Kulturys īsacejumi nedeļai: pļovu spāks, Jura ols i slovonī tiergi

Kulturys īsacejumi nedeļai: pļovu spāks, Jura ols i slovonī tiergi

Rokstu sagataveja: lakuga.lv

Itūnedeļ Latvejā svietej Juoņa dīnu, bet ir kaids cylvāks Latgolā, kam itī svātki kas gods saīt dubultsvātki, jo 23. junī pi vysa kluot ir vuordadīna, bet 24. junī dzimšonys dīna. Sveicam svātku nedeļā Ludzys nūvoda Turisma informacejis centra vadeituoju Līgu Kondrāti i vaicojam jai ituos nedelis īsacejumus pīdzeivuošonai Juoņu laikā.

Izzynuot vaira i sajust pļovu spāku

Itymā nedeļgolā, 26. junī, Līga aicynoj iz Pļovys dīnu Ludzys, Kuorsovys, Cyblys i Zylupis nūvodūs. Itūgod bejušuo Ludzys rajona (tūpūšuo Ludzys nūvoda) nūvodi kotru mienesi īceriejuši vīnu tematiskū dīnu. Maja golā breineigi aizvadeita Pūra dīna, bet junī varēs izzynuot vaira par pļovom. Līga soka, ka kotrys jau mes jādzam izīt dobā, bet cīši labi ir, ka kaids gudruoks kū ta pastuosta, paleidz izzynuot vaira i atkluoj ari jaunu pasauli par īrostū. Pļovys dīnā kotram byus vareiba atrast sev pateikamuokū aktivitati – ar zynūšu dobys gidi Renāti Kaupužu sovvalis dzeivinīku audziešonys saimisteibā “Ošumājas” Mežvydu pusis Gadžiuņūs byus vareiba izzynuot dažaidus pļovys biotopus i augus. Saimem ar bārnim varātu patikt ari spēlis i konkursi, kas papyldynoj pļovu izzynuošonu. Saļņovā īcarāta čaja meistarklase ar čaja zynuotuoju Annu Danču, Utičevā, Lemešmājās pļovys puču i mežau augu dekoru darbineica, Leidumnīku bīdreibys nomā zuoļu dečeišu darbineica i vokorā pošys pierts baudeišona, bet Mērdzenis Rūzorūs piertneica Ingūna Rauda izstuosteis, kaidi augi vysalobuok der piertei. Pļovys dīnys vokorā gostūs iz garšeigom zeminem gaideis ari zemnīku saimisteiba “Purvmaļi” Pasīnis pogostā. Pošā vokorā Grebļakolna Meikšānūs byus Ilgys Ivanovys organizātuo tradicionaluo Tauriņu nakts ar tauriņu vāruošonu i gaismuošonu entomologa Guna Akmentiņa vadeibā. Naktī ar breivdobys koncertu prīcynuos Anta Eņgele, bet piečuok nakts puorguojīnā preteimā saulei byus pīrūbeža pļovu biotopu īpazeišona. Vaira par Pļovys dīnu i pīsasaceišonu nūtikšonom ITE.

Pļova, foto nu lakuga.lv arhiva

“Žbana” darejumi svātku goldam

Svātku goldam Līga īsoka paraudzeit Ludzys nūvoda jaunuos ols* dareitovys “Žbans” taiseitū olu. “Žbans” pīduovoj vīnu nu pyrmajim darejumim – Ludzys pusis īvārojamuo muokslinīka Jura Soikana vuordā nūsauktū mīžu olu “Jura ols” i kvīšu olu, kam cikom vīnkuoršais “Kvīseiša” vuords. Olu Ludzā var nūpriekt Latgolys lobumu veikalā “Cymuss”.

*Atguodynojam tik, ka puormiereiga alkohola lītuošona ir kaiteiga veseleibai!

Karteņā: dareitovys “Žbans” pīduovojums, foto nu veikala “Cymuss” arhiva

Slovonī Juoņa dīnys laika tiergi

Itūgod gon tikū paguojuši, bet Līga atguodynoj, ka Ludzys nūvodā iz Juoņa dīnys laiku gostūs sauc slovonī lelī tiergi – Lelais latgaļu tiergs Ludzā i lelais tiergs Kuorsovā (lels tiergs Kuorsovā nūteik kotru mienesi). Itūs tiergu nūtikšonu sovūs planūs Līga aicynoj pīraksteit cytam godam jau aiz laika.

Karteņa: Lelais latgaļu tiergs, foto Anita Mortuzāne, Ludzys TIC

I golā Līga Kondrāte ituos nedelis īsacejumus nūslādz ar atsasaukšonu iz sev meilū kinu “Cylvāka bārns”, kur muzykants Izidors Boņukam soka: “Tu ej, klausīs, a es spieļuošu!” – tai i Līga vielej mums kotram īt pa dzeivi, klauseitīs i redzēt, dzierdēt i sajust vīnam ūtru i Latgolu!

Print Friendly, PDF & Email

Nūtikšonu kalendars

May
20
Pīk
19:00 Artura Skuteļa lelkoncerts “Jā” @ koncertzale "Palladium"
Artura Skuteļa lelkoncerts “Jā” @ koncertzale "Palladium"
May 20 @ 19:00 – 22:00
20. majā Reigā, koncertzalē “Palladium” nūtiks latvīšu hip-hopa muzika Artura Skuteļa lelkoncerts i jaunuo albuma “Jā” prezentaceja. Kai lelkoncerta eipašuo gaška ar sovu soloprogramu iz skotuvis kuops ari latgalīšu repere Ūga, kuruos 2020. godā izdūtais[...]