Tīšraidē byus nūsaverams konkursa “Latgolys prozys skaitejumi 2021” nūslāgums

Tīšraidē byus nūsaverams konkursa “Latgolys prozys skaitejumi 2021” nūslāgums

Rokstu sagataveja: portals lakuga.lv

Svātdiņ, 12. decembrī, trejuos stuņdēs piec pušdīņu tīšraidē nu Rēzeknis byus nūsaverams konkursa “Latgolys prozys skaitejumi 2021” nūslāgums, kas ir ari daļa nu storptautyskuo festivala “Prozas lasījumi”.

Kab veicynuot literarū procesu Latgolā, dūdūt vareibu latgalīšu rokstu volūdā voi latvīšu literarajā volūdā rokstūšim autorim satikt leluoku auditoreju i skaiteituojim īpazeit jaunus Latgolys kulturtelpā topušus dorbus, bīdreiba “LgSC” jau ūtrū godu izsludynuoja konkursu “Latgolys prozys skaitejumi 2021”. Konkursā beja aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu. “Latgolys prozys skaitejumūs 2021”, kurūs devize itūgod ir “Pasaulī vyss ir sasapiņs mozgūs”, tyka sajimti 10 dažaidu Latgolys autoru dorbi kai latvīšu literarajā, tai latgalīšu rokstu volūdā, konkursam dorbus īsyutejuši kai Latgolys kulturtelpā jau zynomi autori, tai ari taidi, kurim pīsadaleišona konkursā ir debejis reize.  Īsyuteitūs dorbus viertej žureja pīcu cylvāku sastuovā: rakstneica Laima Kota, dzejneica, publiciste, dramaturge Anna Rancāne, Bolvu Centraluos bibliotekys vadeituoja Ruta Cibule i literaturzynuotneica Maija Burima.

Bīdreibys “LgSC” i “Latgolys prozys skaitejumu 2021” puorstuove Edeite Husare, viertejūt autoru atsauceibu konkursam, soka: “Saleidzynojūt ar konkursa pyrmuo goda nūtikšonu, itūreiz “Latgolys prozys skaitejumim” sajimts gondreiž divejis reizis vaira dorbu. Jo eipaši prīcynoj tys, ka sūpluok jau latgaliskajā i Latgolys literaturā zynomim autorim, konkursam dorbus īsyutejuši cikom mozuok zynomi autori i ari taidi, kurim itei saīt sova veida debeja literaturā. Turim nūceju, ka, nasaverūt iz tū, kaidi byus konkursa rezultati, autori sovūs dorbūs turpynuos pīsavērst ari myusdīneiguos Latgolys temom, veicynojūt Latgolys kulturtelpys literaturys procesus i kvalitati.”

Konkursa nūslāgumā, kas tīšraidē byus nūsaverams 12. decembrī 15.00, ar sovu stuostu skaitejumim pīsadaleis treis vysvaira punktus sajāmušūs dorbu autori, bet tīšraidis vierzeituojs byus myusdīnu latgalīšu literaturai veļteituo raidīroksta “Puslopys” vadeituojs, muzikis Arņs Slobožanins. Latgolys prozys skaitejumu tīšraidei leidza sekuot varēs festivala “Prozas lasījumi” sātyslopā prozaslasijumi.lv i portalā lakuga.lv, kai ari bīdreibys “LgSC” i festivala “Prozas lasījumi” profilūs socialajā teiklā “Facebook”. Konkursa uzvarātuoju dorbus piečuok varēs puorskaiteit i video formatā nūsavērt ari latgalīšu kulturys ziņu portalā lakuga.lv.

 “Latgolys prozys skaitejumi 2021” nūslāguma nūtikšonu taisa bīdreiba “LgSC”, pasuokuma režisore ir Amanda Anusāne, bet konkursa nūtikšonu atbolsta Vaļsts kulturkapitala fonds, festivals “Prozas lasījumi” i literaturys, publicistikys i viesturis žurnals “Domuzīme”.

Print Friendly, PDF & Email

Nūtikšonu kalendars

Jan
28
Pīk
20:00 Latgalīšu kuknei – gods @ tīšsaistē
Latgalīšu kuknei – gods @ tīšsaistē
Jan 28 @ 20:00 – 21:30
Latgalīšu kuknei - gods @ tīšsaistē
Vaira informacejis: Latgalīšu kuknis Facebook lopā
Jan
31
Pyr
22:00 Referatu pīsaceišona Latgolys ko... @ Tīšsaistē
Referatu pīsaceišona Latgolys ko... @ Tīšsaistē
Jan 31 @ 22:00
Referatu pīsaceišona Latgolys kongresam @ Tīšsaistē
2022. gods 31. janvars ir pādejuo dīna, kod 27.-29. aprelī nūteikūšajam Latgolys kongresam var pīsaceit sovus referatus. Kongresa tema – “Latgaliskuma kods Eiropā: nu volūdys da ekonomikai”. Aicynuojums pīsadaleit kongresā (ar referatu voi stenda referatu) ITE.[...]