Zīmys i pavasara sasatikšona jaunajā Arņa Slobožanina dzīsmē “Marts”

Zīmys i pavasara sasatikšona jaunajā Arņa Slobožanina dzīsmē “Marts”

Rokstu sagataveja: portals lakuga.lv

Grupys “Dabasu Durovys” līders Arņs Slobožanins, sasadorbojūt ar jaunū muziki Amandu Lapu i cytim Latgolys muzikim, īrakstejuši dzīsmi ar Annelis Slišānis vuordim “Marts”, viestej muziķa atsyuteituo informaceja.  

Dzīsmis, kurei studejis īroksta pyrmatskaņuojumu pīdzeivoj šudiņ, 1. martā, vuordu autore iz Zīmeļlatgolys rakstneica i tekstilmuokslineica Annele Slišāne. Dzīsme rodusēs Latvejis Radejis Latgolys studejis myusdīnu latgalīšu literaturai veļteituo raidīroksta “Puslopys” laikā – poša pyrmuo raidīroksta laidīņa īrokstā 2020. goda golā. Raidīrokstā, kura vīns nu vadeituoju ir dzīsmis autors Arņs, iz sarunu teik aicynuoti dažaidi Latgolys literati, i raidīroksta laikā ar kaidu nu jūs dorbu teik radeita muzykala etide. Itūreiz itei etide puortapuse dzīsmē “Marts”. Pārn leidzeigs stuosts beja ar Arņa Slobožanina i Vernera Martinova īdzīduotū dzīsmi “Muni pādi nava svāti”, kuruos īdviesme beja “Puslopu” saruna ar literatu Valentinu Lukaševiču.

Skaņdorbs “Marts” viestej par laiku, kod zīma vēļ tai eistyn nav golā, bet gaisā jau pa drupeitei var just pavasari. Martā dobā var redzēt interesantu paruodeibu – vokorūs, skaidrā laikā, dabasūs reizē ir kai saule, tai mieness. Tys simboliski paruoda, ka vys vēļ kluotyn ir obeji godalaiki. Dzīsmis īrokstā pīsadalejuši Arņs Slobožanins (gitara, bolss), Einārs Lipskis (tausteni, gitara, akordeons, bouzuki, mandolina), Mārcis Lipskis (bass), Jurgis Lipskis (bungys), Pīters Daugulis (stabule) i Amanda Lapa (bolss). Dzīsme īraksteita Eināra Lipska sātys studejā, bet dzīsmis piecapstruodi sataisejs Armands Treilihs.


Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]