Pyrmū reizi ari skateituoji varēs nūsavērt īstudiejumu “Muols”

Pyrmū reizi ari skateituoji varēs nūsavērt īstudiejumu “Muols”

Rokstu sagataveja: portals lakuga.lv

Jaunnedeļ, nu 22. da 25. februara, pyrmū reizi ari skateituojim Rēzeknis teatrī “Joriks” byus vareiba redzēt Mārtiņa Eihis Latgolys pūdnīceibai veļteitū īstudiejumu “Muols”, viestej teatra “Joriks” atsyuteituo informaceja. “Muols” ir ūtrais teatra īstudiejums, kurymā dzierdama ari latgalīšu volūda.

Teatra izruode “Muols”, kurys režisors ir ari Rēzeknis teatra “Joriks” muokslinīcyskais vadeituojs Mārtiņš Eihe, atkluoj Latgolys pūdnīceibys procesus – kai teik dabuots i gataveits veiduošonai dereigs muols, kai nūteik cepļa kūršona, kai atdzymuse Latgolys malnuo keramika, kai var izavuiceit par pūdnīku, kai sūpluok sadzeivoj jaunuo i tradicionaluo keramika i cyti vaicuojumi, bet jo eipašu vītu izruodē ījem muokslys zynuotnīka, Latgolys keramikys viesturis pietnīka Juoņa Pujāta (1925–1988) personeiba i darbeiba. Izruode baļsteita intervejuos ar myusu dīnu keramikim i stuostūs par jau myužeibā nūguojušajim Latgolys pūdnīkim. Izruodis laikā, īelpojūt muola smuordu i pīsaskarūt tam, skateituoji tiks aicynuoti pīsadaleit ceļuojumā nu aizviesturis da myusu dīnu, nu muola pikuča da suču, nu bārna, kurs bejs iz vīnu keramikys nūdarbeibu, da muokslinīka, kurs materalam atdevs vysu sovu dzeivi.

Izruodē “Muols”, kas topuse pārnejuo goda rudinī, nu īrūbežuojumu deļ ar skateituojim sasatiks viņ niu, pīsadola akteri Juoņs (Jānis) Kronis (KVADRIFRONS) i Liena Šmukste, kuru obeju dzymtys saknis vaicojamys Latgolā – Juoņa Gaigalovys i Kolupa pusē, jis ir ari Juoņa Pujāta muosys mozdāls, Lienai Leivuonā. Taipat izruodis dalineica ir jaunuo muzike, folklorys kūpys “Vīteri” dalineica Liene Skrebinska. Izruodis scenografeju taisejuse Paraskēva Deikina, bet dramaturgiskū materialu – izruodis stuostu – veiduojuse aktrise i dramaturge Rūta Holendere. Izruodē akteru izspālātajuos sarunuos sūpluok skaņ kai latvīšu literaruo, tai latgalīšu volūda. Vaira par izruodi var izzynuot portala sarunā ar tuos veiduotuojim ITE.

Izruode Rēzeknis teatrī “Joriks” byus nūsaverama nu 22. da 25. februara, kotru dīnu septeņuos stuņdēs vokora. Beletus iz izruodi var nūpierkt teatra kasē voi “Biļešu Paradīze” beletu sistemā.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]