Rokstu sagataveja: portals lakuga.lv

Portals lakuga.lv video raidejumā “Kulturys viests” turpynoj viesteit par latgaliskuos kulturys procesim, pīduovojūt īsavieršonu oktobra nūtikšonuos. Jaunuokajā raidejumā par projekta #100dečiLatvijai dažaidajim formatim, romana “Bruoli” izīšonu lītuviski, pyrmū plānuotuoju latgaliski “Giut breidi”, Ontona Skryndys atguoduošonu 140. jubilejā, jaunumim muzykā i cytom viestim.

Raidejumā par nūtikšonom 2021. goda oktobrī:

• Rakstnīka Alda Bukša 2020. goda golā izdūtais kriminalromans “Bruoli” niu izguojs ari lītuvīšu volūdā;
• Pyrmizruodi pīdzeivuojs Reigys Tehniskuos universitatis tautyskūs deju ansambļa “Vektors” i grupys “Tautumeitys” kūpdorbs – dejis videoklips dzīsmei “Brosnej, puika, tū dzeršonu”;
• Projekts #100dečiLatvijai tykuši par pyrmū Braila rokstā izdūtū gruomotu latgaliski;
• Igauņu saimei izguojs jaunais albums “Tu munā sirsneņā”;
• Pyrmais plānuotuojs latgaliski – “Giut breidi”;
• Postfolklorys grupys “Rikši” dalinīkam Mārcim Lipskim i grupys “Dabasu durovys” dalinīkam Arņam Slobožaninam kūpeiga dzīsme “Dīna bez gola”;
• Tradicionalī saļmu i bēru dzīduojumi Stiernīnē īkļauti Nacionalajā namaterialuos kulturys montuojuma sarokstā;
• Grupai “Fak’n’Turīs” debeja singls “Izlaidums”;
• 140. dzimšonys dīnā atguodojam pyrmuos pošu latgalīšu izdūtuos gramatikys autoru Ontonu Skryndu.

Itys ir sastais i nūslādzūšais nu itūgod planavuotūs sešu video raidejumu par latgaliskuos kulturys nūtikšonom. Raidejuma vadeituojs ir kinys “Piļsāta pi upis” golvonuos, Aņša lūmys atveiduotuojs Dāvis Suharevskis, video operators i montažys režisors Sergejs Čakāns, bet par video saturu pasaryupej portala lakuga.lv redakceja.

Video raidejuma sastū laidīni varēs nūsavērt ari TV4 eterā.

Kulturys ziņu eistynuošona ir projekta “Latgaliskā kultūrtelpa: problēmas, analīze, atspoguļojums portālā lakuga.lv” daļa, tū finaņsej Medeju atbolsta fonds nu Latvejis vaļsts budžeta leidzekļu. Par raidejuma saturu atbiļd latgalīšu kulturys ziņu portals lakuga.lv.

Portala lakuga.lv komanda soka paļdis par atsauceibu i atbolstu ziņu sataiseišonā raidejuma vadeituojam Dāvim Suharevskim, video operatoram i montažys režisoram Sergejam Čakānam, grafiku veiduotuojam Krišjānim Pleiko (Upes kinostudija) i Ivo Grigalim nu grupys “Latgalīšu Reps” par atļuovi izmontuot grupys dzīsmis “Muna dīna” fragmentu raidejuma dasacejumā.