Turisma sezonā iz Latgolu aicynoj raidejums “Breivdīnuos iz Latgolu”

Turisma sezonā iz Latgolu aicynoj raidejums “Breivdīnuos iz Latgolu”

Sagataveja: portals lakuga.lv

Maja suokumā pi klauseituoju, kai jau īrosts iz turisma sezonu, Latvejis Radejis 2. kanalā atsagrīze raidejums “Breivdīnuos iz Latgolu”, viestejūt par kulturys nūtikšonom i turisma aktualitatem Latgolā.

Napylnu pīcu minutu garajā raidejumā kasnedeļu tuo veiduotuoja Laura Sondore pīduovoj treis nūtikšonys voi īsacejumus, kū nedelis golā var pīdzeivuot vītejī ļauds voi Latgolys gosti.

Itymā nedeļā raidejums aicynuos iz Pūra dīnu Ludzys i Cyblys nūvodūs, par kū vaira pastuosteis Ludzys nūvoda Turisma informacejis centra vadeituoja Līga Kondrāte, tiks atguodynuots par īspieju apsavērt pārnejuo goda geovītu – Rundānu Valna dūbi – tīpat Ludzys nūvodā, kai ari planavuots aizsuokt stuostu par Latgolys pagaisušajom muižom, i itūreiz par Vydsmuižu aba Gaļānu muižu vaira izstuosteis Gaļānu Roberta Mūka muzeja vadeituoja Marta Binduka.

“Breivdīnuos iz Latgolu” veiduotuoja Laura Sondore, dūmojūt par jaunū raidejuma sezonu soka: “Latgola nav viņ muola pūdi i skaistys vītys pi azara, Latgola ir tymūs cylvākūs, kas dora, kas veidoj nūtykumus ap sevi, sovā nūvodā ari itymūs nasaprūtamajūs krīzis apstuokļūs. Cīši gribīs, kab tū zynuotu naviņ konkretajā pogostā i nūvodā dzeivojūšī, bet tū zynuotu ari tuoli aiz Latgolys rūbežu i, īvārojūt vysus epidemiologiskūs nūsacejumus, brauktu iz iteini redzēt i saglobuot sev tū Latgolu, kaida tei ir itūšaļt.”

Raidejums “Breivdīnuos iz Latgolu” ir informativs kasnedelis Latgolys kulturys nūtikšonu i turisma aktualitašu apskots i pīduovuojums breivdīnom Latgolā, raidejumu veidoj Latvejis Radejis Latgolys multimedeju studeja. Tys Latvejis Radejis 2 eterā skaņ jau nu 2015. goda vosorys. Raidejums izskaņ kotru pīktdīni 17.30 ar atkuortuojumu sastdiņ pusdeveņūs nu reita. Radejis eterā raidejums dzierdams vysu turisma sezonu nu maja suokuma da septembra gola.

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Oct
1
Sai
vysu dīnu Izstuode “Jura Gaigala akvareļi” @ Latgolys Kulturviesturis muzejs
Izstuode “Jura Gaigala akvareļi” @ Latgolys Kulturviesturis muzejs
Oct 1 vysu dīnu
Nu 21. septembra da 1. oktobra Latgolys Kulturviesturis muzejā apsaverama izstuode “Jura Gaigala akvareļi”. Ceļojūšuo izstuode veļteita gruomotys “Jura Gaigala varavīksne” izīšonys svātkim. Tiks izstuodeitys muokslinīka akvareļgleznys nu meitys Dacis Gaigalys kolekcejis.