Vusi vosaras ziernekli nūsleikuši rudens okā

Vusi vosaras ziernekli nūsleikuši rudens okā

Annele Slišāne par sovim dzejūlim soka, ka tei ir dīnysgruomota – taids kai laika ritiejums nu pavasara da rudiņa. Annele roksta izlūksnē. Kab napagaisynuot Zīmeļlatgolys volūdys kolorita i pīduovuotu īspieju saleidzynuot, publicejam Annelis raksteitū ari myusdīnu latgalīšu volūdys pareizraksteibā. Sarunu ar Anneli var skaiteit ITE.

Naguoju vīnkuorši garuom
Beju vydā

Pa nakti sasals
Lynu muorkam vuoks
Ir marts

Zeme kolst
Dyumaka
vusapleik
 
Leist
Ir pavasars
I Dīva duga
 
Saule vīnā pusie
Pylnīs mieness ūtrejā
Es pa vydu ai akmini rūkuos
I ai putnīm motūs

Uobelnīcas i zemenes sastuodietas
Zierni sasāti
Jauns mieness i jauna maize
Vokarā stuodu sovu indiaņu duorza vogu
Puori lidoj krauklis
Kotru pavasari pasaule rūnuos
Nu jauna

Zīd īvas
Lynu muorku krostūs
Leist
Palākīm muokiunīm
Pīneņu pļovuos

Piec līta ituoda
Var otkon suoktīs
Vosara

Zīd cerini Zeļčūs
Muokiuni bolti
Jov juns

Vosara
Vuss zīd
Pasauļa audaklūs

Lyls viejs
Nūmozgovu lūgus
Vīna pate

Īsuokam augustu
Soldanīm uobulīm
I maizi

Vosaras atmines
Pavusam saulainas
Viel tān

kuodi ļauds
tuoda mygla
i iudens okā

Škiergots rūkā
Kārmanā vardivs zalīs
Nu lynu muorka
Meža bits kalošā
Mastinkā suņu siens
Ituods rudens
Apleik i manie
Motūs putni
I ūša lopas

Uobuli sapyust uobelnīcuos Nanūkrytuši zemie
Izzeistīm cičīm
Nagulejuse
Kuo vacu trauku lupatu
Izsvīžu sevi māslu čupā

Savuoreju putras
Sacepu buļbu
Nūmozgovu lūgus
Izberžu ustabu
Siedu stuovūs
I aužu

Tuoda dīna
Nu reita da vokara
Pavusam vīna

Sprostai
Tuodai vīnai dzeivuot te
Ai roganuom
I valnīm rejas kruosnie
So ustabas aukšā
Vacyns kuortoj montas
Gryusta teini
Puorcyloj lupatas
I vacū zuodži
Tys nikas
Ka sen jov mirs

Davasta
Nūvasta
Pīsīta pi plitas
Capu bleiņus
Beržu nateirūs kraklu i zeču
Slauku ustabu
Pļaunu zādorklu
Nūslauku pūrduļu
A pruotā aužu gobelenu
Sengrīķu kanonu nīdres skotā
Zalīs, syunu zalīs i zuoles zalīs
Sazalīk kuortuom
Vīns aukšā, vīns apukšā
Vīna kuorta piec kuortas
Vīnkuortnie
Nūslauku pūrduļu
Padzīdu i saleju bleiņu
Skovrūdā malnā

Vusi vosaras ziernekli
Nūsleikuši rudens okā
Nu reita vīnu
Vokarā izdzeru divejas kuojas
Ar opalū vādaru aizareju
Naguoju vīnkuorši garum
Beju vydā

Pa nakti sasaļs
Lynu muorkam vuoks
Ir marts

Zeme kolst
Dyumaka
vysapleik

Leist
Ir pavasars
I Dīva duga
 
Saule vīnā pusē
Pylnais mieness ūtrajā
Es pa vydu ar akmini rūkuos
I ar putnim motūs

Uobeļneicys i zeminis sastuodeitys
Zierni sasāti
Jauns mieness i jauna maize
Vokarā stuodu sovu indiaņu duorza vogu
Puori lidoj krauklis
Kotru pavasari pasauļs rūnās
Nu jauna

Zīd īvys
Lynu muorku krostūs
Leist
Palākim muokiunim
Pīneņu pļovuos
 
Piec līta itaida
Var otkon suoktīs
Vosora

Zīd beseni Zeļčūs
Muokiuni bolti
Jau juņs

Vosora
Vyss zīd
Pasauļa audaklūs

Lels viejs
Nūmozguoju lūgus
Vīna poša

Īsuocam augustu
Soldonim uobulim
I maizi

Vosorys atminis
Pavysam saulainys
Vēļ tān

kaidi ļauds
taida mygla
i iudiņs okā

Škierzlots rūkā
Kārmynā vardive zaļuo
Nu lynu muorka
Meža bits kalošā
Mastinkā suņu sieņs
Itaids rudiņs
Apleik i manī
Motūs putni
I ūša lopys

Uobuli sapyust uobeļneicuos
Nanūkrytuši zemē
Izzeistim cičim
Naguliejuse
Kai vacu trauku lupatu
Izsvīžu sevi māslu skaudzē
 
Savuoreju putrys
Sacepu buļbu
Nūmozguoju lūgus
Izberžu ustobu
Siežu stuovūs
I aužu

Taida dīna
Nu reita da vokara
Pavysam vīna

Sprostai
Taidai vīnai dzeivuot te
Ar rogonom
I valnim rejis kruosnē
Vys ustobys viersā
Dzedeņš kuortoj montys
Gryusta skreini
Puorcyloj lupatys
I vacū zuodži
Tys nikas
Ka seņ jau mirs

Davasta
Nūvasta
Pīsīta pi plitys
Capu bleinus
Beržu nateirūs kraklus i zečis
Slauku ustobu
Pļaunu dīnduorzu
Nūslauku pūrduli
A pruotā aužu gobelenu
Seņgreku kanonu nīdris skotā
Zaļais, syunu zaļais i zuolis zaļais Sasalīk kuortom
Vīns viersā, vīns zamaškā
Vīna kuorta piec kuortys
Vīnkuortnē
Nūslauku pūrduli
Padzīžu i saleju bleinu
Skaurodā malnā

Vysi vosorys ziernekli
Nūsleikuši rudiņa okā
Nu reita vīnu
Vokorā izdzeru divejis kuojis
Ar opolū vādaru aizareju
Print Friendly, PDF & Email

Nūtikšonu kalendars

Dec
4
Sai
14:00 Dzejis festivals “Prima Vista” @ Ciesis, tīšsaiste
Dzejis festivals “Prima Vista” @ Ciesis, tīšsaiste
Dec 4 @ 14:00 – 23:00
Dzejis festivals "Prima Vista" @ Ciesis, tīšsaiste
“Prima Vista” ir storpautiskys literaturys i dzejis festivals, tys kotru godu nūteik Igaunejā, Tartu. Ituo gods festivala programu ar golvonū temu “Mozais pasauļs” (Mazā pasaule) 4. decembrī prezentēs ari Ciesīs. Dzejnīku i muokslinīku vydā byus[...]
17:00 “Gūdi” Upītē @ Namaterialuos kulturys centrs "Upīte"
“Gūdi” Upītē @ Namaterialuos kulturys centrs "Upīte"
Dec 4 @ 17:00 – 18:00
"Gūdi" Upītē @ Namaterialuos kulturys centrs "Upīte"
Ituo goda 4. decembrī Namaterialuos kulturys montuojuma centrā “Upīte” byus Namaterialuos kulturys montuojuma svātki “Gūdi”, kurūs sveiks i gūdynuos cylvākus, kas atbolsta i veicynoj “Upītes kulturtelpu”. Taipoš byus ari starpdisciplinars koncerts ar vairuoku muziku apvīnuojumu[...]
19:00 Grupys “Baltie lāči” koncertprog... @ Jelgavys Kulturys noms
Grupys “Baltie lāči” koncertprog... @ Jelgavys Kulturys noms
Dec 4 @ 19:00
Grupys “Baltie lāči” koncertprograma “Tirgus stāsti” @ Jelgavys Kulturys noms
Grupa “Baltie lāči” aicynoj iz jaunu koncertprogramu “Tirgus stāsti”. Itymā naparostajā tiergā ir vareiba saklauseit i izjust vysu, kū sirds gryb – gon dzīsmis i dzeju, gon smīklus i osorys. Ar dzīsmem i dzeju izdaiļuots,[...]
Dec
7
Ūtr
22:05 Ilzis Spergys kruojuma “Dzeiveib... @ Latvejis Radejis 1 eters
Ilzis Spergys kruojuma “Dzeiveib... @ Latvejis Radejis 1 eters
Dec 7 @ 22:05
Ilzis Spergys kruojuma "Dzeiveiba" radejis lasejumi - "Marabeju kolns" @ Latvejis Radejis 1 eters
Nu 7. da 11. decembra, kotru vokoru 22.05 Latvejis Radejis 1 eterā izskanēs pyrmī radejis lasejumi latgaliski – Ilzis Spergys kruojuma “Dzeiveiba” stuosti. Radejis lasejumu muokslinīcyskais vadeituojs ir Kristaps Rasims, bet stuostu klausamuos versejis golvonais[...]
Dec
8
Tre
22:05 Ilzis Spergys kruojuma “Dzeiveib... @ Latvejis Radejis 1 eters
Ilzis Spergys kruojuma “Dzeiveib... @ Latvejis Radejis 1 eters
Dec 8 @ 22:05
Ilzis Spergys kruojuma "Dzeiveiba" radejis lasejumi - "Puika mežā" @ Latvejis Radejis 1 eters
Nu 7. da 11. decembra, kotru vokoru 22.05 Latvejis Radejis 1 eterā izskanēs pyrmī radejis lasejumi latgaliski – Ilzis Spergys kruojuma “Dzeiveiba” stuosti. Radejis lasejumu muokslinīcyskais vadeituojs ir Kristaps Rasims, bet stuostu klausamuos versejis golvonais[...]