Rokstu sagataveja: portals lakuga.lv

Izsludynuota kasgadejuo Latgalīšu kulturys goda bolvys “Boņuks” pretendentu dasaceišonu par padareitū 2021. godā, viestej bolvys reikuotuoju, Latgolys viestnīceibys GORS, publicātuo informaceja. Pretendentu dasaceišona īspiejama da 10. janvara. Muola statuetis par padareitū itūgod sajims 11 latgaliskuos kulturys aktivitatis, nūtikšonys, procesi i personeibys. “Boņuks” vys vēļ ir vīneiguo bolva, kura eipaši izceļ i gūdynoj sasnāgumus i padareitū latgaliskuos kulturys dzeivē. Bolvys padūšonys ceremoneja byus 5. martā Latgolys viestnīceibā GORS ar tīšraidi LTV1.

Latgalīšu kulturys goda bolva teik taiseita ar mierki apkūpuot lobuokū īprīkšejā godā padareitū i lobuokūs pasuokumus, gūdynuot aktivuokūs Latgolys kulturys puorstuovus, popularizātuojus, veicynojūt tuoluoku jaunradis i kulturys daudzveideibys atteisteibu. Pretendentus bolvai ari itūreiz var īsnēgt kategorejuos “Volūda. Literatura. Publicistika”, “Aktivitatis. Nūtikšonys. Personeibys” i “Audio. Video”, nu kurūs žureja, izviertejūt pretendentus divejuos kuortuos, izvierzeis 30 nominantus, i nu tūs – 10 bolvys sajiemiejus – aktivitatis, personeibys, nūtikšonys, dorbus, bez kurūs nabyutu īsadūmuojama latgaliskuo kultura 2021. godā. Vīna bolva namaineigai tiks pīškierta par myuža īguļdejumu latgalīšu kulturys atteisteibā. Aizpiļdeitys dasacejuma anketys bolvai “Boņuks 2021” var īsnēgt tīšsaistis dasacejumā, elektroniskā veidā voi pa postu da 2022. goda 10. janvara. Īsnāgtūs dasacejumus izviertēs latgaliskū kulturvidi voi attīceigū bolvys nūzari puorzynojūša žureja vysmoz 30 cylvāku sastuovā. Bolvys pretendenta dasacejuma anketu škārsteiklā var atrast: http://bonuks.lv i http://latgalesgors.lv.

Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnejā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īdviesmis sajimšonys pasuokums. Bolvys “Boņuks 2021” padūšonys ceremoneja paradzāta 2022. goda 5. martā Latgolys viestnīceibā GORS, tei byus radzama tīšraidē LTV1, tok atškireibā nu bolvys “Boņuks 2020” padūšonys ceremonejis 2021. goda martā, itūreiz otkon varēsim sasatikt kluotīnē!  “Boņuks 2021” ceremonejis vadeišona jau ūtrū godu piec kuortys tiks uztycāta komikam Juoņam Skutelim, kuruo dzymtuo puse ir Latgolā – Rēzeknis nūvoda Dekšuorēs.

Ituo gods suokumā Latgalīšu kulturys goda bolvys “Boņuks 2020” sajēme desmit aktivuokuos, spylgtuokuos i leluokū rezonansi dabuojušuos latgaliskuos kulturys nūtikšonys, personeibys, projekti 2020. godā. Bolvys sajēme Aldis Bukšs par pyrmū romanu latgaliski “Bruoli”; Andryva Jūrdža 175. jubileja goda aktivitatis; folklorys kūpa “Upīte” ar aktivitatem, albumu “Padzīdam i…” i videoklipim; grupa “Tautumeitas” ar albumu “Dziesmas no Aulejas” i koncertdarbeibu; izdavums “Muna dzīšmu gruomota”: notu gruomota, koncerts “Dzīšmu gruomota” i latgalīšu dzīšmu stuosti; koncertizvadums “Latgolys freska”; Ontona Kūkuoja 80. jubileja goda nūtikšonys, gruomota “Mīlesteiba. Lelais Līpu kolns” i dzejis izruode “Pa mīlesteibu brīnūt, kuojis nasaļ”; postfolklorys grupa “Rikši” ar koncertdarbeibu, albumu “trīp!” i videoklipim; ŪGA ar albumu “LG ir HH”; Vīsturs Kairišs i kina “Piļsāta pi upis”. Par myuža īguļdejumu latgalīšu kulturys atteisteibā tyka gūdynuots keramiks Voldemārs Voguls.

Latgalīšu kulturys goda bolva “Boņuks” pyrmū reizi tyka padūta 2009. godā, tok nu 2013. goda bolvu reikoj Latgolys viestnīceibys GORS komanda, sasadorbojūt ar bīdreibu “Partitūra”. “Boņuks 2021” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme.