Rokstu sagataveja: portals lakuga.lv

Itūnedeļ Portugalē, Porto, nūteik leluokais pasauļa muzykys forums WOMEX, kurymā jau 16. reizi ir ari Latvejis stends, kurū organizej Latvejis Muzykys informacejis centrs (LMIC). Jau par tradiceju sadarbeibā ar nacionalū īrokstu kompaneju “Skani” itam forumam ir īsazeimiejuse ari Latvejis etniskuos muzykys izlasis “Native. Music. Traditional/Folk/World-music Latvia” izdūšona.

Jaunajā etniskuos muzykys izlasē apkūpuoti 12 dažaidu muziķu, grupu voi apvīneibu 23 skaņdorbi, kurī topuši pādejā laikā i veidoj ituo breiža Latvejis etnomuzykys ainu: nu autentiskūs dzīduojumu da ceļuotuoju īdvesmuotom fantazejom par latvīšim Kubā. Vysu skaņdorbu vydā īkļautys grupys “Muosys” dzīsmis “Gūteņ, muna raibaleite” i “Zynu, zynu tāva sātu” nu tūpūšuo albuma, folklorys kūpys “Ceiruleits” dzīsmis “Es nagōju krystabōs” i “Vysu mežu izstaigōju” nu albuma “Skaņu balseņu palaidu”, etnomuzykys grupys “Tautumeitas” dzīsme “Ūzals ūzals, bārzsi, bārzsi” nu albuma “Dziesmas no Aulejas”, grupys “Laiksne” dzīsmis “Zīdi, zīdi” i “Jaizalaida man sauleite” nu tikū izguojušuo albuma “Ko zinu gaidīt”, tradicionaluos dzīduošonys grupys “Saucējas” dzīsme “Kur, Jumeiti, tu gulieji” nu albuma “Dabā”, kai ari bungu i dūdu grupys “Auļi” skaņdorbs “Kōrklu polka” nu albuma “Visapkārt”.

Itei izlase pasauļa muzykys foruma WOMEX, kurs nūteik jau 27 godus i kurymā sasateik gondreiž treis tyukstūšys muziķu, izdevieju, producentu, muzykys žurnalistu, festivalu organizātuoju i cytu muzykys industrejis puorstuovu nu vysa pasauļa, stendā kolpoj kai Latvejis vizitkarte. Muzykys izlasis koncepcejis autore ir etnomuzykologe Lauma Bērza, izlase izīt ar Vaļsts kulturkapitala fonda atbolstu.

Latvejis etniskuos muzykys izlasi “Native. Music. Traditional/Folk/World-music Latvia” var nūsaklauseit ari muzykys straumiešonys vītnē “Spotify”, bet vaira izzynuot ITE.