Apbolvuoti Latgalīšu kulturys goda bolvys “Boņuks 2021” sajiemieji

Apbolvuoti Latgalīšu kulturys goda bolvys “Boņuks 2021” sajiemieji

Rokstu sagataveja: portals lakuga.lv

Svineigā ceremonejā, kū sastdīnis, 5. marta, vokorā Latgolys viestnīceibā GORS apmekliejuši kluotīnis skateituoji, kai ari transliejuse Latvejis Televizeja, gūdynuoti 10 Latgalīšu kulturys goda bolvys “Boņuks” sajiemieji – spylgtuokuos i nūzeimeiguokuos nūtikšonys i personeibys 2021. godā, kai ari bolva par myuža īguļdejumu padūta kordirigentam Juoņam Grudulam.

Latgalīšu kulturys goda bolvu “Boņuks” par padareitū pārņ sajēme:

  • Folklorys kūpa “Vīteri” i video stuosts “Teika par Rēzeknes Rozi”;
  • Annele Slišāne par #100dečiLatvijai digitalā, taktilā, audio-vizualā i zeimu volūdā i stuostu kruojumu “Tuoraga stuosti”;
  • Grupa “Latgalīšu Reps” ar albumu “Cyta dzela” i videoklipim;
  • Ilzis Spergys stuostu kruojuma “Dzeiveiba” radejis lasejumi;
  • Marijis Dzeislys dzejūļu kruojums “Vysta smierts”;
  • Gruomota i muzykys albums bārnim “Vuškeņa iz pļovys”;
  • Bolvu nūvoda zeime latgaliski;
  • Pyrmuo izalauzšonys ustoba latgaliski “Pīci panti”;
  • Navigacejis aplikaceja “Waze” latgaliski;
  • Literate i redaktore Ilze Sperga.

Publikys simpateju bolsuojuma “Žyka” bolvu, kurys nūtikšonu organizēja Latgalīšu kulturys ziņu portals lakuga.lv i Latvejis Sabīdryskūs medeju portals lsm.lv i kurā par sovu simpateju varēja nūbolsuot kotrys grybātuojs, sajēme Bigmaar’s Records īrokstu studeja.

Bolvys padūšonys ceremoneju jau ūtrū godu vadeja komikis Juoņs Skutelis. Skateituojus prīcynuoja grupys “Bez PVN”, “Muosys”, “Jakob Noiman Festival Band”, “Varang Nord”, “Saucējas”, muzikis Ūga, Patrisha i Dināra Rudāne, kai ari koncertā “Celīs, bruoļ!” radeitais ansamblis, kurā apsavīnuojuši zynomi latgalīšu muziki. Bolvys padūšonys ceremoneju var nūsavērt ITE.

Itūgod bolvai tyka padūti 109 pretendentu dasacejumi, kurūs izviertēja žurejis komiseja, tuos sastuovā īkļaunūt kai pārnejūs godu bolvys sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu pīaicynuotūs ekspertus, kurūs kasdīna nav saisteita ar latgaliskū kulturu. Kai pretendentu viertiešonys kritereji ari itūreiz tyka izvierzeiti pretendenta snāguma kvalitate, aktivitate vysa goda laikā, regionā, vaļstī voi plašuokā mārūgā raiseituo rezonanse, latgaliskums i/voi Latgolys kulturys vierteibu nesšona, pretendenta ilgtspieja – ītekme iz latgaliskuos kulturys procesim iz prīšku.

Latgalīšu kulturys goda bolva “Boņuks“ pyrmū reizi tyka padūta tyka padūta 2009. godā, bet nu 2013. bolvu reikoj Latgolys viestnīceibys GORS komanda, sasadorbojūt ar bīdreibu “Partitūra“. “Boņuks 2021“ nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži“ i Latgolys regiona atteisteibys agenturys atbolstu, kai ari Rēzeknis vaļstspiļsātys dūme, Daugovpiļs vaļstspiļsātys dūme, Leivuona nūvoda i Rēzeknis nūvoda pošvaļdeibys, Latvejis Televizeja, latgalīšu kulturys ziņu portals lakuga.lv, Latvejis Radejis Latgolys studeja, SIA “Atrakcijas Sēlijā“, SIA “Latgales ziedi“, kopejneica ZĪDS, bīdreiba “LgSC“. Vaira par bolvu skaiti: https://bonuks.lv/.

Foto šaļtenis nu ceremonejis. Foto: Dagnija Bernāne/Latgolys viestnīceiba GORS

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]