Upītē atkluos pyrmū latgalīšu izalauzšonys ustobu “Pīci panti”
Rokstu sagataveja: portals lakuga.lv
Ūtardiņ, 28. decembrī, Bolvu nūvoda Upītē slāgtuos školys sātā tiks atkluota pyrmuo i cikom vīneiguo izalauzšonys ustoba-spēle latgaliski. Jaunajai izalauzšonys ustobai dūts nūsaukums “Pīci panti”, tei ir veļteita nūvodpietnīkam, dzejnīkam, folkloristam Ontonam Slišānam (1948–2010) i byus daīmama kotram spēlēt grybātuojam, portalu lakuga.lv informēja Namaterialuos kulturys montuojuma centra direktors Andris Slišāns.
Izalauzšonys ustobā “Pīci panti”, kab nu tuos tiktu uorā, byus juopadora pīci aizdavumi. Kotram aizdavumam ir pīmaklāts kaids Ontona Slišāna dzejūļs, kas vadynoj spālātuoju dūmys vajadzeigajā vierzīnī. “Pīci panti” idejis autors Andris Slišāns par jaunumu Upītē soka: “Myusu izalauzšonys ustobā ir treis lītys, kas tū atškir nu cytu leidzeigu ustobu: vysa pyrma, ite vyss ir latgaliski, ūtrei – ite ir bišu strūps i treša – sova vīta ustobā ir lelajim aužamajim stuovim. Taisūt spēli, gribējom, kab dalinīki koč drupeit īpazeist Ontonu Slišānu, juo aizaraušonys, namaterialū kulturu i, saprūtams, ari latgalīšu volūdu.”
Jaunuos izalauzšonys ustobys “Pīci panti” aizdavumus sastatejs Kristaps Auzāns, kurs sovulaik taisejs ari Imanta Ziedoņa fonda “Viegli” pīduovuotū spēli “Ziedoņa klase” Reigā, kas sajēmuse apbolvuojumu “Kilograms kultūras 2019” kategorejā “Pārsteigums”. Aicynojūt gostūs iz Upīti i īdrūsynojūt spēlēt grybātuojus, izalauzšonys ustobys “Pīci panti” taiseituoji soka, ka spēlei nav vajadzeigys prīškzynuošonys, viņ prasme laseit, īsaklauseit i sasprīst tuoļuokuos reiceibys. Planavuotais ustobys izspēlēšonys laiks ir aptyvai vīna stuņde.
Pi idejis par izalauzšonys ustobu eistynuošonys tolkā guojuši kai Lauku Atbolsta dīnasta LEADER programa ar ustobys remonta projekta atbalsteišonu i Latgolys kulturys programa, kuru eistynoj Vaļsts kulturkapitala fonds, a/s “Latvijas valsts meži” i Latgolys regiona atteisteibys agentura, ar pošys spēlis izstruodis atbolstu.
“Pīci panti” oficialuo atkluošona paradzāta 28. decembrī, taišni Ontona Slišāna dzimšonys dīnā, vīnā stuņdē piec pušdīņu. Kai pyrmuos oficialuos spālātuoju komandys dalinīki paaicynuoti Latvejis Republikys Saeimys deputate Ilga Šuplinska, Bolvu nūvoda vadeituojs Sergejs Maksimovs, latgalīšu kulturys ziņu portala lakuga.lv vadeituoja Edeite Husare, Latgolys Regionaluos televizejis žurnaliste Beatrise Jakobsone, kai ari kaids nu Latvejis Radejis Latgolys studejis jaunīšu raidejuma “Pīci breinumi” puorstuovu.
