nedeļai vaira taidi, kū var baudeit sātā. Itymā reizē tū, kū latgalisku redzēt, dzierdēt, paraudzeit, īsoka latgalīšu kulturys ziņu portala lakuga.lv socialūs teiklu redaktore i latgaliskūs projektu vadeituoja Edeite Husare.

“Nedelis kulturys programai izalaseju taidys lītys, kas varātu īprīcynuot vairuokys sajiutys – pruots prīcuosīs par jaunu Rēzeknis apleicīnis vītu izzynuošonu, auss par pavasara skaņom, bet vādars par koč kū gordanu,” soka Edeite.

“Latgales Laiks” rubrika “Rēzeknes apkaime un pilsēta”

1. Rēzeknis i tuos apleicīnis stuosti ūtardīnem
Maņ pošai ūtardīnis ir izzynūšuos dīnys i par tū pasaryupej avīze “Latgales Laiks”, kurymā itūgod kotru nedeļu ir īspieja puorskaiteit literata, literaturzynuotnīka i raidejumu vadeituoja Valentina Lukaševiča Rēzeknis i tuos apleicīnis stuostus. Itūnedeļ, 20. aprelī, byus jau 16. stuosts, kas viesteis par vītu sūpluok Latgolys kulturyviesturis muzeja, kur niu atsarūn bars “GURU”, bet sovulaik bejuse bazneica, kopejneicys “Rēzna” i “Little Italy”. Rubrikā “Rēzeknes apkaime un pilsēta” kūpā itūgod planavuoti 52 stuosti – vīns stuosts reizi nedeļā, kas pamatā vad pa dažaidom Rēzeknis i Rēzeknis nūvoda vītom. Taipat ir cereibys, ka vysi 64 Vaļuka sagataveitī stuosti varātu koč kod puortapt i gruomotā. Vysu rubrikys jau publicātī stuosti ir puorskaitomi “Latgales Laiks” sātyslopā ITE.

Grupa “Saucējas”, publicitatis biļde

2. Bolsi dobā
Tikū izīšonu pīdzeivuojs tradicionaluos dzīduošonys grupys “Saucējas” jaunais izdavums “Dabā”. Četru godu garā dorbā apkūpuotys i divejūs CD izdūtys 60 “Saucēju” dobā īdzīduotys dzīsmis, nu kurūs vaira nikai treša daļa ir guojušys nu dažaidu Latgolys vītu (nasliepšu eipašū prīcu par Rekovys, Škilbanu i Upītis dzīsmem), kai ari gruomateņā publicāts stuosts gon par albuma tapšonu, gon ari par uorā dzīduošonys tradiceju Latvejā. Pamateigs i cīši skaneigs materials. Maņ niu dzīduošona dobā vaira sasasaista ar pavasari, gaviliešonys laiku, bet “Saucēju” īrokstā jūs pošu styprī bolsi sasavej ar vardivem, putynim, sisinim i cytu dzeivū radeibu vīnā lelā kūpkorī. Kod pavasars tiks syltuoks, nūteikti īsoku paraudzeit tū dzīduošonu dobā pošim! Vaira par “Saucējas” jaunuokū dorbu ITE.

Kopejneicys “ZĪDS” deserts “Soldonuos buļbys”, publicitatis karteņa

3. Buļbis. Tuos, kas soldonuos
Vēļ nav suocīs buļbu stateišonys laiks, koč ari tuoli vaira nav, i kur vēļ ražys vuokšona, bet cikom buļbu padareišonys teik gadeitys, īsoku Rēzeknē paraudzeit kopejneicys “ZĪDS” desertu “Soldonuos buļbys”. Apreļa golā Latgolys viestnīceibys GORS kopejneica kai reizi svietej diveju godu jubileju. Kopejneicys nūsaukumā viļteigi sasavej latvyski-latgaliskuo vuordu spēle, bet itūnedeļ tod īsoku izavēlēt i saukt kopejneicu tymā ‘zīdā’, kas ir dūmuots puče, ni audums. Tai kai soldonumi maņ dyžan īt pi sirds, ari itys latgaliski nūsauktais deserts kopejneicys pīduovuojumā pa reizei vādara īprīcynoj. Cikom sasatikšona kopejneicuos vēļ nav atļauta, cytaižuokūs buļbu desertu var pasyuteit leidza jimšonai i apiesšonai sātā.

Print Friendly, PDF & Email

Kalenders

May
18
Sai
10:00 Muzeju nakts @ Maltys viesturis muzejs
Muzeju nakts @ Maltys viesturis muzejs
May 18 @ 10:00 – 21:00
Muzeju nakts “Izzinot latgaliskās rotas, tērpus un stāstus”10.00 Pietnīcysks (izzynojūšs) ceļuojums pa Maltys apleicīnis piļskolnim ar viesturis aktivistu i konstruktoru bīdreibu “Kroma kolna bruoliste”.16.00-18.00 Darbneica “Seno latgaļu rotu rakstu noslēpumi” (7.-13. g. s.), kurū vadeis[...]
15:00 Muzeju nakts @ Naujinis Nūvodpietnīceibys muzejs
Muzeju nakts @ Naujinis Nūvodpietnīceibys muzejs
May 18 @ 15:00 – 23:45
15.00 – 24.00 Apmaklātuojim daīmamys jaunuos izstuodis: viesturis izstuode “Juzefovas stacija: ceļojums laikā”, izstuode nu muzeja kruojuma “Valentīnas Zeiles dažādās sejas: dzejniece”, izstuode “Livonijas ordeņa Dinaburgas pils senlietas muzeja krājumā”, breivdobys izstuode muzeja teritorejā “Novadnieku[...]
15:30 Muzeju nakts @ Bolvi
Muzeju nakts @ Bolvi
May 18 @ 15:30 – 23:45
Muzeju nakts @ Bolvi