Izdūta Latgolys daņču būrtneica “Vysus dorbus padareju”

Izdūta Latgolys daņču būrtneica “Vysus dorbus padareju”

Rokstu sagataveja: portals lakuga.lv

Bīdreiba “Danču krātuve” publiciejuse leluokū Latvejā doncuotūs daņču e-būrtneicu kolekceju, vīna nu tūs ari Latgolys daņču izlase “Vysus dorbus padareju”, viestej “Danču krātuve” vadeituojs Sandis Zučiks.

Piec vaira nakai pīcu godu pietnīceibys dorba bīdreiba “Danču krātuve” 2021. gods golā publicej pyrmuos četrys daņču būrtneicys: Latgolys daņči, Zemgalis daņči, Kūrzemis daņči i Malīnys daņči. Kotrā nu būrtneicu apkūpuoti 20 daņču, kas teik doncuoti Latvejā, aproksti. Latgolys daņču būrtneicā daņču dzīdamī panti ir kai latvīšu literarajā volūdā, tai latgaliski, Zemgalis būrtneicā kluotyn apkūpuotajom dejom, izmontojūt arhiva materialus, padareits vairuoku mienešu gars daņču rekonstrukceju dorbs. Malīnys daņčus pīraksteituos dejis taiseitys nu arhivūs daīmamajim video, kas filmāti, suocūt nu 20. godu symta 80. godu gola, bet Kūrzemis daņči paruoda dažys ikoniskys latvīšu tautys dejis, par pīmāru, Opolais Mieness – Gūda sūļs.

Vīns nu būrtneicu autoru, Sandis Zučiks, par padareitū soka: “Ar daņču būrtneicom mes gribim sabīdreibai dūt dziļuoku informaceju par daņču kulturu Latvejā. Myusu golvonais mierkis ir saglobuot daņču montuojumu cytom paaudzem i turim nūceju, ka tys Latvejā tiks kūpts tikpat daudzi cik niu ari piec symta godu.”

Dorbs pi daņču montuojuma saglobuošonys ar pyrmūs četru būrtneicu publiciešonu nanūstuos – jau 2022. gods suokumā planavuots sataiseit vēļ treis būrtneicys, kas vaira paradzātys bārnu daņču repertuaram. Itys būrneicu ciklys jau niu ir leluokais Latvejā doncuotūs daņču kulturviesturiskais atspīgeļuojums, vēļ leluoki apkūpuojumi ir viņ daņču melodeju publicātajūs kruojumūs.

Karteņa: Latgolys daņču būrtneica “Vysus dorbus padareju”

Latgolys daņču būrtneicys “Vysus dorbus padareju” autori ir Sandis Zučiks, Daina Kjakste i Raitis Sondors. Būrtneicā apkūpuotys 20 dažaiduos Latgolys puses pīraksteitu daņču nūrisis, izacelšona i olūti. Izdavuma autori pīzeist, ka jim ruodīs, ka Latgolys daņču montuojums ir vīns nu boguotuokūs kai melodeju, tai tekstu i pošu daņču nūrišu ziņā, teik pīļauts, ka pi Latgolys daņčim varātu atsagrīzt vēļ kaidā izdavumā. Itūgod bīdreiba izdeve gruomotu “Vidzemes danči un ne tikai”, bet cytu pavasari gaidoms jauns izdavums cītajūs vuokūs – albums, kas veļteits Latgolys daņčim, tūs īspēlējuse folklorys kūpa “Svātra”.

Daņču būrtneicys bez moksys var dabuot sātyslopā dancukratuve.lv. Latgolys daņču būrtneica daīmama ITE.

Latgolys daņču būrtneicys saturs
Print Friendly, PDF & Email

Kalenders

May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]
19:00 Leluo Latgolys zaļumballe @ Lūznovys muiža
Leluo Latgolys zaļumballe @ Lūznovys muiža
May 25 @ 19:00 – 23:00
Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigi izklaidēs grupa “Stradivari”.   Īīšonys moksa 4,00 eiro.   Biletis “Biļešu paradīzes” kasēs i Lūznovys muižā.