Izsludynuota pīsateikšona Latgolys regiona muokslinīku konkursa izstuodei “Nav izņēmums”

Izsludynuota pīsateikšona Latgolys regiona muokslinīku konkursa izstuodei “Nav izņēmums”

Rokstu sagataveja: portals lakuga.lv

Daugovpiļs Marka Rotko muokslys centrs izsludynuojs pīsateikšonu Latgolys regiona muokslinīku konkursa izstuodei, kurei itūgod nūtiks ar saukli “Nav izņēmums”. Kai viestej centra puorstuovi, konkursā var pīsadaleit muokslinīki ar laika periodā nu 2020. da 2022. goda radeitim gleznīceibys, grafikys, tielnīceibys, foto, tekstila, video, instalaceju dorbim i storpmedeju muokslys projektim.

Konkursa uzsaukumā atzeimuots, ka pādejūs godu nūtikšonys ir spūdri īsazeimuojušs sovstarpejū saisteibu, kas globalā mārūgā ītekmej vysus pasauļa īdzeivuotuojus. Itei ītekme ir izapauduse kai ekonomikā, tai politikā, veseleibys apryupē i izjāmums nav ari muokslys pasauļs. Taipat nikaids izjāmums nav ari Latgolys regions, kur muokslys dzeive turpynuojusīs i atsevišku cylvāku rodūšums ir izapauds jaunūs dorbūs. Muokslys pasaulī ari bejuse reakcionara darbeiba, sabīdreibai reagejūt iz myusu dīnu jaunajom normom, šaļtim teik izsvārtys seņ īlaistys problemys, i nikur nav pagaisušys ari myužeiguos, naizsmeļamuos temys i īdviesmis olūti. Ari muokslinīki itam nav izjāmums – raugūt izpaust sovu individualitati, muokslinīks arviņ ir pasauļa daļa, kas dorbojās vīnuotā tālu i izteiksmis leidzekļu sistemā, kur kūpeiga volūda juoatrūn na viņ ar skateituoju, nu ari pošam ar sevi.

Vaicojūt, kaida ir bejuse muokslys i muokslinīka dzeive itymā sovpateigajā laikā, voi rodūšumam tei ir bejuse atpyutys šaļts nu kasdīnys steigys, kab varātum vysā nūsadūt procesam, voi, taišni ūtraiž, jaunais parāds ir radejs gribiešonu osuok reagēt iz apleik nūteikūšū, nūlīkūt molā skrupulozitati i rodūt impulsivus dorbus, Daugovpiļs Marka Rotko muokslys centrs aicynoj Latgolys regiona muokslinīkus dasaceit dorbus, kas raksturuotu pādejūs godu sajiutys, fiksejūt kai puormainis, kas skuorušys kasdīnys dzeivi, tai namaineigys vierteibys, kas godu gaitā vīnoj pasauli kūpeigā muokslys volūdā.

Kab dasasaceitu izstuodei, kurei Daugovpilī byus apsaverama nu 2022. gods 22. apreļa da 26. juņa, juoaizpylda dasacejuma ANKETA i kūpā ar dorbu fotografejom (izškiertspieja 300 dpi) da 2022. goda 20. marta pusnakšu juoīsnādz, syutūt iz rotkocentrs@gmail.com. Izstuodei var dasaceit vīnu, divejus voi treis dorbus.

Īrūbežuojumi muokslys dorbu īsnēgšonā: glazns mozuokais izmārs 60×80 cm (bez viersrama), grafikys lopys ci foto muokslinīki aicynuoti īsnēgt bez ramejuma, keramikys i tielnīceibys dorbim mozuokais vālamais izmārs ir  30x30x30 cm, bez īrūbežuojumu viertiešonai tiks pījimti tekstila, video, instalaceju dorbi i storpmedeju muokslys projekti. Vaira par konkursu Daugovpiļs Marka Rotko muokslys centra sātyslopā.

Print Friendly, PDF & Email