Rokstu sagataveja: portals lakuga.lv

2020. goda muokslys filma “Piļsāta pi upis”, kurā stuosteits par maļavuotuoju Aņsi i vairuokom varom, kurom filmys varūni īt cauri, niu ir iztulkuota lītaunīku volūdā, i Latvejis Republikys proklamiešonys dīnā 18. novembrī pīdzeivuos pyrmizruodi Lītovā, Viļnis kinuteatrī Paupio “Pasaka“.

“Piļsāta pi upis”, kas ir čehu, lītaunīku i latvīšu kūpdorbs, ir dabuojuse četrys Leluo Kristapa bolvys, tū ir bejs vareiba redzēt iz ekranim na tikai Latvejā, bet ari Amerikā i cytur. Niu “Piļsāta pi upis” aba “Miestas prie upės” byus nūsaverama ari Lītovā.

Filmys leidzproducentsKęstutis Drazdauskas uzskota, ka ir cīši svareigi ruodeit filmu ari Lītovā, tai kai daļa rodūšuos komandys, par pīmāru, kostimu dizainere Agnė Rimkutė, komponiste Justė Janulytė i akteri Juozas Budraitis i Aidas Jurgaitis, ir nu Lītovys. Tī filmātys ari dažys “Piļsāta pi upis” ainys.

“Filmys stuosts ir cīši leidzeigs Lītovys viesturei, filmys nūtykumi taipoš varātu nūtikt ari Lītovā,” atzeist Kęstutis. “Runojūt par pyrmizruodi, mums beja svareigi izruodeit solidaritati sovim sābrim latvīšim i atguodynuot par viesturi i nūtykumim, kas beja na tik seņ. Deļtuo ARTBOX, Lītaunīku producentu kompaneja, nūlēme filmu lītaunīku volūdā ruodeit 18. novembrī – Latvejis Republikys proklamiešonys godadīnā,” stuosta K. Drazdauskas.

Nu 19. novembra filma byus nūsaverama kinuteatrūs vysā Lītuvā.

Filmys dzeivei Lītuvā sekuot leidza var ITE.

Taipat šudiņ, 18. novembrī, desmit stuņdēs i divdesmit minutūs vokora “Piļsāta pi upis” byus vareiba nūsavērt arī Latvejis Televizejis pyrmajā kanalā. Vaira ITE.