Upītē ūtrū reizi gūdynuos “Upītis kulturtelpai” tyvus cylvākus
Rokstu sagataveja: portals lakuga.lv
Ituogods 4. decembrī 17.00 stuņdēs Upītē jau ūtru reizi nūtiks “Gūdi” aba Namaterialuos kulturys montuojuma svātki, kurūs gūdynuos i sveiks cylvākus, kas ir paleidziejuši atteisteit i veicynuot, boguotynuot namaterialuos kulturys i Upītis kulturtelpys atteisteibu.
Kulturys darbinīks i Namaterialuos kulturys centra “Upīte” direktors Andris Slišāns stuosta, ka ideja par taidim svātkim rodusēs 2018. godā, kod “Upītes kultūrtelpa” tyka īkļauta Nacionalajā Namaterialuos kulturys montuojuma sarokstā kai vīna nu nacionalūs vierteibu. “2019. godā par gūdu itai nūtikšonai reikuojom Namaterialuos kulturys montuojuma svātkus, kurūs mes, Namaterialuos kulturys montuojuma centrs “Upīte”, sacejom paļdis cylvākim, kas vysu myužu kūp kulturu, muoca cytus, atbolsta i jiut myusim leidza, atteistūt Namaterialū kulturu i Upītis kulturtelpu,” skaidroj Andris.
Ituogods svātku apmaklātuoji varēs dzierdēt ari sovpateigu koncertu. “Jau pyrmajūs gūdūs izdūmuojom, ka svātkus juotaisa storpdisciplinari – apvīnojūt vysaidus žanrus, tok par pamatu jamūt tradicionalū kulturu. Mes savīnuojom folkloru (folklorys kūpa “Upīte”) ar roku (grupa “Unknown Artist”), pyutieju orkestri (Rēzeknis nūvoda i Juoņa Ivanova Rēzeknis Muzykys vydsškolys orkestris) i popmuzyku (Jānis Aišpurs nu grupys “The Sound Poets”). Tyka radeitys jaunys apdaris, ar kūpeigu dzīsmi “Lai zaļoj jauneiba” 2020. godā uzastuojom Latgalīšu kulturys goda bolvys “Boņuks” padūšonys ceremonejā. Īprīškejūs gūdūs varēja izbaudeit ari Upītis kulinarū montuojumu,” stuosta centra direktors.
Itūgod nūtiks ūtrī gūdi, kas veļteiti “Upītes kultūrtelpai” svareigim i tyvim cylvākim. Andris stuosta, ka svātku pamatdūma palykuse taida poša. “Itūgod līkam kūpā folkloru, džezu, operu, simfoniskū muzyku, steigys i roku.” Gūdūs muzicēs folklorys kūpa “Upīte”, “Ethno+Jazz” aba Jāzepa Vītola Latvejis Muzykys akademejis Džeza muzykys i etnomuzikologejis studenti, Dainis Skutelis, gitarists Rihards Krilovs i grupa “Unknown Artist”. “Byus jauni projekti, aranžejis, tik žāļ, ka navarim sareikuot dančus,” pīzeist Andris. “Gūdus” itūgod vadeis multimuokslineica Evika Muizniece.
