Rokstu sagataveja: portals lakuga.lv

Pyrmizruodi pīdzeivuojs Reigys Tehniskuos universitatis tautyskūs deju ansambļa “Vektors” i grupys “Tautumeitys” kūpdorbs – dejis videoklips dzīsmei “Brosnej, puika, tū dzeršonu”, kas ir stuosts par mīlesteibu, puišu i meitu attīceibom.

Dorbs pi dejis “Brosnej, puika, tū dzeršonu” aizasuocs jau 2020. godā, nu pandemejis deļ tū nav īsadevs paruodeit iz skotivis dieļu, deļtuo oktobrī tautyskūs deju ansambļa “Vektors” doncuotuoji kūpā ar video muokslinīkim Reini Blūmu i Oto Avotu deju īmyužynuojuši atpyutys bāzis “Ratnīki” lelajā sviniešonu pyunē.

Dejis horeografejis autore ir ari “Vektors” vadeituoja Dagmāra Bārbale, kurei par deju soka, ka tymā ļusteigā, emocionalā i rūtaleigā horeografejā izdoncuots latgalīšu tautysdzīsmēs apraksteitais myužeigi senejais i ari aktualais stuosts par pareizuo precinīka izalaseišonu i mīlesteibu, kas pruotam vysā nagryb klauseit.

Dzīsme “Brosnej, puika, tū dzeršonu” a capella versejā tyka īkļauta “Tautumeitu” albumā “Dziesmas no Aulejas”, kas sajieme kai Latgalīšu kulturys goda bolvu “Boņuks 2020”, tai ari Latvejis muzykys īrokstu goda bolvu “Zelta Mikrofons” par lobuokū tautys muzykys albumu, nu dejis vajadzeibom grupys “Tautumeitys” dalinīki – Asnate Rancāne, Aurēlija Rancāne, Ilona Dzērve, Laura Marta Līcīte, Laura Vārpiņa, Mārtiņš Milevskis, Stanislavs Judins i Elvis Lintiņš – radejuši jaunu verseju, kurū papyldynoj boguots instrumentalais skaniejums.

Grupys “Tautumeitys” daleibneica Asnate ir prīceiga, ka, pasasokūt ari itaidai “Vektors” iniciativai i jaunai dzīsmis aranžejai, turpynojās Aulejis dzīšmu populariziešona.