Valentins Lukaševičs. Surgunteja

Valentins Lukaševičs. Surgunteja

Prīškvuorda i puorlykuma autors: Valentins Lukaševičs

Runojūt par jaunim dorbim ar literaturzynuotnīku, literatu Valentinu Lukaševiču, portalam lakuga.lv Vaļuks saceja, ka grybātu paraudzeit kaida autora dorbu puorlikšonu latgaliski i ka jam padūmā asūts Preiļūs dzymušais, nu puoragri myužeibā nūguojušais dzejnīks Andis Surgunts (1984–2018). Latgalīšu volūda i jam beja vīna nu sovu volūdu, bet dzejūļūs tei niu īsadzeivuos car Valentinu. Vaira par Andi Surguntu ITE.

Surgunteja

Ir poeti, kuru muokslinīciskuo telpa ir bez rūbežu. Kai izdūmuota karaļvaļsts, kurai, i tei ir golvonuo atškireiba nu realu vaļstu, rūbeži ir iluzori. Navā zynoms, cik kvadratkilometru ir plateiba, kai pīaug īkšzemis kūpprodukts. Zynoms tikai, ka vajadzeibys gadīnī kaidam var paduovynuot pusi nu vaļsts. Ka putyns vīnys dzeivis laikā jū navar puorliduot.

Tei Surgunteja nav snīguoti kolni ci tuksness ar oazem. Tys ir cytuos karaļvaļstīs. Te daudz iudiņu, kūku i myglys. Nivīns nastrāpoj, nav dryuzmis. Karaļs staigoj bosom kuojom i paltrakūs, daudz runoj ar muokūnim. Nu eists karaļs!

Iudiņu te ir daudz i vysvysaižu. Tak leits nu dabasu i navar saprast – tuos prīcys ci suopu osorys. Tai ir tikai ar pošom ontologiskuokajom lītom.

Iudiņs tak i nu krana. Var pajimt šampunu i ar soltu iudini izmozguot motus. Nui, var dabuot īsnys i kuosu. Tys normali, slymoj tikai dzeivi cylvāki.

Surguntejā cīši moz asfaltātu ceļu, te vaira stygu.

Te azari, daudz azaru. Karaļs muok palikt par zivi. Kai deļ tuo, kab pasavērt, kas juo vaļsts azarūs doruos, kai ari kab izstuosteit, kas tī ir.                            

Tim, kuri viersā.

Redzīs, ka auškuokī ir tī, kuri viersā. Nā. I na zamuokī, kai jī poši cytreiz dūmoj. A tī, kuri ir īškā. Iudinī. Myglā. Volūdā.

Mygla Surguntejā taida kai dzeiva. Saplokuse. Kai šyrmi. Kai keiseļs.

Surguntejā vyss kustīs, dvašoj, guļ, verās, dasaaistīk. Ka vaļstei nav rūbežu, tod ari lītom, kūkim, zvārim i dūmom nav konturu.

Te vyss ir tiuli, te nikuo nav tuoli. Pat – ka i septenis dīnys car trejdevenim mežim juoīt, kur eglis zorūs i palāda vulgaris, i palāda atheiensis. Te ari vuordi ir bez rūbežu. Vīna semantika īplyust ūtrā semantikā, a vīns dativs palīk par kaidu to akuzativu.

Iudiņa zuolis ir zyrgu krēpis, zvaigzdis ir acs, vaicuojums ir mežā iz zora karinejūšs cymds.

O, mygla pasacēle. A beju dūmovs, ka aiz tuos nazkas cyts.

Maņ te vīns vaicoj. Nui, metaforys gryuši apraksteit ar terminim. Termini tod poši puorsavierš par metaforom.

Karteņa: Andis Surgunts, foto nu Ingys Surguntis privatuo arhiva

Andis Surgunts (1984–2018)

Nu latvīšu rokstu volūdys latgaliski puorlyka Valentins Lukaševičs


***

atlaid ka napīmiņu tovejuo vuorda etimologeju
īguodys nareši pīviļ sova pasarakstīņa vītā pastotūt tovu
tei vystycamuok ir storpynšaļte
storp tū kas proguoja i tū kas naatīs
ci natymā golapunktā nūstuos
storpynšaļte ar patalogisku anatomeju
ar sirdi kas nabeidz ritmiski izaplest
aizjamūt tovys pacelibyušonys telpu


***

dvašu i cigarešu dyumus pajims caurvieji
palykušuo ironeja i ovacejis dueļūs nūsystajim sareceklēs
ptomaina sulā – myusu pādejuos atveļdzis guļdzīņūs
vysvairuok palsys paliks acs vysvairuok styngi pasavierīni leidz
mundi imaginalis pakriešļa atspaiti radzātuojus propūļdiejuši
saplyuss vīnveida matricā
sirdspleiškys i dylūni naradzami īsalaveis myusu rynduos
torsi sakriss izčākstēs rumpi
i kaids byus tik sirdsvaļeigs naslāpnūt suopis ka nasaruodeis eists


***

es snauduļoju iz vādakla spuorna maņ pateik
zemis dymduotnis smīkli a zeme
zeme ir smoga kai magma kas iztak nu
naīsiļdeitys reiklis
i
dzīdi
eckur
nuotris plieš bārnu rūkys i uoda palīk
apsavylkušys piļs
a mūcekli spļaun maigumu
zefirs
tu soki
nazkas pazeistamuoks par kunkstīnim i
pusmalnnakts kvāpim a maņ tev natikt
puori na tev maņ naktī pīzvaneit i pas’ceit es
tevi mīļoju i pajamu atbiļdeibu par pasaulī
banaluokū vuordu pasaceišonu
nui smuks ir juos ocu ocums i es izsprīžu
izsprīžu
ka atpakaļ īt nagribu


***

atīs atīmieji stuovātuoji stuovēs i plaudātuoji
plaukstynuos
komunisti smaideis i tibetīši byus laimeigi
kas tei byus par dīnu kas tuos byus par naktim
kas par caurynvieju kas par kinu
kas par zanzibarys plykū smukumu cygu
filtrim
es pret


***

maņ byus radzeni mozeni lāskaini radzeni
i sevkuru catūrtū dīnu
es dzeršu nu rutinā īsnyguša drakona ciča
kai teleits bez atmanis
maņ byus mozi breinumūs škeistūši radzeni
i cylvāki žmīgs munu plauksti
izjuzdami vacūs mauku muoju stoltumu
maņ byus dvaša kai gāzis kamera
es rūšsu tū žurovom i čyusku speideigom
acim
tod atīs šagals
pasaklaneis izdūmuotai batašu dūbnai
i trāpai eitanizēs mani
106 kinīšu danierkštys ocu turbys pa labi leikumiņ
pa kairai
byusnabyusnēs cikom raudzejumi byus cauryn


***

čymyni grīžnās ar ladu i baciļūs īsatyn
dīnys
zamlūdzis zaudej jumpraveibu [i] sorkonkryuteiši
pacīteigi kivoj ar golvu
rausim garklis rausim speidaceitis karaūstys vaigūs
saulē nūdagušys mugorys i verandys ar
durovom iz azara pusi vosorai izrausim
i pagluobuosim plaukteņā viersyn pyrmuo kosmosā
izsyutātuo suņa skafandra pūgom


***

kurs sakuortovs buordys nažus pa plauktenim
var izpyust
sovu dvašu iz spīgeļa
īviļkt ar pierstu atvasal vuordus
i giutīs pi lītys
voi tei byutu zūbu birsteite
revolvers ci rokstommašyna


***

cylvāks ir mendelejeva tabuluos
elementu kombinacejai tabula rasa kai
īdziers soka botanikis nu sūpluok dzeivūkļa

kai ba ūglekļa daudzuma atškireibys cytaižūs
organismūs zeimuotu cytys vīntuleibys cytus
vuojpruotus i dzāruma stuovūkļus


Karteņa: Andis Surgunts, foto nu Ingys Surguntis privatuo arhiva

***

bezteksta īroksti ir atīsmis moda,
drēbis, kurys kulā ar tevi trenejās sinhronajā
ņurkuošanā vaira nav drēbis, a ruoviejs i
sliedziejs, kurūs šivieja tai apbreinoj, nu tai apbreinoj,
ka breinums, ka teju nasasašyun par apbreina
cīneigu klasiki, par kaidu gryb byut kotrs, kurs
īguojs tiuļuokuos attīceibuos ar pantekstu siļči
– namotivātu, vyslaiceigu muzys paveidu bez
grimašu komplekta, bez pasis, sovutīs ar lelu
poruodu pījiurys bankā, kura bankrotej, bankrotej,
rotej pa viļņa kūri, korā izdzīd pūgu
palīkys, šivieju ar odotu pylnom sauvem,
kū puordūt par vīnu vieja kārmynu


***

ībrīnu upē. apvalku iudini kai kraklu. es
naelpoju. iudiņs taipoš


***

snīgs paliks sorkons i dzeraunis paliks par
imperejom
koalys mozguos traukus i pīdzemdēs
pīsačeršonu zvaigzdem
kriss īdūmys i kartons drakonūs kriss kai
līsmis
vīns paliks olkons i zīma daspīss lyupys
pi tovejūs
laime dasaspruodzēs i aiztaiseis acs


***

cik eistyn smuki
pi gangys hemingvejs kaun napīkuss gūvis
i seneka puorgrīztom venom paslapyn
īt vērtīs jrt izruodis
vyspyrma baudu
todyn izprīcys
i nuovi
dozātuos davuos
i nuovis kulturys valdzynuojumu
bur aizbur bur aizbur
car dvašu car ocu styklumim car tovu ašni
munā mutē
ak mierstūšais dīv
voi tovi vergi nīčis golvā
mudri ari byus beigti

Print Friendly, PDF & Email

Nūtikšonu kalendars

Oct
16
Sai
10:00 Tiergs “Latgalīši Reigā brauc” @ Kalnciema kvartals, Reiga
Tiergs “Latgalīši Reigā brauc” @ Kalnciema kvartals, Reiga
Oct 16 @ 10:00 – 16:00
Tiergs "Latgalīši Reigā brauc" @ Kalnciema kvartals, Reiga
Itūsastdiņ, 16.10. Reigys Kalnciema kvartalā byus latgalīšu amatnīku i sātys ražuotuoju tierdzeņš “Latgalīši Reigā brauc”, skanēs latgalīšu muzyka i vaļdeis sirsneiga atmosfera.
Oct
17
Svā
15:00 Grupys “Baltie lāči” koncertprog... @ CATA kulturys noms, Cēsis
Grupys “Baltie lāči” koncertprog... @ CATA kulturys noms, Cēsis
Oct 17 @ 15:00
Grupys “Baltie lāči” koncertprograma “Tirgus stāsti” @ CATA kulturys noms, Cēsis
Grupa “Baltie lāči” aicynoj iz jaunu koncertprogramu “Tirgus stāsti”. Itymā naparostajā tiergā ir vareiba saklauseit i izjust vysu, kū sirds gryb – gon dzīsmis i dzeju, gon smīklus i osorys. Ar dzīsmem i dzeju izdaiļuots,[...]
Oct
22
Pīk
18:00 Atcalts! Vokaluos muzykys koncer... @ Vīneibys noma koncertzals, Daugovpiļs
Atcalts! Vokaluos muzykys koncer... @ Vīneibys noma koncertzals, Daugovpiļs
Oct 22 @ 18:00
22. oktobrī 18.00 stuņdēs Daugovpiļs Vīneibys noma koncertzalā byut vokaluos muzykys vokors, kas ir veļteits dirigentis Terēzijas Brokas pīmiņai.  Muzykys vokorā pīsadalēs Preiļu nūvoda školuotuoju kors “Latgale”, Augšdaugovys nūvoda pošvaļdeibys kulturys centra “Vārpa” jauktais kors[...]
18:00 X Muzykys i muokslys festivals “... @ Daugovpiļs
X Muzykys i muokslys festivals “... @ Daugovpiļs
Oct 22 @ 18:00
X Muzykys i muokslys festivals "Daugavpils ReStArt 2021" @ Daugovpiļs
Itymā nedelī Daugovpilī suocās X Muzykys i muokslys festivals “Daugavpils ReStArt 2021”, tuo mierkis ir atkluot muzykys i muokslys daudzveideibu. Festivala ītvorūs Daugovpilī ar sovom koncertprogramom gasteis taidi muokslinīki kai soliste Margarita Levčuka nu Boltkrīvejis,[...]
19:00 Grupys “Baltie lāči” koncertprog... @ Valmierys kulturys centrs
Grupys “Baltie lāči” koncertprog... @ Valmierys kulturys centrs
Oct 22 @ 19:00
Grupys “Baltie lāči” koncertprograma “Tirgus stāsti” @ Valmierys kulturys centrs
Grupa “Baltie lāči” aicynoj iz jaunu koncertprogramu “Tirgus stāsti”. Itymā naparostajā tiergā ir vareiba saklauseit i izjust vysu, kū sirds gryb – gon dzīsmis i dzeju, gon smīklus i osorys. Ar dzīsmem i dzeju izdaiļuots,[...]