Jaunais Anitys Bērzinis i Dacis Tihovskys duets prezeņtej pyrmū dzīsmi

Jaunais Anitys Bērzinis i Dacis Tihovskys duets prezeņtej pyrmū dzīsmi

Rokstu sagataveja: portals lakuga.lv

Jaunā duetā apsavīnuojušys Latgolā labi zynomu muzykys apvīneibu dalineicys Dace Tihovska i Anita Bērziņa, pīduovojūt pyrmū dueta dzīsmi “Ilgu zeme”, portalu lakuga.lv informej Dace Tihovska.

Dace Tihovska, kurei zynoma kai dzīdūšuos Tihovsku saimis i folklorys kūpys “Iļža” dalineica, i Anita Bērziņa atpazeistama kai grupys “Latgales dāmu pops” dzīduotuoja i dzīšmu autore ir pazeistamys nu 1989. goda, kod obejis sasatyka kaidā vosorys nūmetnē školānim Jiurmolā i tī kūpā uzastuoja, dzīdūt latvīšu tautysdzīsmis, turistu grupai nu ASV. Niu obejis otkon piec daudzu godu sasatikušys, kab kūpā sadzīduotu.

Karteņā: Dace i Anita 1989. godā Jiurmolā (foto nu Anitys Bērzinis privatuo arhiva) i ituo gods vosorā Ludzā (foto Daiga Kalniņa)

Dace stuosta, ka Anitai beidzēs īprīskejuos muzykaluos gaitys, nu kai rodūšam cylvākam vys tik gribīs kū ta dareit. Jau īprīšk Tihovsku saimei beja pīduovuota dzīsme “Latvejs skaņ” jaunā aranžejā, kū sovulaik dzīduojs “Latgales dāmu pops”, a tod piečuok ari dzīduošona duetā. Dace pīkrytuse, nu gribiejuse, kab sasadzīduošona byutu kaidā patriotiskā dzīsmē. Jaunuo dueta pyrmuo dzīsme ir “Ilgu zeme”, kurys muzykys autore ir Anita Bērziņa, aranžeju taisejs Gints Stankevičs, bet dzīsmis vuordūs skaņ Fraņča Murāna dzeja. Tys Daci cīši īprīcynuojs, jo jei beja izzynuojuse, ka Murāns sovulaik struoduojs Ludzys piļsātys gimnazejā, i reizē ari asūt gribiešona otkon aktualizēt kaidus damierstus autorus, kū myusdīnuos varbyut vaira i ļauds nazyna.

Reizē ar jaunū dzīsmi pyrmizruode saīt Daigys Kalninis taiseitai foto filmai, kurymā īmyužynuoti obeju dzīduotuoju ituos vosorys pīdzeivuojumi Ludzā, Jākubpilī i cytuos vītuos. Planavuots, ka Daigai byus ari personalizstuode. Dueta dalineicys par sevi soka, ka Dace ir sapņaini romantiska, bet Anita trokuleiga, nu obejom cīši pateik ceļuot. Deļtuo itūvosor, braucūt ar “Harley Davidson” mocikletim, obejis vāruojušys Latveju i ituos breineiguos sajiutys niu skaņ ari dzīsmē – mīlesteiba iz Tāvu zemi, muotis volūdu i ticeibu Dīvam. Mocikletu izvēli Dace komeņtej: “Seņuok daudzi brauce ar zirdzenim, guoja kuojom, bet mes simboliski izavēlējom harlejus.”

Dzīduotuojis ar dzīsmi i foto kinu īdrūsynoj ari klauseituojus, ka nikod nikas nav par vālu – duovuot dzeivisprīcu, mīlesteibu, byut laimeigam i suokt koč kū jaunu!

Jaunuo dueta gaitom leidza var sekuot socialuo teikla “Facebook” profilā Anita Bērziņa un Dace Tihovska.

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Oct
1
Sai
vysu dīnu Izstuode “Jura Gaigala akvareļi” @ Latgolys Kulturviesturis muzejs
Izstuode “Jura Gaigala akvareļi” @ Latgolys Kulturviesturis muzejs
Oct 1 vysu dīnu
Nu 21. septembra da 1. oktobra Latgolys Kulturviesturis muzejā apsaverama izstuode “Jura Gaigala akvareļi”. Ceļojūšuo izstuode veļteita gruomotys “Jura Gaigala varavīksne” izīšonys svātkim. Tiks izstuodeitys muokslinīka akvareļgleznys nu meitys Dacis Gaigalys kolekcejis.