Latgaliskuos kulturys viests #4: nūtikšonys augustā
Rokstu sagataveja: portals lakuga.lv
Portals lakuga.lv video raidejuma “Kulturys viests” formatā turpynoj atsavērt iz latgaliskuos kulturys nūtikšonom īprīškejā mienesī, itūreiz augusta nūtikšonys. Jaunuokajā raidejumā par tū, ka Vaļsts volūdys centrā dorbu izsuocs latgalīšu volūdys lingvists, jaunumi muzykā: Ūgys sadarbeiba ar Patrishu i Dināru Rudāni, albums “Pīmiņ, brōļ!” i īroksts “Jezups dejo valsi”, gruomotu jaunumi, kai ari par jaunū vuiceibu godu i tuo īspiejom latgalīšu volūdys īsavuiceišonā.
Augusta nūtikšonys, par kurom viesteits raidejumā:
- Rogovkā nūtykuse pusaudžu nūmetne “Sūpluok saimē” i latgalīšu volūdys i kulturys kursi “Vosoruošona”;
- Baltejis džeza festivalā “Škiuņa džezs” Lūznovys muižā Trio Lipskis/Justs/Arbidāns prezentiejuši albumu “Taids džezs”;
- Vaļsts volūdys centrā dorbu izsuocs latgalīšu volūdys lingvists i pījimti vaļsts volūdys pamatpastatejumi 2021.–2027. godam;
- Repere Ūga kūpā ar dzīduotuojom Patrishu i Dināru Rudāni īrakstejušys dzīsmi “Pāries”;
- Jaunajā vuiceibu godā vaira nakai 25 školuos byus vareiba vuiceitīs latgalīšu volūdu;
- Dirigenta i Latgolys vieru koru kusteibys calmlauža Juoņa Grudula gūdam izdūts albums “Pīmiņ, brōļ!”;
- Gruomotu jaunumūs – Ūzulainis pogostam veļteits izdavums “Ozolzīles zīmē” i “Tāvu zemes kalendars 2022. godam”;
- Ansamblis “Jakob Noiman Festival Band” izdevs Latgolys īdvesmuotu īrokstu;
Itys jau ir catūrts nu planavuotūs sešu video raidejumu par latgaliskuos kulturys nūtikšonom īprīškejā mienesī. Raidejuma vadeituojs ir kinys “Piļsāta pi upis” golvonuos, Aņša lūmys atveiduotuojs Dāvis Suharevskis.
Kulturys ziņu eistynuošona ir projekta “Latgaliskā kultūrtelpa: problēmas, analīze, atspoguļojums portālā lakuga.lv” daļa, tū finaņsej Medeju atbolsta fonds nu Latvejis vaļsts budžeta leidzekļu. Par raidejuma saturu atbiļd latgalīšu kulturys ziņu portals lakuga.lv. Cikom īcarāti seši ziņu raidejumi, bet tiks maklātys īspiejis, lai itaida formata viests varātu turpynuot ari iz prīšku.
Portala lakuga.lv komanda soka paļdis par atsauceibu i atbolstu ziņu sataiseišonā raidejuma vadeituojam Dāvim Suharevskim, video operatoram i montažys režisoram Sergejam Čakānam, grafiku veiduotuojam Krišjānim Pleiko (Upes kinostudija) i Ivo Grigalim nu grupys “Latgalīšu Reps”.
