Latgaliskajam raidejumam “Kolnasāta” jauna rubrika par latgalīšu dzīsmem

Latgaliskajam raidejumam “Kolnasāta” jauna rubrika par latgalīšu dzīsmem

Rokstu sagataveja: portals lakuga.lv

Jau vaira nikai ostoņus godus Latvejis Radejis pyrmajā programā sastdīnem skaņ latgaliskais raidejums “Kolnasāta”. Apreļa beiguos raidejuma papyldynuojuse ari jauna rubrika par latgalīšu dzīšmu stuostim.

Itūšaļt kasnedelis sarunys i intervejis latgaliskajā radejis raidejumā, kū taisa Latvejis Radejis Latgolys multimedeju studeju, papyldynoj pīcys dažaidys rubrikys: “Vuordineica”, “Gruomotplaukts” “Viesturis rubrika”, “Bosom kuojom” i “Zemis suoļs”. Niu tom pīsavīnuojuse ari rubrika “Dzīšmu stuosti”, kas viesteis par latgalīšu dzīsmem, tūs izaceļšonu i skaniešonu cauri laikim.

Jaunū rubriku leidza ar raidejuma vadeituoju Ēriku Zepu veidoj dzīšmu gruomotys “Muna dzīšmu gruomota” sastateituoja Edeite Husare. Pyrmajā rubrikys reizē raidejuma klauseituoji kai veļtejumu Latgolys kongresa dīnai varēja izzynuot Valža i Māra Muktupāvelu dzīsmis “Pīmiņ, bruoļ” stuostu. Paradzāts, ka dzīšmu stuostus raidejumā varēs dzierdēt aptyvai reizi mienesī – majā tys byus dzīsmis “Lobs bej’ puika myusu Jezups” stuosts.

Raidejuma producenta Guna Igavena portalam lakuga.lv pastuosteja, ka ideja ar “Dzīšmu stuostim” īcarāta i dūmuota jau vysmoz divejus godus – latgalīšu dzīsmis izzynuot gribiejs raidejuma vadeituojs Ēriks Zeps, kurs sovulaik izvaicuojs ari klauseituojus par dzīsmem, kurys raidejuma klauseituojim kai pyrmuos īīt pruotā, kod vaicoj piec latgalīšu dzīšmu. Laiks guojs, tod izdūts latgalīšu dzīšmu notu kruojums “Muna dzīšmu gruomota”, kura sastateituoja Edeite Husare ari aizaruovuse ar dzīšmu stuostu pieteišonu, i saprasts, ka juosalīk kūpā interese i pruoti, lai par latgalīšu dzīsmem stuosteitu ari “Kolnasātys” klauseituojim.

Atguodynuosim, ka raidejumā “Kolnasāta” sūpluok jaunajim “Dzīšmu stuostim”, ir īspieja dzierdēt ari taidys rubrikys kai:

“Vuordineica”, kurū itūšaļt veidoj viesturnīks Arņs Slobožanins i literate Ilze Sperga, “Kolnasātā” ir bejuse jau nu laika gola, pasamainejuši viņ tuos veiduotuoji – leidz 2019. godam tū taiseja Arņs Slobožanins i literats Valentins Lukaševičs, nu kura stafeti puorjēme Ilze. Vīna nu vysim radzamuokūs latgalīšu kulturys izpausmu i taišni latgalīšu volūda vysā sovā dažaidajā boguoteibā. Itymā rubrikā autori stuosta gon par seņejim latgalīšu vuordim, gon jaunvuordim, atkluoj tūs nūzeimi, lītuojumu Latgolā i uorpus tuos rūbežu, vuordu izaceļšonu.

“Gruomotplaukts” ir raidejuma rubrika, kurys veiduošonā sovulaik īsasaistejuši vairuoki labi pazeistami literati. Gruomotu stuostus raidejumā atkluojuši gon Raibīs aba Oskars Orlovs, gon Ligija Purinaša, niu tū dora Ilze Sperga. Rubrikys mierkis nav cik daudzi literaturkritika, bet vaira klauseituoju īpazeistynuošona ar kaidu nu jaunuokūs izdavumu latgalīšu volūdā ci par Latgolu, taipat “Gruomotplauktā” pa reizei teik atguoduoti ari īvarojami latgalīšu literati i literarī dorbi.

 “Viesturis rubriku”, kas “Kolnasātā” skaņ nu 2019. goda, veidoj diveji viesturnīki – Kaspars Strods i Laura Melne. Rubrikā autori īsaver vysaidu viesturiski svareigu i inetersantu nūtykumu puslopuos. Rubriku pyrmūs divejus godus pamatā taiseja Kaspars Strods, bet pārņ pa reizei ar kaidu sovu interesantū stuostu viesturis izzynuošonu “Kolnasātā” papyldynoj Laura Melne. Rubrikā teik atkluotys dažaidys da ituo mozuok zynomys Latgolys viesturis puslopys – aizvadeitajā sastdīnē Laura īpazeistynuoja ar Latgolys Tautys piļs Rēzeknē viesturi.

Rubrika “Bosom kuojom”, kas raidejumā skaņ nu pārnejuo goda, ir poša “Kolnasātys” vadeituoja Ērika Zepa ideja. Rubrikys ideja beja, ka byutu interesanti kūpā ar klauseituojim izzynuot, ka vaira ci mozuok zynomi Latgolys ļauds atkluotu sovys dobys turisma stygys, nūvastu iz kaidu vītu Latgolā, kas jam redzīs apsavieršonys vārta. Ari pošam Ērikam cīši pateik ceļuot, staiguot apleik bosom kuojom, jū interesej Latgola i tuos geografeja, dobys turismys – vysi labvieleigī prīšknūsacejumi, kab rubrika īsadūtu izzynūša i interesanta.  

Vīna nu jaunuokuos rubriku raidejumā ir “Zemis suoļs”, kas skaņ nu ituo goda janvara i dzierdama kotra mieneša ūtrajā sastdīnē. Tyvojūtīs 2020. goda golam “Kolnasātys” radūšuo komanda, dūmojūt par cyta gods raidejumim i vārojūt žurnalistis Marutys Latkovskys, sovulaik žurnala “Katōļu Dzeive” aktivitatis dzeivē i socialajūs teiklūs, uzrunuoja jū i aicynuoja pasadaleit ar raidejuma klauseituojim sovūs nūvārojumūs i dzeivis gudreibā. Marutys rubrykys aba mienešroksta nūsaukums “Zemis suoļs” ir juos pošys ideja. Autore soka: “Ontonam Rupaiņam ir romans “Zemes sōļs”, es jū sovā laikā asu skaitejuse i maņ jis cīši patyka. Tys nūzeimej, ka ite mes nalidojam pa muokulim, bet runojam par taidom pīzemātom lītom. Par pīmāru, es niu asu salasejuse daudzi vysaidu augu nūsaukumu i taišni latgaliskūs. Tei ir taida boguoteibu skreine! Cytaiž mes, aizmierstūt tūs latgaliskūs nūsaukumus, izgaisynojam ari sovu seņču gudreibu, zynuošonys par zuoleitem.”

“Kolnasāta” producente Guna Igavena, atsaverūt iz rubriku dažaideibu, soka: “Kotrys rubrikys autors tymā ir īness sovys vāsmys, kas ni vysod sakreit ar producenta ci radūšuos komandys suokūtneji īcerātū. Jī kotrs pats par sevi ir personeiba ar pīredzi, redziejumu i sovu radūšū liduojumu, kas patīsi aizraun. Vysod ir lela prīca klauseitīs stuostu, kas interesej i aizraun pošu autoru, stuostu kurā īlykts dziļums i dvēsele. Tū es radzu vysuos rubrikuos.”

Latgaliskais raidejums “Kolnasāta” Latvejis Radejis pyrmajā programā skaņ sastdīnem 18.15 ar atkuortuojumu svātdīnem pīcūs nu reita. Vysi raidejumu īroksti nūsaklausomi LR1 sātyslopā ITE.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]