Rokstu sagataveja: portals lakuga.lv

Nu 16. da 24. juļa Rēzeknē byus vareiba izbaudeit skonūšu vidis muokslys objektu “Savpatība”, kuruo moluos spīgeļūsīs ari nu Latgolys īmūšū dažaidu vītu ļaužu dzīduojumu kadri. Dzīduotuojus sovā pietnīcyskajā ceļā vairuoku godu garumā satics dirigents Sigvards Kļava, viestej Latgolys viestnīceibys GORS atsyuteituo informaceja.

Nu 16. juļa Rēzeknē pi Latgolys viestnīceibys GORS, tod Limbažūs i piečuok Reigā byus vareiba izbaudeit skonūšu vidis muokslys objektu “Savpatība”, kas ir unikala publiska instalaceja i muzykals viestejums, kas aicynoj saredzēt i sadzierdēt pošam seve. Vidis multimedialuo instalaceja sastuovēs nu spīgeļu objektu, kuru muzykalajā nūformiejumā izmontuots latvīšu komponistu Santys Ratniecis i Ērika Ešenvalda skaņdorbi, bet atkareibā nu atsarasšonys vītys i puorsavītuošonys, apmaklātuoji varēs dzierdēt atseviškus instrumentus i bolsus dažaiduos kombinacejuos. Vidis objektu moluos spīgeļuosīs režisora Roberta Rubīna dokumentalī Latvejis teirradņu dzīduojumu kadri, kurūs godu garumā sovā pietnīcyskajā ceļā satics dirigents Sigvards Kļava – gon bārni ar eņgeļu bolsim, gon dzeivisgudri dažaidu vītu ļauds.

Vidis objektā varēs redzēt i dzierdēt ļauds nu vysys Latvejis, bet jūs vydā byus ari latgalīši: Liene Skrebinska i Zane Dukaļska nu Rēzeknis, Aleksandrs Maijers nu Kruoslovys, Ligita Spridzāne nu Upītis, Aija Smirnova i Kristiāns Jasinskis nu Leivuona, Rita Mičule nu Krystapiļs, Vera Guļbenova nu Rībeņu, kai ari skanēs Kristīnis Kārklis-Kalninis i Edgara Kārkļa bolsi.

Vidis objekta atkluošona kūpā ar Sigvardu Kļavu, Robertu Rubīnu, Lieni Skrebinsku i cytim projekta dalinīkim pi Latgolys viestnīceibys GORS paradzāta 15. julī deveņuos stuņdēs vokora.

Projekts teik eistynuots ar Vaļsts kulturkapitala fonda mierkprogramys “KultūrElpa” i Reigys Dūmis kulturys programys “Rīgas vasara” atbolstu.