Kulturys īsacejumi nedeļai: atsaslēgt nu socteiklu – pastaigys, drupeit dzejis, eseju i mīra

Kulturys īsacejumi nedeļai: atsaslēgt nu socteiklu – pastaigys, drupeit dzejis, eseju i mīra

Rokstu sagataveja: portals lakuga.lv

Ituos nedelis kulturys īsacejumus pīduovoj Laura Spundere, kurys kasdīna aizrit pi Latgolys regiona turisma atpazeistameibys i kūpejuos sadarbeibys veicynuošonys dorbojūtēs bīdreibā “Latgolys Turisma asociaceja”. Laura pīzeist, ka sovu kasdīnu navar izatāluot bez vysmoz stuņdi garom pastaigom ar suni, sovpus breivdīnuos, kod ir vareiba, teik pīvarāti ari drupeit garuoki pastaigu goboli.

Pastaiga ar pīvīnuotū vierteibu

Itūgod pavasars i vysi pasauļa nūtykumi ir eipaši naprognozejami, deļ tam īsoku drupeit atsaslēgt nu socialīm teiklim i izīt kuorteigā pastaigā izeimūt Dobys līguma “Stompaku purvi” stygu i apsaverūt nupat atkluotū Bunkuru-bazneicu, par tū vaira skaiti ITE. Stompakūs ir vareiba dūtīs eisuokā pastaigā, kas byus ap 3 kilometri gara, tok iztureiguokī var dūtīs garuokā puorguojīnī, kura garums sasnēgs pat 16 kilometrus. Dobys līgumu “Stompaku purvi” eipašuoku padora na viņ šmukuo doba, tok ari viesturiskais stuosts, kuru īsoku izzynuot kūpā ar Viļakys muzeja gidim.

Karteņa: Inese Matisāne, Viļakys Turisma centra vadeituoja

Lela čaja kruška i literatura, kurā aizamierst

Napaseņ latgalīšu rakstnīks i publicists Valentins Lukaševičs ir izdevs jaunu eseju kruojumu “Casnāgu maizeitis”. Kruojumā īkļautī teksti ir truopeigi apraksteiti pīredzejumi nu Valentina dzeivis, tūs skaitūt saīs i pasasmīt, i īgrimt dziļuokuos puordūmuos. Gruomota nav cīši bīza, viņ 93 lopys pusis. Niu asmu tykuse gruomotys pusē i kotram skaiteituojam īsoku nasasteigt, a skaiteit tik pa 2-3 stuostenim par reizi. Valentina rokstu volūda ir gona boguoteiga, tei naprosa steigu, tik lelu čaja krušku i puordūmys ar acim vaļā.

Karteņa: Laurys Spunderis personeigais arhivs

Dzejis izruodis audiovizualais baudejums

Sovpus tod, kod prosuos audiovizualu baudejumu eisai atslūdzei, īsoku nūsavērt Ontona Kūkuoja gruomotys “Mīlesteiba, Lelais Līpu Kolns” dzejis izruodis „Pa mīlesteibu brīnūt, kuojis nasaļ” treileri (režisore Marika Čerņavska (Antonova)). Prūtama līta – lobuok ir nūsavērt vysu izruodi, tok maņ pošai cīši pateik ari itys eisais video, kuru asu puorsavāruse jau daudzys reizis i arviņ laiku pa laikam pasaveru vēļreiz. Mani uzrunoj izruodis daudzuos niansis, obu aktīru dabiskums i, kai maņ redzīs, ari puorpasauleiguo sirsneiba, kuru jī spiej nūdūt pat cauri ekranam. Izruode sajēme ari Latgalīšu kulturys goda bolvu “Boņuks 2020”.

Spāku sev i sābrim

Ar cytim sābrim varam byut lelūs draugūs, nu cytu juosabeist. Dīvamžāļ Ukrainai ar vysim sābrim nav pasaveics. Es gona bīži naizprūtu cylvākus i jūs reiceibys, tok itys gadīņs stuov tuoli puori pat vysļaunuokuom prognozem. Itymā trokajā laikā mums juobyun eipaši vīnuotim i juoatbolsta demokratiska, atvārta i mīrpylna leidzpastuoviešona. Ka ir vareiba, aicynoju paleidzēt Ukrainys ļaudim, par tū vaira var dazynuot ITE. Slava Ukrainai, slava varūneigajim ukrainim i lai mīrs ir kai pi myusu, tai i cytvīt.

Karteņa: Laurys Spunderis personeigais arhivs
Print Friendly, PDF & Email

Nūtikšonu kalendars

Jul
2
Sai
11:00 Sātys kopejneicu dīnys @ Preili, Aglyuna i Leivuons
Sātys kopejneicu dīnys @ Preili, Aglyuna i Leivuons
Jul 2 @ 11:00 – Jul 3 @ 17:00
Sātys kopejneicu dīnys @ Preili, Aglyuna i Leivuons
 
15:00 Diskuseja “Paļdis nūvodam, ka ai... @ Sarunu festivals LAMPA
Diskuseja “Paļdis nūvodam, ka ai... @ Sarunu festivals LAMPA
Jul 2 @ 15:00 – 16:00
Taišni itys Namaterialuos kuturys montuojuma centra “Upīte” vadeituoja Andra Slišāna pasceitais teikums “Paļdis nūvodam, ka aizslēdze školu!” Latgalīšu kulturys goda bolvā “Boņuks 2021”, sajemūt bolvu par izalauzšonys ustobu “Pīci panti”, ir tics par moto ituo[...]
17:00 Maltai 85 @ laukumā pi Maltys KN
Maltai 85 @ laukumā pi Maltys KN
Jul 2 @ 17:00 – 23:45
Maltai 85 @ laukumā pi Maltys KN
Jul
3
Svā
vysu dīnu Izstuode “Līvāni=Stikls” @ Daugovpiļs muola muokslys centrs
Izstuode “Līvāni=Stikls” @ Daugovpiļs muola muokslys centrs
Jul 3 vysu dīnu
Daugovpiļs piļsātys svātku dīnā, 3. junī 14.00 stuņdēs Daugovpiļs muola muokslys centrā nūtiks Leivuona stykla i amatnīceibys centra izstuodis “Līvāni = stikls” atkluošona. Izstuodē apsaverami Leivuona stykla i amatnīceibys centra stykla pyutieju Aleksandra Logvina i[...]