Rokstu sagataveja: portals lakuga.lv

Namaterialuos kulturas montuojuma centrs “Upīte” izsludynoj Latgolys patriotam i dzejnīkam Ontonam Slišānam veļteitu rodūšūs dorbu konkursu. Da 2022. gods 10. janvara Upītē gaideis vysaidu žanru literarus dorbus i zeimiejumus par tēmu “Kotru godu kaids breinums nūteik…”, konkursa nūslāguma pasuokums i uzvarātuoju apbolvuošona paradzāta 18. janvarī Upītē, informej i rodūšu goru vielej centra direktors Andris Slišāns.

Dzejnīks, rakstnīks, folklorists, nūvadpietnīks i muokslinīks Ontons Slišāns ir Zīmys saulgrīžu bārns, dzims 28. decembrī, bet vuordadīnu svieteja 18. janvarī. Itys laiks Ontonam beja rodūšs laiks, kod jis sovu aktivū darbeibu veļteja Zīmeļlatgolai. Konkursa organizatori aicynoj sajust Ontona Slišāna goru – pīsadoleit rodūšūs dorbu konkursā.

Konkursa mierkis – aplīcynuot pīdareibu i mīleisteibu sovam dzymtajam nūvodam i styprynuot latgaliskū kulturidentitati. Par konkursa īdvesmis olūtu izalaseits Ontona Slišāna dzejūļs “Kotru godu”, juo pyrmuo aile ari ir konkursa dorbu tēma.

Kotru godu
Kotru godu kaids breinums nūteik.
Div teleišus gūteņa atnas.
Treis jiereņi vuškeņai atskrīn.
Visteņa ūlu bez čaulas izdiej.
Zam ūzula zeiļu pībierst kai dečs.
Vacyns puorstuoj peipiet i olu dzert.
Māmeņa seņgaideitu duovonu nūpierk.
Tieteits nu tierga jaunu mašynu atdzan.
Naktī dabasūs kometu radzu.
Sapynā dīnvydu jyuruos maunu.
Kotru godu kaids breinums nūteik –
I es tuo breinuma gaidu.

Vairuok par daleibys nūsacejumim konkursa nūlykumā latgaliski ITE, latvīšu literarajā volūdā ITE. Daleibnīka anketa zamynluodēt ITE.