Grupai “Laiksne” izguojs sastais albums “Ko zinu gaidīt”, kurā ari četrys dzīsmis latgaliski

Grupai “Laiksne” izguojs sastais albums “Ko zinu gaidīt”, kurā ari četrys dzīsmis latgaliski

Roksta autors: portals lakuga.lv

Myusdīnu tautys muzykys grupa “Laiksne” klauseituojim pīduovoj sastū albumu “Ko zinu gaidīt”, kurā var dzierdēt ari četrys dzīsmis latgaliski. Grupa atkluoj, ka albumu auklejuse treis godus.

Grupa “Laiksne” izaveiduoja 90. godu suokumā Reigā, juos nūsaukums ir jimts nu Latgolys apvydvuorda “laiksne”, kas nūzeimoj iudiņsrūzi. Kolektiva repertuarā ir vairuokys tolku i kuozu dzīsmis, postfolklorys dzīsmis i Latgolys tradicionaluos sīvīšu dzīsmis.

Pārnejuo goda augustā grupa izlaide singlu “Dzīžu, dzīžu vīna pate”, kas niu ir īkļauts ari tuos jaunuokajā albumā “Ko zinu gaidīt” kūpā ar vēļ treis dzīsmem latgaliski – “Jaizalaide maņ sauleite”, “Zīdi, zīdi” i “Leigoj pologs”. Itys ir grupys sastais albums, bet divejis nu latgaliskūs dzīšmu īkļautys ari tikū izdūtajā Latvejis etniskuos muzykys izlasē “Native Music 16”. Vaira ITE.

Grupys dalineica Baiba Indrēvica par albumu stuosta tai: “Dūma par albumu roduos, kod “Laiksne” gaideja sovu 25 godu jubileju. Pamozam suocem koč kū “čubynuot”, bet, jamūt vārā tānejū situaceju, vyss īsavylka. Albuma dūma ir aizvest leidza nu kasdīnys sadzeivis caur dzīsmi i pozitivom emocejom. Mes pīdzymstam kur nu kurais, dzeivojom tai, kai Laimis muote tū ir nūlykuse, augam par lelim cylvākim ar vysim sovim nadorbim, bierneibys pīdzeivuojumim, izjiutom, īīmam jauneibā i meitys kuortā ar dorbim, kas jai dasaīt, tod mes asam preceibu vacumā, albumā ir ari dažys preceibu dzīsmis. “Laiksnis” pyrmsuokumūs grupā dorbuojuos Pēteris Ērglis, kurs tūlaik vuicejuos par dirigentu, bet jam interesēja tautys muzyka. Dažys nu itūs dzīšmu ir Pētera atrostys i montuojumā pamastys, lykom golvys kūpā, radejom aranžejumus i ituobreiža skaniejumu.”

Niu grupā nav nivīna latgalīšu izceļsmis dalinīka, tok Baiba soka, ka kotrā “Laiksnis” diskā ir pa dzīsmei latgaliski. “Itei puse ir mums tyva, Latgolā ir šmukys dzīsmis, eipaši kuozu dzīsmis. Lai atlaiž volūdys specialisti, mes asam vuicejušīs nu teicieju, nu īrokstu i lykuši itū volūdu kai puzleiti,” pīzeist Baiba.

Vaira par grupu “Laiksne” var skaiteit ITE.

Print Friendly, PDF & Email

Nūtikšonu kalendars

May
20
Pīk
19:00 Artura Skuteļa lelkoncerts “Jā” @ koncertzale "Palladium"
Artura Skuteļa lelkoncerts “Jā” @ koncertzale "Palladium"
May 20 @ 19:00 – 22:00
20. majā Reigā, koncertzalē “Palladium” nūtiks latvīšu hip-hopa muzika Artura Skuteļa lelkoncerts i jaunuo albuma “Jā” prezentaceja. Kai lelkoncerta eipašuo gaška ar sovu soloprogramu iz skotuvis kuops ari latgalīšu repere Ūga, kuruos 2020. godā izdūtais[...]