Rokstu sagataveja: portals lakuga.lv

Atzeimejūt Dzymtuos volūdys dīnu, kurei ir šudiņ, 21. februarī, folklorys kūpa “Upīte” sovā dzymtajā volūdā, latgaliski, īdzīduojuse vīnu nu kūpys meiluokūs dzīšmu – Edvīna Zariņa i grupys “Dakota” dzīsmi “Kurtizāņu ugunskurs”, viestej kūpys vadeituoja Andra Slišāna atsyuteituo informaceja.

Dzīsme “Kurtizāņu ugunskurs” reizē ir veļtejums i pateiceiba napaseņ myužeibā nūguojušajam grupys “Dakota” solistam, muzikim Edvīnam Zariņam (1954—2022). Ar grupu folklorys kūpa sasadraudzēja 2020. goda festivalā “Upītes Uobeļduorzs”, kod grupa “Dakota” uzastuoja kai festivala gosti Upītes breivdobys solmu ruļļu estradē.

Kai stuosta Andris Slišāns, itei dzīsme asūt naatjemama folklorys kūpys dorbuošonuos daļa – skaņ vysod, atsagrīžūt nu koncertu izbraucīnim, kod kūpā teik svieteiti svātki, voi vīnkuorši atsapyušūt, deļtuo, izzynojūt par muziķa aizīšonu, gribiejīs saglobuot juo pīmiņu ari itaidā skaniejumā. Dzīsmi puorlykuši i apdarynuojuši poši folklorys kūpys “Upīte” dalinīki, tei īraksteita “Bigmaar’s Records” studejā tīpat Upītē, bet video salykuse Kate Slišāne.