Pasauļs nav cīši lobs

Pasauļs nav cīši lobs

Sagataveja: Ilze Sperga i portals lakuga.lv

Portals lakuga.lv ir tei vīta, kur sūpluok socialajam teiklam “Facebook” Marijis Dzeislys dzeja škārsteiklā atrūnoma vysvaira. Koč i najaušys sakriteibys deļ īprīškejais Dzeislys dzejis publiciejums tai i palics portala malnrokstūs, itūreiz autoris jaunuokuo dzeja. Sarakste ar Mariju Dzeislu puorskaitoma ITE.

***

Pasauļs nav cīši lobs, kab te pīdzymtu
Pasauļs nav lobs, kab te dzamdātu dālu
Ceru, ka tev te koč patyka
Ka beja skaista doba i ari lobi cylvāki
Šudiņ beja muna dabasūs braucamuo dīna
Stuovieju bazilikys pogolmā bez sertifikata
Nivīns mane naredzēja
Nav labi byut sīvītei
Sīvītei Afganistanā

***

smierts pi mane jau ir bejuse
kas maņ kuo beitīs
siedieju iz gaņku ar kopeja krušku i vierūs
aizlidoj vysaidi iudiņa putyni
trešajā dīnā snigs
uobeli nūjimti, ierškeiži appļauti
kai nikuo nabyutu bejs
Dīvs apmauc pasauli ar tymsu capuri
babys i dzeda duorzam ir skusts
vysam par speiti mikileiši augstūs kuotūs
i es jim leidza

***

itūgod pasauļa gola nabeja
tai i napīdzymu i nanūmyru ni reizis
decembris atguoja ar slūtu
leitā izmēzt sasakruojušūs syudus
dasola
niu īmu dzīduodama
pa kryvasim kai pa velis dieli
nūsola
pārnejuos laumuteitis i čymynu zīdi
vot i vosora cauri

***

Vysu dīnu zūmā nivīna nabeja
Vierūs iz seve kai spīgelī
Sasukuoju motus i buordu
Ka itū vysu laiku varātu atspriekleņ
Vēļ nivīna ekrana
Nivīna digitala cylvāka munā sātā
Vysu dīnu zīmā nivīna nabeja
Vierūs cārmyušku i aroneju duorzā
Kai ašņa lasis iz snīga ūgys
Garom skrīnūšī putyni pīsvaideja
Te beja, te aizliduoja
Es vīna poša sovā sātā
Verūs lūgā kai ekranā

***

īsliedžu vysus ekranus
vysa pasauļa baimis pīleida pylna ustoba

tik daudz svešu smieršu ite vēļ nabeja bejs
apmaiseju ar meņti

koč kulinaruos prasmis nav muna ūtruo uoda
da i varbyut nivīnai natruopeju

***

avtozaki pylni duorgu dvieseleišu
mobilī morgi iz četru skrytuļu slimneicys pogolmā
itys pasauļs ir cīši mobils
siežu iz gūvu slaucamuo beņčeiša dzeda ustobā
apleik bezgaleigs okeans

***

dīna bez ministra
teļvīzeram izruovu nu sīnys štepseli
apkluoju ar babys tambureitū sedzeņu
gari i siermi moti ir kovida mūde
apseju skusteņu ap vīnu aci
byušu pirats

***

dadzynuoju papeira lidmašynys i svīžu pa lūgu
varbyut sābrim byus vaļā lūgi
aiz vysu lūgu ekrani
aiz vysu ekranu lūgi

Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]