Annele Slišāne izdavuse stuostu i dzejis kruojumu “tuoraga stuosti. pīns”

Annele Slišāne izdavuse stuostu i dzejis kruojumu “tuoraga stuosti. pīns”

Rokstu sagataveja: portals lakuga.lv

Tekstilmuokslineica i konkursa “Latgolys prozys skaitejumi” 2020. i 2021. godu laureate, rakstneica Annele Slišāne izdavuse pārn izguojušuo stuostu kruojuma “tuoraga stuosti” turpynuojumu, nu reizē i suokumu – stuostu i dzejis kruojumu “tuoraga stuosti. pīns”. Kruojumā apkūpuoti četrpadsmit jauni literarī dorbi, kurūs autore rysynoj pasaulī svareigys lītys i nūteikūšū, aizdūd vaicuojumus i meklej atbiļdis.

Pārnejuo goda suokumā izguoja Annelis Slišānis stuostu kruojums “tuoraga stuosti”, ar kuru Slišāne ir nomināta ari Latgalīšu kulturys goda bolvai “Boņuks 2021”. Autore soka, ka stuostu kruojums “tuoraga stuosti. pīns” ar četrpadsmit jaunim literarajim dorbim – stuostim i dzejūlim – ir par suokumu: par cylvāka suokumu, par sīvītis suokumu byut muotei, par itū laiku. “Pīdzimt i izaugt mīlesteibā, izaugt par lobu cylvāku bez vardarbeibas apleik i sevie. Suokums var byut vusuods. Ar pīnu i bez tuo, vardarbeigā sistemā īrauts i svareiguo breiža nasaprasts i najiuteigs. Bailies i tymsā. Tuods suokums ari var byut. Pīns ir kuo suokums ari tuoragam, i pīns caurvej vusus stuostus, I gruomata ir suokums nazkam cytam, jaunam otkon nu gola, jaunīm stuostīm,” kruojuma ideju atkluoj Annele.

Stuostu i dzejis kruojums “tuoraga stuosti. pīns” izdūts autoris dzymtajā Upītis pusis izlūksnē, īvārojūt myusu dīnu pareizraksteibys normys. Gruomotys redaktore literate Ilze Sperga soka: “Vīnā pīna upē div reižu naīkuopsi, tok Annele tū dora i maņ kai redaktorei beja intriga – kū vēļ jei pasaceis i kū vēļ var pīraksteit piec tik vīngobolaina iniciacejis voi tuoragā saīšonys stuosta kai pyrmuo gruomota. Ūtruo ir, pa munam, pīna gruomota. Na vyss pīns saskuobst tai, kab golā varātu atsiļdeit bīzpīnu. Izlīta pīna nasasmeļsi. Kai seikys boltys upeitis aiztak pa zemi i varbyut ir nazkaidu cytu stuostu suokums.”

Publicitatis karteņa

Literaturzynuotneica Ilga Šuplinska par Annelis Slišānis dorbim roksta, ka juos teksti līk atsagrīzt kaidā nu baimis punktu, tū izdzeivuot i iztaisnuot muguru deļ seve, vaicuot boltuo pīna suokuma. Bet latgalīšu kulturys ziņu portala lakuga.lv redaktore Laura Melne par Annelis raksteitū soka: “Annele nu sīvīšu dzeivis pīredzem izvalk koč kū puorpasauleigu – tū, kas vīnoj myus vysys, lai cik atškireigys mes byutu. Te nav didaktikys, puormatumu pasauļam voi koč kaidu praseibu. Ir tik pīredze, kas myus, cylvākus, izveiduojuse taidus, kaidi asam.” Konkursa “Latgolys prozys skaitejumi 2021” žurejis lūcekle, literate Anna Rancāne, viertejūt Annelis stuostus, saceja: “Mozgu atraisiešona – cylvāka pīdzemdiešona kai sīvītis spāka formula cauri laikim i telpu. Volūda suotna kai maize. Teksts nav vīglys, vys tik pamat gaišu piecgaršu.”

Annele Slišāne ir tekstilmuokslineica i literate, kurei dzeivoj pošā Latvejis pīrūbežā, Bolvu nūvoda Zeļču cīmā. Juos literaturys i tekstilmuokslys projekts “#100dečiLatvijai”, kas tyka radeits kai duovona Latvejis 100. dzimšonys dīnā, 2017. i 2018. godā apbolvuots ar Latgalīšu kulturys goda bolvu “Boņuks”, taipat autore sajāmuse divejis nominacejis bolvā “Boņuks 2021” – kai par pārn izguojušū stuostu kruojumu “tuoraga stuosti”, tai par projekta “#100dečiLatvijai” puortapšonu audio, video i taktilajūs formatūs. Atbiļdūt iz vaicuojumu, kam Annele pīsavārsuse niu, jei soka: “Dokumenteju pasauļa rosšonuos breižus – azaru i dīču nūsalaisšonu. Runoju ar akminīm, kurīm pasauļa radeišonys laikā beja pa godam, geidu pavasara. Aužu gobelenus i rokstu stuostus, kurī plyust kuo poli.”

Gruomotys “tuoraga stuosti. pīns” izdeviejs ir SIA “Anneles zeme”. Gruomota izdūta ar Latgolys kulturys programys, kū eistynoj Latgolys regiona atteisteibys agentura ar AS “Latvijas valsts meži” i Vaļsts kulturkapitala fonda finansiejumu, atbolstu.

Jaunuo kruojuma stuostu “pavasars atguoja trejuos dīnuos” i “itei dīna” video īroksts nu konkursa “Latgolys prozys skaitejumi 2021”

Print Friendly, PDF & Email

Nūtikšonu kalendars

Jul
2
Sai
11:00 Sātys kopejneicu dīnys @ Preili, Aglyuna i Leivuons
Sātys kopejneicu dīnys @ Preili, Aglyuna i Leivuons
Jul 2 @ 11:00 – Jul 3 @ 17:00
Sātys kopejneicu dīnys @ Preili, Aglyuna i Leivuons
 
15:00 Diskuseja “Paļdis nūvodam, ka ai... @ Sarunu festivals LAMPA
Diskuseja “Paļdis nūvodam, ka ai... @ Sarunu festivals LAMPA
Jul 2 @ 15:00 – 16:00
Taišni itys Namaterialuos kuturys montuojuma centra “Upīte” vadeituoja Andra Slišāna pasceitais teikums “Paļdis nūvodam, ka aizslēdze školu!” Latgalīšu kulturys goda bolvā “Boņuks 2021”, sajemūt bolvu par izalauzšonys ustobu “Pīci panti”, ir tics par moto ituo[...]
17:00 Maltai 85 @ laukumā pi Maltys KN
Maltai 85 @ laukumā pi Maltys KN
Jul 2 @ 17:00 – 23:45
Maltai 85 @ laukumā pi Maltys KN
Jul
3
Svā
vysu dīnu Izstuode “Līvāni=Stikls” @ Daugovpiļs muola muokslys centrs
Izstuode “Līvāni=Stikls” @ Daugovpiļs muola muokslys centrs
Jul 3 vysu dīnu
Daugovpiļs piļsātys svātku dīnā, 3. junī 14.00 stuņdēs Daugovpiļs muola muokslys centrā nūtiks Leivuona stykla i amatnīceibys centra izstuodis “Līvāni = stikls” atkluošona. Izstuodē apsaverami Leivuona stykla i amatnīceibys centra stykla pyutieju Aleksandra Logvina i[...]