Roksta autore: Veronika Dundure, LVLKŠA vadeituoja

27. aprelī, Latgolys kongresa pīminiešonys dīnā, nūtyka skotuvis runys konkursa “Vuolyudzāni” i 20. atkluotuos vaļsts olimpiadis latgalīšu rokstu volūdā nūslāguma attuolynuotais tīšsaistis pasuokums, kurā tyka gūdynuoti uzvarātuoji. “Vuolyudzānūs” šūgod pīsadaleja 21 deklamātuojs i latgalīšu prozys tekstu skaiteituojs.

Dailrunuotuojus vērtēja dzejneica Anna Rancāne i režisore Māra Zaļaiskalns. Jūs viestejums skaņ: ““Vuolyudzāni” – tei godskuortejuo pavasara prīca! Jau ūtrū godu bārnim i jaunīšim juopuorvar saskarsmis tryukuma barjera, tys, ka videoīrokstā navar sajust klauseituoja tyvumu, bet jī ar tū veiksmeigi teik golā. Itys gods īsazeimej ar loba, vacumam pīmāruota repertuara izvēli. Prūtams, vīgļuok ir skateituoju pajimt ar jūku paņtenim, bet myusu “vuolyudzāni” teik golā ari ar nūpītnu, dziļu literaturu. Tū var redzēt jūs acīs, jo acs namaloj!

Konkurss līcynoj par tū, ka saimēs tūmār ir dzeiva latgalīšu volūda, ka bārni jū muok i lītoj. Paļdis vysim dalinīkim, gūdolguotūs vītu nav daudzi, bet grybātūs bez laureatu paslavēt vēļ tūs, kam datryuka nadaudz – i Grietu, i Kresceņteju Tekli, i Romualdu, Ralfu i Rūtu, da i vysus, vysus! Paļdis školuotuojim, paļdis vacuokim, eipaši jau tai breineigajai babeņai, kura sovu unuku Kristoferu vuica tāvutāvu volūdeņā! Lai vysim Dīva paleigs i prīca!”

Šūgod daudzi školāni runuot beja izalasejuši fragmentus nu jaunuokuos latgalīšu literaturys, tū atzeimēja i Izgleiteibys ministre Ilga Šuplinska.

Taipat nu poša reita školys varēja pīsadaleit nūvodvuiceibys stuņdēs. Jaunīši, kas vadeja stuņdis, – Ēriks Zeps, Dāvis Suharevskis, Evika Muizniece – jau ir īrakstejuši sovu vuordu Latgolys kulturviesturē. Nūvodvuiceibys stuņdis var nūsavērt ite.

Aicynoju sovu latgaliskū identitati aplīcynuot ar konkretim dorbim, na vuordim!

Dailrunuotuoju konkursa “Vuolyudzāni” rezultati:

1. vīta

1.–4.kl. – Kristiāns Dzalbs, Kruoslovys Vaļsts gimnazeja, školuotuoja Valentīna Geka;

5.–9.kl. – Agate Opincāne, Bieržgaļa pamatškola, školuotuoja Gunta Kopeika;

10.–12.kl. – Kaspars Stolipins, Malnovys koledža, školuotuoja Inta Minina;

Simpateju bolva – Kristofers Apeins (3 godi), Reigys PII “Austreņa”, školuotuojis Mārīte Bikovska, Inese Apeine.

2. vīta

1.–4.kl. – Paula Blusanoviča, Ludzys Muzykys pamatškola, školuotuoja Dace Tihovska;

5.–9.kl. – Emīls Grišāns, Kruoslovys Vaļsts gimnazeja, školuotuoja Ingrīda Grišāne, Ilga Stikute;

10.–12.kl. – Maksims Pavlovs, Ludzys piļsātys gimnazeja, školuotuoja Vanda Žulina.

3. vīta

1.–4.kl. – Olga Meleka Galilejeva, Mežvydu pyrmškola, školuotuoja Inga Skrebinska;

5.–9.kl. – Andris Anckins, Ruguoju nūvoda vydsškola, školuotuoja Evija Konivale;

Kaspars Vistopols, Tukuma E. Birznieka-Upīša pamatškola, školuotuoja Tamāra Balode;

10.–12.kl. –Viktorija Lukšāne, Nautrānu vydsškola, školuotuoja Ruta Krišāne.

Kaspars Stolipins ar stuostu nu Annelis Slišānis gruomotys “tuoraga stuosti”.