Rokstu sagataveja: portals lakuga.lv

Popularuo grupa “Latgalīšu Reps” klauseituojim pīduovoj sovu, modernizātu interpretaceju i video latgalīšu tautysdzīsmei “Auga, auga rūžeņa”. Dzīsme ir nu grupys ūtruo studejis albuma “Cyta dzela”, informej  “Latgalīšu Reps” projektu menedžers Ņikita Turubanovs.

Tautysdzīsme “Auga, auga rūžeņa” ir labi pazeistama latgalīšu dzīsme, niu grupys “Latgalīšu Reps” dalinīki ir radejuši tautysdzīsmei jaunu hiphopa skaniejumu. Puiši ar dzīsmis stuostu paruoda myusdīnu attīceibu modeli, kurā mīlesteiba teik aplīcynuota caur materialū pasauli.

“Auga, auga” videoklipa idejis i scenareja autori ir grupys dalinīki, sasadorbojūt ar operatoru i montažys režisoru Jāni Jēkabsonu i Tomu Markovu – muokslinīku nu Jelgavys. Sadarbeibā ar Tomu pyrma kaidys šaļts taps ari vēļ vīns grupys “Latgalīšu Reps” video dzīsmei “Škola atā”, vaira par tū var skaiteit ITE.

Dzīsmis “Auga, auga” vuordu autori ir “Latgalīšu Reps” dalinīki Ivo Grigalis i Didzis Kozlovs, dzīsmis vokalū izpiļdejumu papyldynoj ari jaunuo dzīduotuoja Sanda Grigale.

Vaira par “Latgalīšu Repa” ūtrū albumu “Cyta dzela” var skaiteit ITE.