Satversmis tīsa: Varakļuonu davīnuošona Rēzeknis nūvodam naatbiļst Satversmei

Satversmis tīsa: Varakļuonu davīnuošona Rēzeknis nūvodam naatbiļst Satversmei

Sagataveja: portals lakuga.lv

28. majā Satversmis tīsa pījāmuse lāmumu sprīdumā, kas saisteits ar jaunū administrativi teritorialū reformu, i lamts, ka Varakļuonu nūvoda davīnuošona Rēzeknis nūvodam naatbiļst Satversmei, viestej Satversmis tīsys izplateituo informaceja.

Jaunuos administrativi teritorialuos reformys, kurai Latvejā juosastuoj spākā leidza ar jaunnedeļ gaidomajom pošvaļdeibu vieliešonom, veidošonys laikā sabīdreibys viļņuošonūs, škelšonūs iaktivtu īsaisti izsauce lāmumi Varakļuonu nūvodu davīnuot Rēzeknis nūvodam. Varakļuonu nūvoda dūme īsnīdze syudzeibu Satversmis tīsā, i niu paziņuots sprīdums lītā Nr. 2020-43-0106 “Par Administrativūs teritoreju i apdzeivuotūs vītu lykuma dalykuma “Administrativuos teritorejis, tūs administrativī centri i teritorialuo īdalejuma vīneibys 31.15., 31.29., 31.30., 32.1., 32.4. i 36.2. apakšpunktu atbiļsteibu Latvejis Republikys Satversmis 1. i 101. pantam, Eiropys vītejūs pošvaļdeibu hartys 4. panta trešajai i sastajai daļai, kai ari 5. pantam”, kurā lamts, ka Varakļuonu nūvoda davīnuošona Rēzeknis nūvodam naatbiļst Satversmei.

Varakļuonu nūvoda dūme turēja, ka Saeima, pījemūt Varakļuonu nūvoda īkļaušonu Rēzeknis nūvodā, reikuojusēs preteimā reformys mierkim i tuos pamatā asūšajim kriterejim, kai ari puorkuopuse lobys lykumdūšonys i pošvaļdeibys pryncypu. Satversmis tīsa sacynuojuse, ka lykumdeviejs, Latvejis Republikys Saeima, nav īvāruojuse reformys mierki i kriterejus, jo Rēzeknis nūvodā nav vaļsts voi nacionalys nūzeimis atteisteibys centra, bet Rēzeknis nūvoda i Rēzeknis piļsātys sadarbeiba paradzāta viņ treis vierzīņūs, kas dūd piļsātai prīškrūceibys i nav izdeveigi nūvodam. Taipat ari lāmums par Varakļuonu nūvoda īkļaušonu jaunveidojamā Rēzeknis nūvodā pījimts viņ lykumprojekta trešajā skaitejumā Saeimys sēdē, jemūt par pamatu deputatu puorlīceibu, ka itei teritoreja kultuviesturiski pīdar Latgolai. Tīsa izsver, ka administrativi teritorialajai reformai nav juobyun baļsteitai viņ sociali ekonomiskajūs apsvārumūs, tei var tikt taiseita, īvārojūt ari pošvaļdeibu geografiskūs i kulturviesturiskūs apsvārumus, nu svareigi, kab tī tyktu defināti kai skaidri kritereji, kas ir vīnleidzeigi attīcynojami iz kotru pošvaļdeibu. Ite saīt, ka lykumdeviejs nūteics, ka administrativi teritorialuo reforma nav pakuortojama praseibai saglobuot kulturviesturiskū vidi i pīdareibu latvīšu viesturiskajom zemem, jo tū regulēs atseviškys lykums. Tai kai leidzeigūs gadīņūs, par pīmāru, Alsungys i Sēlejis nūvodu sataiseišonā, kultuviesturiskī apsvārumi natyka jimti vārā, deļtuo ari itei nav konsekventa Saeimys pīeja Varakļuonu nūvoda īkļaušonai Rēzeknis nūvodā.

Pi vysa Satversmis tīsa nūruodejuse, ka reformys eistynuošonā kai svareigs faktors var byut pošvaļdeibys īdzeivuotuoju pīdareibys sajiuta i kūpeiguo identitate, kū kai eipašus apstuokļus var jimt vārā pošvaļdeibys davīnuošonai kaidam nūvodam. Nu, tai kai īprīšk Varakļuonu nūvoda īdzeivuotuoju apvaicuošonu rezultati līcynuoja, ka nūvoda īdzeivuotuoji atbolsta teritorejis davīnuošonu jaunveidojamajam Modūnis nūvodam, tod davīnuošonu Rēzeknis nūvodam navar pamatuot ar pīdareibys izjiutys i identitatis faktoru.

Satversmis tīsa nūruoda, ka, kod spākā stuostīs Satversmis sprīdums, vaira nabyus spākā tīseibu normys par Murmastīnis pogosta, Varakļuonu piļsātys i Varakļuonu nūvoda davīnuošonu jaunveidojamajam Rēzeknis nūvodam. Jaunu administrativūs teritoreju nūsaceišona byus Saeimys lemšona.

Kai aplīcynoj Centraluo vieliešonu komiseja, saīt, ka Rēzeknis i Modūnis nūvodūs daīs atceļt 5. junī planavuotuos vieliešonys, byus juoreikoj jaunys, uorkuortys vieliešonys, i ari parteju deputatu kandidatu saroksti byus juoīsnādz nu jauna.

Latvejis Republikys Vidis aizsardzeibys i regionaluos atteisteibys ministrejis plans ir Varakļuonu nūvodu davīnuot Modūnis nūvodam, bet jaunys vieliešonys Rēzeknis i Modūnis nūvodūs taiseit septembrī.

Vysu informaceju par Satversmis tīsys lāmumu var puorskaiteit ITE.

Kalenders

Jun
13
Pīk
18:00 Dzejis i muzykys vokors “Vysi vu... @ Latgolys viestnīceiba "Gors"
Dzejis i muzykys vokors “Vysi vu... @ Latgolys viestnīceiba "Gors"
Jun 13 @ 18:00 – 19:30
Dzejis i muzykys vokors, kurā fragmentus nu tūpūšuos gruomotys “Vysu vuordi” skaiteis latgalīšu literaruo andergraunda puorstuovs, multimuokslinīks Raibīs, bet dzīsmis nu albuma “Negaidīti varoņi” atskaņuos myusu dīnu tautys muzykys grupa “Nielslens Lielsliens”. Grupys koncerti izaceļ[...]
18:30 Izruode “Gaisma, es tevi dzirdu” @ Latvejis Leļu teatris
Izruode “Gaisma, es tevi dzirdu” @ Latvejis Leļu teatris
Jun 13 @ 18:30 – 20:00
Dokumentaluo taustive. Treis jaunys mārgys īvad myus sovā naīraudzeitā pasaulī – kai juos redz lītys, nūtikšonys i attīceibys tympus ocu, kū juos pīredz, sasateikūt ar cylvākim, kuri naredz, nagrib redzēt voi pat naīredz. Juos stuosta,[...]
Jun
15
Svā
all-day Izstuode “Latgales grāmatniecība... @ Rēzeknis Centraluo biblioteka
Izstuode “Latgales grāmatniecība... @ Rēzeknis Centraluo biblioteka
Jun 15 all-day
Rēzeknis Centraluos bibliotekys laseitovā da 15. juņa apsaverama izstuode “Latgales grāmatniecības plaukums un ceļš trimdā”, kurā var īpasazeit ar nūvodpietnīceibys materialim par Vladislava Luoča izdevnīceibu, kai ari tamā topušajim dorbim.