Runuotuojus aicynoj pīsadaleit “Plōciņu Mases festivalā” Maltā
Rokstu sagataveja: portals lakuga.lv
Jezupa dīnā, 19. martā, 16.00 stuņdēs Maltys kulturys nomā nūtiks “Plōciņu Mases festivals”, iz kurū aicynuoti vysi lelī runuotuoji, kas spiej iz dzeivi i tuos nabyušonom pasavērt caur humora prizmu.
Kai stuosta Maltys kulturys noma vadeituoja Elīna Prusaka, itys jau ir ūtrais “Plōciņu Mases festivals”, pyrmais Maltā nūtics pyrma 10 godu. Pasuokumā pīsadaleis ari poša Plōciņu Mase aba žurnaliste Anita Graudiņa, kurū mādz saukt ari par latgalīšu humora karalīni. Jei humoristiskys viestulis roksta jau vaira nakai 25 godus. Elīna Prusaka nūruoda, ka tai teik raudzeits pasaceit vysmoz mozu paļdis jai par vysu pīraksteitū. “Tei byus sasatikšona taidom pat Masem, kam pateik parunuot par nūteikūšū, tok kotrai ar sovu rūkrokstu, cytaižuok. Kūpeigais – dūma, redziejums, latgaliskais azarts i smaids.”
“Iz festivalu teik aicynuoti runuotuoji i runuotuojis, kas sev rakstureigā stylā stuosta par nabyušonom i byušonom vysapleik, kas nav vīnaldzeigi i ar tū doluos ar apleicejim caur humora prizmu. Latgalīši tok ir valna pylni!” soka Elīna Prusaka. Runuot var kai Plōciņu Masis jau pīraksteituos viestulis, tai ari poši sovus, Masis vuordim runojūt, trikmīņus.
