Rokstu sagataveja: portals lakuga.lv

Da 6. septembra sevkuram Latgolys studentam, kas ir īsastuojs Latvejis Universitatē (LU) i studēs kaidā nu bakalaura programu pyrmajā kursā, ir vareiba dasasaceit izcileibys stipendejai “Latgales “Ceļamaize””, viesteits Latvejis Universitatis sātyslopā.

Stipendeja dybynuota 2019. godā piec Amerikys latgalīša i mecenata Pītera Aloiza Ragauša iniciativys, tuos mierkis ir veicynuot sova dzymtuo nūvoda jaunīšu izaugsmi.

Stipendeja paradzāta LU pamatstudeju aba bakalaura studeju pyrmuo kursa studentim, kurim, pabeidzūt vydsškolu, ir izcilys sekmis i leli sasnāgumi gon vuiceibuos, gon uorpusškolys aktivitatēs. Taipat studentam, kas grib pretendēt iz “Ceļamaizi”, voi pošam, voi kaidam nu vacuoku juobyun deklarātam Latgolā.

Stipendejis apmārs ir 2200 eiro akademiskajā godā, taidys stipendejis ir div.

Īprīšk Latgolys “Ceļamaizi” jau ir sajāmuši četri studenti – Līga Runčis i Ginta Lazare 2020./2021. akademiskajā godā, kai ari Jelizaveta Klimova i Toni Anželo Fernandes 2019./2020. akademiskajā godā. (Interveju ar Toni Anželo vari skaiteit ITE.)

Vaira informacejis par tū, kai dasasaceit stipendejai ITE.

Mecenats Pīters Aloizs Ragaušs ir izaudzs Mičiganā, Amerikā, tok juo vacuoki i vacvacuoki ir dzymuši Latvejā, vacuoku saknis īt nu Latgolys – Rogovkys i Viļānu pusis.