Projekta #100dečiLatvijai stuosti niu ari taktilā, klausomā i zeimu volūdys formatā

Projekta #100dečiLatvijai stuosti niu ari taktilā, klausomā i zeimu volūdys formatā

Rokstu sagataveja: portals lakuga.lv

Tekstilmuokslineicys i literatis Annelis Slišānis projekta “#100dečiLatvijai” stuosti, kas izstuodis i gruomotys formā beja veļtejums Latvejai 100. dzimšonys dīnā, itūgod, kab byutu daīmami vēļ leluokam cylvāku lūkam, turpynoj byušonu jaunūs formatūs – stuosti video formatā īraksteiti zeimu volūdā, puortapuši klausomgruomotā i tykuši par pyrmū gruomotu latgaliski, kas izdūta Braila rokstā.

Septembra golā Storptautyskajā nadzierdeigūs nedeļā 2021 prezentaceju pīdzeivuoja “#100dečiLatvijai” videogruomota zeimu volūdā. Tymā zeimu volūdā īraksteiti vysi symts Annelis Slišānis deču stuosti, video niu nūsaverami ari projekta sātyslopā http://100decilatvijai.lv.

Oktobra vydā prezentāta pyrmuo Braila rokstā izdūtuo gruomota latgaliski, kuruo topuse, sasadorbojūt ar Latvejis Naredzeigūs biblioteku. Da ituo Braila rokstā izdūtajuos gruomotuos latgaliski leluokais bejuši viņ puora teikumu. Gruomota izdūta pīcūs eksemplarūs, kotrys divejūs bīzūs siejumūs, kurūs papyldynoj ari desmit deču taktiluos ilustracejis. Ideja par deču stuostu daīmameibu ari naredzeigim cylvākim Annelei roduos, uzklausūt deču izstuožu reikuotuoju pīredzi, ka izstuožu apmaklātuojim gribējīs dečus aptausteit, dasadūrt, sajust ar tausti. Niu tekstilmuokslineicai ir dūma taktilūs ilustraceju mini formata veidā izaust vysus symts dečus i sataiseit piļneigu kruojumu.

Karteņā: Annele Slišāne i Braila rokstā izdūtī “#100dečiLatvijai”

Niu, oktobra golā, deču stuosti, Annelei sasadorbojūt ar Latvejis Radejis Latgolys studeju, pīdzeivoj ari klausomgruomotys publiskuošonu – suocūt nu šudinis, 29. oktobra, kotru nedeļu publiciešonu pīdzeivuos desmit deču stuosti, kurūs īrunuojuse poša Annele. Deču stuostus varēs nūsaklauseit Latvejis Radejis sātyslopā ITE i popularuokajuos raidīrokstu straumiešonys platformuos.

Nu novembra symts deču stuosti projekta sātyslopā i YouTube kanalā byus daīmami ari kai skotamgruomota – audio stuostus papyldynuos video materials, kurā varēs vērtīs deču tapšonys procesu – kai Annele auž, vuoc augus voi ari radzams pats aužomais materials.

Annelis Slišānis tekstilmuokslys projekts “#100dečiLatvijai” ir personeiga duovona Latvejis symtgadē. 100 nedeļuos stuovūs nūausti 100 deči – kotrys nu cytaida materiala – nu puču, nu naapstruoduotu augu stībru, nu dažaidu augu, dzeivinīku i muoksleigūs tekstilškīdru, kotram kluotyn sovs stuosts. Pyrmū deči Annele nūaude 2016. goda 21. augustā Zeļčūs. Nūaustī deči vēļ arviņ ceļoj pa dažaidom Latvejis vītom, bet iz kotru Latvejis dzimšonys dīnu Annele turpynoj aust jaunu deči – itūgod tys byus jau 103. piec skaita. Par projektu “#100dečiLatvijai” Annele Slišāne sajiemuse ari Latgalīšu kulturys goda bolvu “Boņuks”.

Projekta “#100dečiLatvijai” puortapšonu jaunūs formatūs atbolsta Latvejis Republikys Kulturys ministreja i Vaļsts kulturkapitala fonda mierkprograma “KultūrELPA”.

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
31
Pyr
22:00 Referatu pīsaceišona Latgolys ko... @ Tīšsaistē
Referatu pīsaceišona Latgolys ko... @ Tīšsaistē
Jan 31 @ 22:00
Referatu pīsaceišona Latgolys kongresam @ Tīšsaistē
2022. gods 31. janvars ir pādejuo dīna, kod 27.-29. aprelī nūteikūšajam Latgolys kongresam var pīsaceit sovus referatus. Kongresa tema – “Latgaliskuma kods Eiropā: nu volūdys da ekonomikai”. Aicynuojums pīsadaleit kongresā (ar referatu voi stenda referatu) ITE.[...]