Rokstu sagataveja: portals lakuga.lv

Izguojuši dzejūļu gruomota i digitalais muzykys albums bārnim “Vuškeņa iz pļovys”. Dzejūļu autore ir Ilze Sperga, gruomotys muokslineica Līga Romančuka, bet septenis jaunys dzīsmis ar Ilzis dzeju bārnim saceriejs Kristaps Rasims i īdzīduojuse grupa “Rupuči”, viestej bīdreibys “LgSC” dūtuo informaceja.

Jaunajā dzejūļu gruomotā bārnim, kuruos izdeviejs ir bīdreiba “LgSC”, ir 15 Ilzis Spergys dzejūli, kū papyldynoj kruosainys i meilys Līgys Romančukys ilustracejis. Muokslineicai itei ir debeja bārnu gruomotu ziemiešonā. Gruomotā puorskaitomi dzejūli, kas kai pyrmū reizi publikaceju sovulaik pīdzeivuojuši portalā lakuga.lv, tai ari da ituo vēļ napublicāti Ilzis Spergys dorbi par vuškeņu, zači, ežim, zirdzeņu, visteņu, kači, eņgelim i cytim tālim. Gruomotys “Vuškeņa iz pļovys” redaktore ir Latvejā īmeiļuotuo bārnu gruomotu autore Māra Cielēna, bet dzejūļus i zeimiejumus salykuse kūpā muokslineica Dana Vasiļjeva.

Leidza ar gruomotu izdūta ari digitals muzykys albums bārnim ar taidu pošu nūsaukumu “Vuškeņa iz pļovys”. Tymā dzīšmu formatā puortapuši septeni nu gruomotys dzejūļu. Dzīšmu muzykys autors ir Kristaps Rasims, bet tuos īdzīduojuse grupa “Rupuči”, kurā apsavīnuojuši Kristaps, Ernests i Terēze Rasimi. Albums īraksteits studejā “Reiga”, īrokstā tolkā guojuši ari muziki Zane Dziesma, Deniss Smirnovs i Mārcis Lipskis, bet albumu masteriejs Krišjānis Geidāns. Jaunais muzykys albums bārnim ir daīmama nūsklauseišonai video formatā “YouTube”, kai ari byus publicāta “Spotify” i cytūs popularuokajūs muzykys straumiešonys servisūs. Kotram grybātuojam “YouTube” byus daīmami diveji dzīšmu varianti – dzīduošonai leidza ar grupu “Rupuči” voi pošim viņ ar muzykys pavadejumu.

Jaunuos bārnu dzejūļu gruomotys i muzykys albuma bārnim idejis autore i projekta vadeituoja Edeite Husare atzeist, ka Ilzis Spergys dzejūļu puortapšonys naviņ ilustrātā gruomotā bārnim, nu ari dzīsmēs bārnim īrūsme bejuse gribiešona ari latgaliski radeit nazkū prīceigu, bārnim vīgli uztveramu i leidza dzīdamu – īdviesmis olūts bejuši breineigais “Joka pēc alfabēts” i leidzeigī izdavumi. “Vuškeņa iz pļovys” izdeviejs bīdreiba “LgSC” cer, ka kai gruomota, tai dzīsmis byus vēļ vīns leidzeklis latgalīšu volūdai saimē i ari pyrmškolys voi suokumškolys pūsma izgleiteibys īstuodēs pasaruodeit vaira i bīžuok.

Dzejūļu kruojums i muzykys albums “Vuškeņa iz pļovys” topuši ar Vaļsts kulturkapitala fonda programys “KultūrELPA” finansialu atbolstu.