Rokstu sagataveja: portals lakuga.lv

Kuorsovā i tuos apleicīnē dzeivojūši veirīši jau nu ituo gods suokuma aicynuoti pīsadaleit sarunu kluba “Veiru runys” sasatikšonuos. Sarunu klubu voda muzikis i latgalīšu kulturys projektu vadeituojs Guntis Rasims.

Kai stuosta Guntis Rasims, jau nūtykušys treis sasatikšonys i vēļ vysmoz divejis prīškā – 23. februarī i 9. martā. Iz tom aicynuoti ari tī kuorsavīši, kas vēļ nav pīsadalejuši sarunu klubā.

“Radzu, ka tei ir loba īspieja sovstarpejai “dzeivajai” komunikacejai īilgušajā i sarežgeitajā īrūbežuojumu laikmatā. Kuorsavīšus raugu īpazeistynuot ar myusu laiku viesturē vīnom nu dziļuokajom sarunu klubu tradicejom, kas rodušuos Britu soluos, Londonā, 18. godu symtā. Taiduos sasatikšonu vītuos sabīdreibys puorstuovi varēja gon apsprīst sev interesejūšys temys, gon sovpateigu “runys aktivitašu” (parlour games) veidā lītdereigi pavadeit sovu breivū laiku. Diskutejam i puorbaudam puora godu symtūs izkūptuos metodis i tradicejis praksē,” tai Guntis.

Sarunu klubs “Veiru runys” teik organizāts projektā “Izaicinājumi, iespējas, perspektīvas” i tuo golvonais aizdavums ir vītejuos kūpīnys styprynuošona, sadarbeibys i dūmu apmainis veicynuošona. Organizej bīdreiba “Sadarbības platforma” sadarbeibā ar British Council.