Videoklips folklorys kūpys “Upīte” dzīsmei “Gar upes molu staigoju”

Videoklips folklorys kūpys “Upīte” dzīsmei “Gar upes molu staigoju”

Rokstu sagataveja: portals lakuga.lv

Taišni pyrma goda Viļakys nūvoda folklorys kūpa “Upīte” izdeve Zīmeļlatgolys veiru dzīšmu albumu “Padzīdam i…”, i niu teik atruodeits pīktais kūpys videoklips dzīsmei “Gar upes molu staigoju”, veiksmeigi turpynojūt ceļu iz mierki par vysu albuma dzīšmu īmyužynuošonu video versejuos, viestej folklorys kūpys publicātuo informaceja.

Dzīsmis “Gar upes molu staigoju” stuosts ir par jauniekļa īšonu karā i škieršonūs nu meiļuotuos, dzīsmis teicieja ir Marija Supe nu Mukaušovys cīma, kas ir Nacionalajā namaterialuo kulturys montuojuma sarokstā īkļautuos Upītis kulturtelpys daļa, bet tuos apdari folklorys kūpys “Upīte” izpiļdejumam taisejuši kūpys dalinīki Kate i Domeniks Slišāni. Dzīsmis īrokstā pīsadalejs ari Viļakys katuoļu draudzis pravests Guntars Skutels.

“Gar upes molu staigoju” videoklips fiļmēts ituo goda pavasarī vīnā nu īvārojamuokūs Zīmeļlatgolys dobys objektu – Škilbānu pogostā asūšajā Stiglovys grovā, turpynojūt vēļ vīnu folklorys kūpys īceri – klipūs sūpluok dzīsmem paruodeit ari tyvyokuos apleicīnis šmukuokuos vītys.

Folklorys kūpys “Upīte” vadeituojs Andris Slišāns soka: “Vusu albuma dzīšmu īmyužynuošonas videoklipūs gribiešona ir, kab klipu skateituojim i dzīšmu klauseituojim teik saprūtamuokas i tyvuokas Zīmeļlatgolas dzīsmes i poša albuma stuosts. Gribīs, kab kotram klipam ir sova sajiuta, sovs stuosts i garša! Albumā “Padzīdam i…” kūpā ir 17 dzīsmes i niu asam tykušs da pīktuo profesionali taiseituo klipa.”

Dzīsmis “Gar upes molu staigoju” videoklipu taisejs Ivars Utināns, klipa producente ir Evika Muizniece. Folklorys kūpa soka paļdis par atsauceibu, saryupejūt vajadzeigūs rekvizitus, Juoņam Spridzānam, Rēzeknis teatram “Joriks”, Aldim Prancānam, kai ari Ontona Slišāna Upītis kulturviesturis muzejam.

Pārņ izdūtajā catūrtajā folklorys kūpys “Upīte” albumā “Padzīdam i…” vydā ir 17 Zīmeļlatgolys dzīsmis. Tuos sovys dzeivis laikā nu Upītis pusis teiciejim pīrakstejs nūvodpietnīks, dzejnīks, folklorists Ontons Slišāns (1948–2010). 2020. goda novembrī, sasadorbojūt ar portalu TVNET, sataiseiti videoklipi dzīsmem “Tāvs dālam i naudu deve”, “Treis jaunas meitas sied rūžu duorzā” i “Jau rudins atnuoce” (pīsadolūt Renāram Kauperam), bet ituo gods februarī kūpā ar grupu “Unknown Artist” video versejā īmyužynuota dzīsme “Dzīdet meitas puļcinie”. Par albumu i tuo dzīšmu videoversejom folklorys kūpa “Upīte” sajēmuse augšuokū apbolvuojumu latgaliskajā kulturā – Latgalīšu kulturys goda bolvu “Boņuks 2020”.

Print Friendly, PDF & Email

Nūtikšonu kalendars

Jan
26
Cat
12:00 Daugovpiļs Universitatis Humanit... @ Daugovpiļs Universitate
Daugovpiļs Universitatis Humanit... @ Daugovpiļs Universitate
Jan 26 @ 12:00 – Jan 27 @ 16:00
26.–27. janvarī Daugovpiļs Universitatis Humanitarajā fakultatē (DU HF) nūtiks kasgadejuo storptautyskuo zynuotnyskuo konference XXXIII Zynuotnyskī skaitejumi. Konferencis fokuss ir DU puorstuovātuos humanitarūs zynuotņu jūmys – saleidzynojamuo literaturzynuotne, sastotamuo volūdnīceiba, tulkuojumzynuotne, regionalistika, mutvuordu viesturis pietejumi, kulturys[...]
Jan
27
Pīk
11:00 Seminars “SPĀKA LAB. Prasmeiga n... @ Kuorsovys kulturys noms
Seminars “SPĀKA LAB. Prasmeiga n... @ Kuorsovys kulturys noms
Jan 27 @ 11:00 – 16:00
Seminars "SPĀKA LAB. Prasmeiga nūvodpietnīceibys strategeja: kai atrast pasauļa centru sovā sātā" @ Kuorsovys kulturys noms
Janvara golā, 20. janvarī Daugovpilī i 27. janvarī Kuorsovā, Latgolys kulturys darbinīkus i navaļstiskūs organizaceju puorstuovus aicynoj iz izgleitojūšim seminarim komunikacejis i nūvodpietnīceibys prasmu styprynuošonai “SPĀKA LAB”. Kotrā nu seminaru byus vareiba dzierdēt treis attīceiguos[...]
Jan
28
Sai
12:00 Puorguojīņs pa Rēzekni “Piļsāta ... @ Rēzekne
Puorguojīņs pa Rēzekni “Piļsāta ... @ Rēzekne
Jan 28 @ 12:00 – 15:00
28.janvarī gaidoms puorguojīņs pa Rēzekni “Piļsāta pi upis i storp stacejom”. Plānuots apmāram 3 stuņžu laikā nūīt ap 7 kilometrim. Tū suoks pi dzeļžaceļa stacejis “Rēzekne II”, varēs izzynuot, ar kū tei ir seviška. Tuoļuok[...]