Vēļ tik šudiņ var pīsaceit referatus ituo gods Latgolys kongresam

Vēļ tik šudiņ var pīsaceit referatus ituo gods Latgolys kongresam

Rokstu sagataveja: portals lakuga.lv

Šudiņ, 31. janvarī, ir pādejuo dīna, kab ituo gods aprelī Rēzeknē plānuotajam Latgolys kongresam pīsaceitu referatu kaidā nu kongresa nūtikšonu. Kongresa tema ir “Latgaliskuma kods Eiropā: nu volūdys da ekonomikai”.

Kongresā ar referatim aicynuoti pīsadaleit pietnīki, politiki i vysaidu nūzaru praktiki, kai ari vaļsts instituceju i īstuožu, pošvaļdeibu i navaļstiskūs organizaceju puorstuovi. Jamūt vārā storpdisciplinarūs pietejumu pīaugumu i svareigumu ari Latgolys regiona problemu rysynuošonā, teik gaideiti pīsacejumi, kurī respektej myusu dīnu zynuotnis atteisteibys tendeņcis i padzilinoj sabīdreibys informieteibu i sapratni humanitarajuos (volūdys, kulturviesturis, folkloristikys, literaturzynuotnis), socialajuos (regionaluo ekonomika, demografeja, uzjiemiejdarbeiba, lykumdūšona, drūšeibys vaicuojumi i c.) i inžinerzynuotnēs (vidis, informacejis tehnologejis, byuvnīceibys i c.). Pīsokūt temys i izstruodojūt tezis kongresam, referenti teik aicynuoti nūvērtēt sova referata aktualitati konkretys nūzaris, taipat Latgolys i latgaliskuos ideņtitatis atteisteibys kontekstā Latvejis i Eiropys kulturys, izgleiteibys, tautsaimnīceibys telpā. Aicynojam aktivi īsasaisteit mierktīceigu prīšklykumu izstruodē regiona atteisteibys ceļšonai. Pīteikt sovu referatu Latgolys kongresam var, aizpiļdūt dasacejuma anketu ITE.

Taipat nūtikšonys reikuotuoji, Saīta rezolucejis izpiļdis komiteja, atguodynoj, ka da 10. februara pīsadaleišonai Latgolys kongresā var pīsasaceit delegati, referenti i klauseituoji. Kai viesteja kongresa reikuotuoju puorstuovi, itūšaļt cikom pīsasacejuši drupeit vaira nakai 20 delegatu i klauseituoju. Latgolys kongresa gaitā planavuots, ka sevkurs kongresa dalinīks varēs pīsadaleit i diskusejuos, i “kontaktu biržā”, kur varēs aizdūt vaicuojumus cytim kongresa delegatim voi gostim, atrast jaunus sadarbeibys partnerus, puorrunuot aktualū. Taipat kongresa delegati i klauseituoji tiks aicynuoti aktivi i konstruktivi izasaceit i aizdūt vaicuojumus kluot asūšajim politikim eipašā sesejā.

Vaira par nu 27. da 29. apreļa gaidomuo Latgolys kongresa aktualitatem var izzynuot kongresa sātyslopā https://latgolyskongress.lv.

Pīktdiņ, 28. janvarī, Latvejis Radejis Latgolys multimedeju studejis raidejumā “Latgolys Stuņde” beja vareiba nūsaklauseit sarunu par tū, kaida Latgolys nūvodam, kulturtelpai i volūdai ir bejuse aizvadeituo pīcgade nu īprīškejuo kongresa, kaids nūtykums planavuots itūgod i kaidim byutiskajim vaicuojumim tymā vajadzātu pīsavērst. Raidejumā pīsadaleja Latgolys kongresa Saīta rezolucejis izpiļdis komitejis vadeituojs, zvārynuots advokats Agris Bitāns, Latgolys kongresa Saīta rezolucejis izpiļdis komitejis puorstuove, 13. Saeimys deputate, Latgalīšu kulturys bīdreibys vaļdis lūcekle Ilga Šuplinska, Vladislava Loča fonda leidzdybynuotuojs Harijs Bernāns, bīdreibys “AugšDaugava” vaļdis prīšksādātuojs Juoņs Strods i bīdreibys “Latgales tradicionālās kultūras centrs “Latgaļu sāta”” puorstuovs Dainis Mjartāns.

Print Friendly, PDF & Email

Kalenders

Apr
15
Pyr
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 15 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]