Muzeji vaļā! Kur īt i kū apsavērt?

Muzeji vaļā! Kur īt i kū apsavērt?

Rokstu sagataveja: portals lakuga.lv

Piec vairuoku mienešu stuoviešonys tukšā junī pamozam suoc atsadzeivuot i uzjimt apmaklātuojus vairuoki Latgolys muzeji, pīduovojūt apsavērt vysaidys izstuodis i dasaceit ekskursejis.

Jau šudiņ, 3. junī, durovys apmaklātuojim vaļā taisa Lūznovys muiža. Da 16. juņa muižys Kulturys škiunī var apsavērt Vēsmys i Aivara Ušpeļu dorbu izstuodi “Malny Wylky”, vaira par izstuodi var skaiteit ITE. Sovutīs pošā Lūznovys muižā var apsavērt izstuodi “Veveri viver vū!”, kurā apkūpuoti arhivara i kolekcionara Oto Bonga Ūtruo pasauļa kara biegļu nūmetnēs pīraksteitī bārnu skaitompaņteni. Vaira par Lūznovys muižu i tuos nūtikšonom ITE.

Karteņa: izstuode “Malny Wylky”, foto Dagnija Bernāne

Nu 4. juņa varēs apmeklēt Latgolys Kulturviesturis muzeja Rēzeknē izstuožu i ekspoziceju zālis. Da 13. juņa muzejā var apsavērt politikis i sabīdryskuos darbineicys Valerejis Seilis 130 godu jubilejai veļteitū tematiskū izstuodi. Taipoš da 13. juņa muzejā var apsavērt izstuodi “Māla gars. Andrejam Paulānam – 125”, kuramā var redzēt izciluo pūdnīka keramikys traukus, svečturus i seikplastiku nu muzeja slāgtuos kruotivis. Vaira informacejis par Latgolys Kulturviesturis muzeju, juo dorba laiku ITE.

Latgolys Kulturviesturis muzejs. Publicitatis karteņa

Suocūt ar 5. juni, Šmakovkys muzejs Daugovpilī atsuoc dorbu kluotīnē. Dasasaceit muzeja apmekliejumam var jau nu 3. juņa, muzejs interesentus pījam piec īprīškeja pīroksta. Šmakovkys muzejā ar jaunuokū tehnologeju paleidzeibu var interaktivi izzynuot šmakovkys tapšonys procesu, redzēt autentiskys ražuošonys īkuortys, kai ari īgiut vysaidus suvenirus i dasaceit ekskursejis. Vaira informacejis par Šmakovkys muzeju i ekskurseju dasaceišonys īspiejom ITE.

Taipoš Daugovpilī 5. junī individualu apmaklātuoju uzjimšonu atsuoc Marka Rotko muokslys centrs. Šaļtī, kod centru beja navarams apmeklēt, pi centra tyka izveiduota “Izlādes-uzlādes siena”, kurā sevkurs variejs īt i pret sīnu svīst vysaidus navajadzeigus keramikys prīškmatus. Leidz ituo gods oktobram vēļ var paspēt i izluodēt sovys emocejis interaktivuos muokslys objektā.

Marka Rotko centrā varēs apsavērt vairuokys izstuodis – “Atrasts kolekcijā”, kas ir izstuode ar izcileibom nu Marka Rotko muokslys centra kruojuma, Latgolys regiona muokslinīku konkursa izstuode “Legalizētās fantāzijas”, Ievys Jurjānis izstuode “Gals&Sākums. Turpinājums”, Mārītis Klušys izstuode “Brīvās domas kontrolēts lidojums”, Japanys grafikys izstuode “Japānas stāsti” i lītuvītis Eglis Einikītis-Narkevičienis izstuode “One Size”. Vaira par Daugovpiļs Marka Rotko muokslys centru ITE.

Ar 9. juni interesentim daīmams palīk ari Bolvu Nūvoda muzejs. Vaira par Bolvu Nūvoda muzeju var skaiteit ITE.

Print Friendly, PDF & Email

Kalenders

Mar
7
Cat
16:00 Valentina Lukaševiča gruomotys “... @ Latgolys Centraluo biblioteka
Valentina Lukaševiča gruomotys “... @ Latgolys Centraluo biblioteka
Mar 7 @ 16:00 – 17:30
7. martā 16.00 stuņdēs Daugovpilī, Latgolys Centralajā bibliotekā, 2. stuovā (Reigys īlā 22a) nūtiks Valentina Lukaševiča vītu stuostu kruojuma “Dīnvydlatgolys stuosti” prezentaceja i sasatikšona ar autoru. Gruomotys 39 stuostūs autors, ceļojūt na tik telpā, bet[...]