Portals lakuga.lv pīduovoj bezmoksys latgalīšu rokstu volūdys konsultacejis

Portals lakuga.lv pīduovoj bezmoksys latgalīšu rokstu volūdys konsultacejis

Sagataveja: portals lakuga.lv

Latgalīšu kulturys ziņu portals lakuga.lv regulari sajam vaicuojumus i pi vajadzeibys īt tolkā latgalīšu rokstu volūdys lobuošonys dorbūs, deļtuo aicynojam gon uzjiemiejus, gon sabīdryskuos organizacejis, pošvaļdeibu īstuodis, kai ari privatpersonys drūsai izmontuot īspieju pasakonsultēt par latgalīšu rokstu volūdys pareizraksteibys vaicuojumim. Bezmoksys konsultacejis var sajimt par tekstim, kuru zeimu skaits ir da vīnys tyukstūšys.

Publiskajā telpā dažaidūs formatūs vys vaira pasaruoda teksti latgalīšu rokstu volūdā, nu rokstu volūdys kvalitate kūpumā vys tik cīši napīaug. Deļtuo portala lakuga.lv specialisti aicynoj uzjiemiejus, sabīdryskuos organizacejis, pošvaļdeibu īstuodis, kai ari privatpersonys izmontuot portala konsultacejis latgalīšu rokstu volūdys tekstu pareizraksteibai. Bezmoksys paleidzeibu var sajimt tekstim, kuru zeimu skaits ir da vīnys tyukstūšys. Tī var byut dažaidi informativi teksti, produkcejis voi pakolpuojumu aproksti, sveicīņu teksti i cyta informaceja. Ka zeimu skaits leluoks voi teksts prosa specifisku īsadzilinuošonu, tod latgalīšu rokstu volūdys korektura ir īspiejama kai moksys pakolpuojums.

Portala lakuga.lv redaktore Sandra Ūdre soka: “Portals regulari sajem vaicuojumus voi aicynuojumu tolkā puorbaudeit latgaliski raksteitūs tekstus, kū lobu pruotu ari dorom. Myusu mierkis i gribiešona ir, kab publiskajā telpā pasaruoda vys kvalitativuoka latgalīšu rokstu volūda, deļtuo drūsai aicynojam vaicuot paleidzeibys. Pīmāram, napaseņ preciziejom Rēzeknis galis kombinata Juoņa dīnai veļteituos produkcejis latgaliskūs tekstus. Prīcej, ka uzjāmumam ruodejuos svareigi, kab latgalīšu rokstu volūda byutu piec īspiejis korektuoka.”

Kab sajimtu portala paleidzeibu latgalīšu rokstu volūdys puorbaudei, apsavērt vajadzeigū tekstu juosyuta iz info@lakuga.lv.

Medeju “Latgalīšu kulturys ziņu portals lakuga.lv” uztur i darbeibu nūdrūsynoj bīdreiba “LgSC”, kura jau vaira nikai 15 godu eistynoj dažaidus ar latgalīšu volūdys saglobuošonu, atteisteišonu i populariziešonu saisteitus projektus. Portals lakuga.lv sovu darbeibu īsuoce 2007. godā, tys vys vēļ ir vīneigais medejs pasaulī, kura saturs teik sagataveits tikai latgalīšu rokstu volūdā – viesturiskā latvīšu volūdys paveidā. Portals regulari gatavej i publicej rokstus i informaceju par latgalīšu rokstu volūdys viesturi, vaicuojumim, kai ari praktiskim padūmim raksteitprasmis uzlobuošonai.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]