Rokstu sagataveja: portals lakuga.lv

2021. gods 26. septembrī nu 10.00 da 17.00 stuņžu Reigā, Latvejis Etnografiskajā breivdobys muzejā, Latgolys plānuošonys regions sadarbeibā ar bīdreibu “Latgales Tematiskie ciemi” aicynoj iz latgalīšu ceļojūšu tiergu “Latgalīši Reigā brauc!”. Tiergs nūteik Latvejis-Krīvejis puorrūbežu sadarbeibys projektā “Amatniecība bez robežām”, informej Latgolys plānuošonys regiona Crafts projekta vadeituoja Natālija Kurakina.

Tiergā apmaklātuojim byus vareiba sasatikt ar vysaidu nūzaru amatnīkim, jaunajim muokslinīkim i meistarim, kai ari īsaguoduot smukus suvenirus i gordys lītys, muola i kūka darynuojumus, vysaidys tekstila precis, mūdis aksesuarus i vysu kū cytu. Taipoš tiergā caur video stuostu prezentēs ari projekta “Amatniecība bez robežām” sadarbeibys partneru – Pleskovys apleicīņa amatnīku – dorbus.

Itūgod varēs apsavērt drēbis nu “Bencha Muude”, uodys sūmys nu “Zelma Kraft”, virtuvis dieleišus, paplātis nu SIA “Eko pinus”, stykla pierleitis i dekorus nu muokslineicys Ingys Salminis, ari lelys meikstuos kaitu maņtenis i tekstila suvenirus nu Tatjanys Sorokinys. Taipoš ari amatneicys nu TMLS “Dubna” pīduovuos apsavērt austus greidys celeņus, kurūs taisejuse Ilga Driksne, adejumus i apgleznuotys zeida šaleitis, kuruos saryupiejuse Aīda Rotčenkova, tok SIA “Kristāla kurpīte” pīduovuos vysaidu kruosu uodys izstruoduojumus – gon jūstys, gon ari tautu daņču kūrpis.

Tiergā varēs atrast ari keramiku i tradicionalā, i myusdīneigā izpiļdejumā. Jū taisejušys muokslineicys Nellija Dzalba, Olga Pauliņa, Lība Ločmele ci Agnese Čakša. IK “LARI D” Ludmilys Morozovys uodys rūtys ar dekorativim akminim, ari vysaidi Lienis Brūveris pierļu izstruoduojumi.

Taipoš tūs, kas olkoni, tiergā ar rupmaizi, sātys sīru, kyupynuotu gaļu, sātys dasom, olu, madu i vēl vysa kū cytu pabaruos “Latgolys golds”.