Zynomi bolvys “Boņuks 2021” nominanti

Zynomi bolvys “Boņuks 2021” nominanti

Rokstu sagataveja: portals lakuga.lv

Ir nūsasliedzs žurejis dorbs pi pretendentu dasacejumu izviertiešonys, paziņojūt treisdesmit Latgalīšu kulturys goda bolvys “Boņuks 2021” nominantus, kab jau 5. martā 18.00 stuņdēs aizvadeitu kasgadejū bolvys padūšonys ceremoneju, gūdynojūt desmit pārnejuo goda nūzeimeiguokuos nūtikšonys, aktivitatis i cylvākus latgaliskajā kulturā, kai ari padūtu bolvu par myuža īguļdejumu latgalīšu kulturys atteisteibā, informej Latgolys viestnīceiba GORS. Itūgod bolvys padūšonys ceremoneja nūtiks i ar skateituoju kluotbyušonu Latgolys viestnīceibā GORS, i byus vārojama tīšraidē LTV1.

Itūgod bolvys par aktivitatem, dorbu i sasnāgumim latgaliskajā kulturā tiks padūtys jau četrpadsmytū reizi. Latgalīšu kulturys goda bolvys mierkis vys vēļ ir apkūpuot lobuokū, spylgtuokū i nūzeimeiguokū padareitū i nūtikšonys pārnejā godā latgaliskajā kulturā, gūdynuot aktivuokūs latgalīšu kulturys puorstuovus, popularizātuojus, kai ari veicynuot i rūsynuot jaunradis i kulturys daudzveideibys atteisteibu iz prīšku. “Boņuks 2021“ gūdynuos par snāgumu i padareitū 2021. godā. Kai pretendentu viertiešonys kritereji ir izvierzeiti kai pretendenta snāguma kvalitate, aktivitate vysa goda laikā, regionā, vaļstī voi leluokā mārūgā raiseituo rezonanse, tai latgaliskums i/voi Latgolys kulturys vierteibu nesšona, pretendenta ilgtspieja – ītekme iz latgaliskuos kulturys procesim iz prīšku.

Latgalīšu kulturys goda bolvys “Boņuks 2021” nominanti ir (alfabeta seceibā):

1. #100dečiLatvijai digitalā, taktilā, audio-vizualā i zeimu volūdā
2. 20. atkluotuo latgalīšu rokstu volūdys i kulturviesturis olimpiade i 21. skotivis runys konkurss “Vuolyudzāni”
3. Annelis Slišānis stuostu kruojums “Tuoraga stuosti”
4. Bigmaar’s Records īrokstu studeja
5. Bolvu nūvoda zeime latgaliski
6. Folklorys kūpa “Vīteri” i video stuosts “Teika par Rēzeknes Rozi”
7. Gruomota i muzykys albums bārnim “Vuškeņa iz pļovys”
8. Grupa “Bez PVN” ar albumu “Bezgaleibys”
9. Grupa “Latgalīšu Reps” ar albumu “Cyta dzela” i videoklipim
10. Grupa “Varang Nord” ar albumu “Pārķiuņa uomurs”
11. Igora Pliča i Pētera Korsaka izdavums “Latgales fotogrāfi”
12. Ilzis Spergys stuostu kruojuma “Dzeiveiba” radejis lasejumi
13. Jakob Noiman Festival Band ar albumu “Jezups dejo valsi”
14. Latgalīšu meilys aiļu i dzīšmu festivalam “Upītes Uobeļduorzs” 20 godu jubileja
15. Latgolys Planavuošonys regiona pasuokums “Latgales diena 2021”
16. Latgolys regionaluos televizejis saturs latgaliski
17. Latvejis Storptautyskuo keramikys biennale i Martinsona bolva
18. Literate i redaktore Ilze Sperga
19. Marijis Dzeislys dzejūļu kruojums “Vysta smierts”
20. Myusdīnu latgalīšu literaturys raidīroksts “Puslopys”
21. Navigacejis aplikaceja “Waze” latgaliski
22. Oskara Seiksta eistekstu kruojums “Vokora vuordi draugim”
23. Portals lakuga.lv i latgaliskuos kulturys viests video formatā
24. Postfolklorys grupys “Rikši” desmit godu jubilejis koncerts Latgolys viestnīceibā GORS
25. Pyrmuo izalauzšonys ustoba latgaliski “Pīci panti”
26. Raidejums “Cytaidi latviskais”
27. Režisors Mārtiņš Eihe, Rēzeknis teatris “Joriks” i izruode “Mans kaimiņš ebrejs”
28. Tematiskuo izstuode “Politiķei, pedagoģei un sabiedriskajai darbiniecei V. Seilei 130”
29. Tradicionaluos dzīduošonys grupa “Saucējas” ar izdavumu “Dabā”
30. Valentina Lukaševiča dzejūļu kruojums “Pādi navā svāti”

Itūgod tyka īsnāgti 109 pretendentu dasacejumi, kurus izviertēja žurejis komiseja, tuos sastuovā īkļaunūt īprīkšejūs godu bolvu sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu daaicynuotūs ekspertus, kuru kasdīna nav saisteita ar latgaliskū kulturu. Ar pylnu žurejis komisejis sastuovu var īsapazeit Latgalīšu kulturys goda bolvys “Boņuks“ sātyslopā http://bonuks.lv. Žureja īsnāgtūs nominantus izviertēja divejuos kuortuos – pyrmuo ir nakluotīnis kuorta, kurā teik izvārtāti vysi īsnāgtī pretendenti, bet ūtrei ari itūgod ir attuolynuotuo kuorta, kurā žurejis lūcekli diskutej i izviertej jau 30 nominantus. Ar “Boņuka“ muola statuetem teik gūdynuoti tī 10 pretendenti, kuri sajāmuši leluokū punktu skaitu kūpā obejuos kuortuos. Bolvys “Par myuža īguļdejumu latgalīšu kulturys atteisteibā“ sajiemiejs tiks publiski paziņuots februara vydā.

Atškireibā nu pārnejuo goda bolvys padūšonys ceremonejis, itūreiz iz nūtikšonu kluotīnē Latgolys viestnīceibā GORS tiks aicynuoti ari skateituoji. Bolvys padūšonys ceremoneju vadeis komikis Juoņs Skutelis. Skateituojus kluotīnē i tīšraidē TV prīcynuos grupys “Bez PVN”, “Muosys”, “Jakob Noiman Band”, “Varang Nord”, “Saucējas”, muzikis Ūga, Patrisha i Dināra Rudāne, kai ari koncertā “Celīs bruoļ!” radeits ansamblis, kurā apsavīnuojuši zynomi latgalīšu muziki. Beletu tierdznīceiba iz “Boņuks 2021” tyka suokta 21. janvarī kai GORS i “Biļešu Paradīze” beletu tierdznīceibys sistemuos škārsteiklā, tai kasēs kluotīnē.

Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. goda bolvu reikoj Latgolys viestnīceibys GORS komanda, sasadorbojūt ar bīdreibu “Partitūra”. “Boņuks 2021” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme, Daugovpiļs piļsātys dūme, Leivuona nūvoda pošvaļdeiba i Rēzeknis nūvoda pošvaļdeiba.

Print Friendly, PDF & Email

Nūtikšonu kalendars

Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]