Igauņu saime aicynoj iz jaunuo albuma “Tu munā sirsneņā” prezentaceju

Igauņu saime aicynoj iz jaunuo albuma “Tu munā sirsneņā” prezentaceju

Rokstu sagataveja: portals lakuga.lv

Pīktdiņ, 8. oktobrī, sešuos stuņdēs vokora Lūznovys muižys Sorkonajā zālē iz jaunuo albuma “Tu munā sirsneņā” prezentacejis koncertu aicynoj Igauņu saime. Albumā byus īkļautys 13 latgalīšu tautysdzīsmis, latvīšu ziņgis i originalkompozicejis, portalu lakuga.lv informēja Igauņu saimis kapelys vadeituoja Rasma Igaune.

Igauņu saimis kapelā spēlej pīci muziki, kurūs dzymtuo puse ir Rēzeknis nūvoda Gaigalova – mama Rasma (ceitara, akordeons, perkusejis, stabule i bolss), tāvs Gunārs (akordeons, kūkle, stabule, garmoška i bolss) i meitys Liene (vejūle, mandolina, garmoška, bolss), Marta (vejūle, mandolina, perkusejis i bolss) i Laima (stabule, bungys, perkusejis, flauta i bolss). Saime kūpā muzicej jau nu 1991. gods, kurā par pyrmū kūpeigū uzastuošonu sauc Storptautyskū folklorys festivalu “Baltica ‘91”. Itūs godu laikā Igauņu saime ir muzicējuse vysā Latvejā, taipat pīsadalejuse koncertūs i festivalūs cytuos vaļstīs (Lietovā, Igaunejā, Pūlejā, Uzbekejā, Italejā, Portugalē, ASV i cytur). Vysa leluokū popularitati Igauņu saimis kapela dabuoja 2009. gods rudinī, pīsadolūt LNT raideitajā saimu dzīduošonys šovā “Dziedošās ģimenes”. Veiksmeiga kapelai bejuse pīsadaleišona ari LTV raidejumūs “Latvijas šlāgeraptauja” i “Latvijas sirdsdziesma”.

Igauņu saimis spālātuo i dzīduotuo muzyka ir kai ļusteigys, tai sirsneigys latgalīšu tautysdzīsmis i originaldzīsmis, ari tautā meilys ziņgis, daņči i rūtalis. Rasma i Gunārs ir ari baļļu, jubileju i kuozu muzykanti, bet meitys Liene, Marta i Laima 2020. godā sataisejušys sovu etnomuzykys apvīneibu “Muosys”.

Kapelys īprīškejais albums “Vysi zīdi pļaveņā” izdūts 2015. godā, nu jaunajā albumā “Tu munā sirsneņā”, pi kuruo dorbs suokts pārnejuo gods vosorā i īroksts taiseits Eināra Lipska studejā Rēzeknē, pi albuma dizaina struoduojuse muokslineica Dana Vasiļjeva, bet tuo izīšonu atbaļstejuši SIA “Baltharmonia”, SIA “Duduks” i Rēzeknis nūvoda dūme.

Aicynojūt iz albuma prezentaceju, Rasma Igaune soka: “Gribīs, kab ari cyti sadzierd myusu bolsus i muzykys izpratni. Albumā ir 13 dzīšmu, kuruos idejiski ir preceibu dzīsmis i vēļ divejom ir muzykals pavadejums. Tuos ir latgalīšu tautysdzīsmis, latvīšu ziņgis i originaldzīsmis, kas kapelys skaniejumā byus energejis pylnys i pamateigys. Albuma izdūšonu turam ari par sova montuojuma saglobuošonu i populariziešonu. Prīcojamīs, ka muzyka vajadzeiga ari deju horeografejom. Tai ir izaveiduojuse sadarbeiba ar bīdreibu “Večerinka”, kur idejis pīduovoj horeografs Ilmārs Dreļs. Vairuokys dzīsmis, kurys saceriejs Gunārs Igaunis i kam ir topušys dejis, ir ari itymā diskā. Aranžejis tautysdzīsmem asu taisejuse kai es poša, tai i Gunārs i Liene. Cīši prīcojamīs, ka byus izdūts vēļ vīns breineigs goradorbs, kas nūderēs deju kolektivu, folklorys kūpu vadeituojim i cytim interesentim!”

Igauņu saimis albuma “Tu munā sirsneņā” attaiseišonys svātkus Lūznovys muižā varēs apmeklēt bez īīšonys moksys, nu apmaklātuojim juoīvāroj vysi itūšaļt pastuovūšī epidemiologiskī īrūbežuojumi, i, īmūt iz nūtikšonu, juoizruoda dereigs Covid-19 sertifikats ci negativs tests.

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]