Lekceju cyklā runuos par kūka amatnīceibys darynuojumim

Lekceju cyklā runuos par kūka amatnīceibys darynuojumim

Rokstu sagataveja: portals lakuga.lv

Ludzys nūvodā nu pārnejuo goda vosorys teik eistynuots projekts “CraftWays”, niu projekta dalinīki aicynoj iz četru lekceju cyklu, kas byus veļteits kūka tematikai i tam, kas Latgolā, Leitovā i Boltkrīvejā bejs darynuots nu kūka, viestej Ludzys nūvoda pošvaļdeibys publicātuo informaceja. Pyrmuo lekceja paradzāta jau pīktdiņ, 14. janvarī, tū vadeis profesore Janīna Kursīte-Pakule, stuostūt par ornamentim kūka arhitekturā.

Vysys četrys cykla lekcejis nūtiks tīšsaistis platformā “Zoom” pīktdīnem 11.30. Interesenti lekcejom var pīsasaceit ITE. Lekceju cykla dorba volūdys byus latvīšu i krīvu. Pyrmajā lekcejā, kas plānuota pīktdiņ, 14. janvarī, profesore, volūdneica, publiciste, rakstneica, latvīšu literaturzynuotneica i politike Janīna Kursīte-Pakule stuosteis par ornamentim kūka arhitekturā. Ūtrajā lekcejā 21. janvarī Latvejis Universitatis Teologejis fakultatis Bazneicu i religeju viesturis katedrys docents i vodūšais pietnīks, Dr. hist. eccl. Andris Priede vadeis lekceju par ceļamolys krystim (krucifiksim), 28. janvarī Šauļu “Aušros” muzeja direktora vītineica-fondu globuotuoja Odeta Stripinienė stuosteis par bazneickungu i muokslinīku Antanas Rimavičus, bet 4. februarī par lūgu mežginem aba naličnikim stuosteis Latvejis Muokslys akademejis doktorante Anete Ulmane, kuruos pietnīcyskuos interesis saisteitys ar arhitekturys viesturi, kūka arhitekturu i arhitekturys dekorativajim kūkgrīzumim, kai ari Latgolys kūka arhitekturu i ornamentalū motivu migraceju, bet Anita Meinarte nu Latvejis Nacionaluo viesturis muzeja stuosteis par kūka skulpturu kolekceju muzeja kruojumā.

Projektu “Tradicionalūs prasmu saglobuošona i populariziešona jaunūs amatnīku apvuiceibā puorrūbežu sadarbeibā Latvejis, Leitovys i Boltkrīvejis pīrūbeža regionu vydā” aba “CraftWays” (Omotu ceļš) eistynoj Ludzys nūvoda pošvaļdeiba i tymā aktivi īsasaistejuši J. Soikāna Ludzys muokslys školys pedagogi i audziekni. Muokslys školys školāni i skoluotuoji pietej vītejūs muokslys dorbus – ceļamolu krystus. Par Ludzys nūvoda krystim projektā planavuots savuokt fotomaterialus.

Kalenders

Jul
11
Pīk
19:00 Izruode “Mazpiļsāta” @ Saldus Kolnsātys parks
Izruode “Mazpiļsāta” @ Saldus Kolnsātys parks
Jul 11 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Jul
12
Sai
all-day Rāznys Nacionaluo parka Ceļuotuo... @ Rāznys Nacionalais parks
Rāznys Nacionaluo parka Ceļuotuo... @ Rāznys Nacionalais parks
Jul 12 – Jul 13 all-day
Ar pasuokumu programu var īpasazeit ITE.
15:00 Muokslys pikniks @ Lūznovys muiža
Muokslys pikniks @ Lūznovys muiža
Jul 12 @ 15:00 – 22:00
Lūznovys muižys kompleksā i muižys parkā rodūšuma i garšu meistardarbneicys, izruodis, izstuodis, koncerti, pleners i cytys rodūšuos aktivitatis. Muzicēs: Baļtejis muosys (Latveja/Igauneja/Leitova), UZVARAS BULVĀRIS, NIKA GANGA (Leitova), DALUM (Koreja) i vītejuo grupa “Autobuss debesīs”.