Lūznovys muižā apmaklātuojus gaida izstuode “Malny Wylky”

Lūznovys muižā apmaklātuojus gaida izstuode “Malny Wylky”

Sagataveja: portals lakuga.lv

Lūznovys muižā īkuortuota i šaļti, kod varēs sasatikt ar apmaklātuojim, gaida Vēsmys i Aivara Ušpeļu gleznīceibys i keramikys dorbu izstuode “Malny Wylky”, viestej informaceja Lūznovys muižys sātyslopā.

Ar izstuodi teik turpynuota pārņ īsuoktuo “Pūdu pavasara” nūrise Lūznovā. 2020. goda pavasarī pandemeja “nūguoze pūdys”, maineja pasauļa procesus i ari da ituo īrostū tradiceju Latgolā – sasatikšonu Latgolys pūdnīku dīnuos, kuruos ari itūgod puorcaltys iz rudini. Vys tik, kab ari pavasaram byutu ituos senejuos tradicejis pīskuorīņs, muižys komandai roduos ideja par “Pūdu pavasari”. Pārņ tei beja ostoņu pūdnīku darbneicu kūpeiga izstuode, kai ari iz Lūznovys muižys kompleksā asūšuos vacuos školys sīnys pi 2018. godā atkluotuo muižys keramikys cepļa, tyka izzeimuots grafiti “Pūdi”, kurū izzeimuoja hip-hop apvīneibys “Ausmeņa Records” dalinīks DJ Valns.

Pūdnīku dīnu puorceļšona iz rudini ari niu tukšu vītu napamat – Latgolys tradicionalū muokslu muižys “Kulturys škiunī” itūgod pīduovoj apsavērt Vēsma i Aivars Ušpeli. Vēsmys gleznu i Aivara keramikys dorbu izstuode, kam dūts taišni taids pats nūsaukums kai obeju muokslinīku darbneicai – “Malny Wylky”, ir īkuortuota i gaida tū breidi, kod īrūbežuojumu izmainis ļaus apmeklēt ari izstuodis i muzejus. Planavuots, ka izstuode byus apsaverama da 27. maja, bet, ka īrūbežuojumi byus garuok, tod i tuos apsavieršona tiks puorcalta iz vāluoku.

Muokslineica i keramika Vēsma i juos veirs Aivars Ušpeli, saiminīkoj pūdnīku darbneicā “Malny Wlky” ir vīni nu zynomuokūs myusu dīnu Latgolys pūdnīku. Jī Lūznovys muižai ir kai sovejī – dzeivoj gondreiž sābrūs, pi Rēzeknis nūvoda Maltys.

Vēsmas Ušpele absolviejuse Latvejis Muokslys akademejis gleznīceibys nūdaļu, nu 1995. goda regulari pīsadola grupu izstuodēs i plenerūs Latvejā i uorvaļstīs, sareikuojuse vaira nikai 40 personalizstuožu. Stuodoj gleznīceibā, keramikā, restauracejis dorbūs (2010–2012, Aglyunys bazilika), ir Latgalīšu kulturys goda bolvys “Boņuks” muola statuešu autore. Nu 2006. goda kūpā ar muokslineicom Agru Ritiņu, Ilzi Griezāni i Viju Stupāni, kurei paleidzēja ari pi izstuodis muižā īkuortuošonys, dorbojās Latgolys muokslineiču apvīneibā “V.I.V.A.”, kas Latvejis muokslys vidis kontekstā ir unikala kai ilguokais muokslinīku savīneibys pīmārs. 2016. godā Vēsma tyka nomināta golvonajai bolvai izstuodē “Jāzepa Pīgožņa balva Latvijas ainavu glezniecībā”.

Aivars Ušpeļs turpynoj sovys – īvārojamuos pūdnīku Ušpeļu dzimtys – tradicejis Latgolys keramikā. Nu 1993. goda ir tautys dailomota meistars. Sovā darbeibā cīši lelu viereibu pīvierš tradicionalūs muola apstruodis pajiemīņu pieteišonai i saglobuošonai, izmontoj cylvākam i videj nakaiteigu tehnologeju i rauga ceļt amatnīceibys prestižu. Aktivi popularizej svāpātū aba tai sauktū dyumuotū, ari malnū keramiku.  

Lūznovys muiža aicynoj apmaklātuojus sekuot leidza informacejai muižys sātyslopā ci socialū teiklu profilūs, kab izzynuotu par izstuodis apsavieršonys īspieju, koleidz tū ļaus ituos šaļts īrūbežuojumi ‘Covid-19’ deļ.

Kalenders

Jun
19
Cat
06:45 Pasuokums “FIZISKAIS RŪBEŽS: kul...
Pasuokums “FIZISKAIS RŪBEŽS: kul...
Jun 19 @ 06:45 – 18:45
Pasuokums "FIZISKAIS RŪBEŽS: kulturys nūzeime i pīejameiba Latvejis austrumu regionā"
Latgolys muokslys i kulturys platforma MUD LAB aicynoj iz storpdisciplinaru pasuokumu FIZISKAIS RŪBEŽS, kas nūtiks Leivuonā ituo gods 19. junī, daudzfunkcionaluo jaunīšu iniciativu centra “Kvartāls” futbola laukumā i Leivuon dzeļžaceļa stacejā. Pasuokums, kurā pīsadaleis kai[...]
18:00 Seminars “Viesturis olūtu komple... @ Kruoslovys nūvoda muzejs
Seminars “Viesturis olūtu komple... @ Kruoslovys nūvoda muzejs
Jun 19 @ 18:00
Seminars "Viesturis olūtu kompleksuo izpiete: mutvuordu viesturis olūti i fotografejis" @ Kruoslovys nūvoda muzejs
19. junī 18.00 stuņdēs Kruoslovys nūvoda muzejā nūtiks seminars “Viesturis olūtu kompleksuo izpiete: mutvuordu viesturis olūti i fotografejis”.
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Jun 19 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]