Latgolā i Latvejā zynomi muziki apsavīnuos Ukrainys atbolsta koncertā

Latgolā i Latvejā zynomi muziki apsavīnuos Ukrainys atbolsta koncertā

Rokstu sagataveja: portals lakuga.lv

Sastdiņ, 19. martā, nu 12 stuņžu Rēzeknē pi Latgolys viestnīceibys GORS Latgolā i vysā Latvejā pazeistami muziki apsavīnuos koncertā “Ukrainas brīvībai”, kura laikā sabīdreiba aicynuota zīduot i atbaļsteit Ukrainu ceiņā pret Krīvejis militarū agreseju vaļstī.  

Rēzeknē paradzātais koncerts, taišni taipat kai tys beja 25. februarī Reigā pi Kongresu noma, ir breivpruoteigs kulturys nūzaris atbolsts Ukrainai. Itūšaļt Ukraina pīdzeivoj lela mārūga Krīvejis militarū agreseju, deļtuo muzyka i dzīsmis, tautys kūpā byušona ir tei saikne, kas vīnoj Latvejis i Ukrainys tautys i ari Rēzeknē ir vareiba paust atbolstu i reizē izsaceit protestu pret agreseju, kas teik eistynuota Ukrainā, tepat Eiropā.

Koncerta suokumā vysus uzrunuos kinu, teatra i operys režisors Vīsturs Kairišs, taipat gribiešonu pīsadaleit pasuokumā izsacejs ari Ukrainys viestnīks Latvejā Oleksandrs Miščenko. Atbolsta koncerta pyrmajā daļā skanēs latvīšu i ukraiņu kora dzīsmis i tautysdzīsmis, bet ūtrajā daļā uzastuos pazeistami muziki i grupys nu Latgolys i Latvejis: Diona Liepiņa, Ēriks Zeps, Miks Galvanovskis, Ralfs Eilands, “Franco Franco”, “Bez PVN”, “Laime Pilnīga”, “Dabasu Durovys”, “Baritoni”, Andris Slišāns i folklorys kūpa “Upīte”, Amanda Lapa i grupa “Piparmētras”, Ricky Anderson, Katrīna Gupalo, Arturs Skutelis, grupa “Rupuči”, Linda Rušeniece, “Oranžās Brīvdienas” i Ūga.

Koncertu tīšraidē varēs vērtīs kai Rēzeknis piļsātys i Rēzeknis nūvoda Facebook lopuos, tai ari portalā tvnet.lv.

Koncerta laikā byus atvārts ari humanuos paleidzeibys pījimšonys punkts. Koncerta apmaklātuoji aicynuoti atnest i pazīduot puortyku ar lobu dereiguma termeņu, higienys precis, apgierbu i opovus, kai ari medicinys precis (marlis saitis, rānu spiļvineņus, dezinfekcejis leidzekļus). Taipat byus vareiba pazīduot kai zvonūt pa fonda ziedot.lv lobdareibys teleponu 90006086, tai zīdojūt naudu iz vītys.

Koncerts nūtiks, pasasokūt muziķa Ralfa Eilanda iniciativai i Rēzeknis piļsātys dūmis i Rēzeknis nūvoda pošvaļdeibys sadarbeibai.

Itūnedeļ medeji jau viesteja, ka koncerta nūtikšonai Latgolā tyka uzrunuota ari Daugovpiļs piļsāta, nu koncerta reikuotuoji atbolstu nadabuoja, par atsacejuma īmesli dabojūt viesti, ka piļsāta poša taiseišūt koncertu 3. aprelī. Zynoms, ka lelū koncertu Reigā pi Kongresu noma muziki sareikuoja viņ divejuos dīnuos, deļtuo ari portalam lakuga.lv Daugovpiļs atsarunuošona ruodīs mozuokais “čudna”.

Koncerta reikuotuoji Rēzeknē aicynoj sastdiņ byut kūpā, daleitīs ar sovom emocejom i sirds syltumu ar Ukrainys ļaudim, kurīm tū itūšaļt, kod Ukraina pīdzeivoj taida mārūga vardarbeigu izniceibu, vajag vaira par vysu.

Koncerta īroksts nūsaverams ite:

Print Friendly, PDF & Email

Nūtikšonu kalendars

Sep
30
Pīk
11:30 Saruna par Pēteri Martinsonu @ tīšsaistē
Saruna par Pēteri Martinsonu @ tīšsaistē
Sep 30 @ 11:30 – 13:00
Saruna par Pēteri Martinsonu @ tīšsaistē
J. Soikāna Ludzys muokslys škola aicynoj pīsasaceit iz seminaru, kurā Imants Klīdzējs (Mg.art, LMA doktorants, Salacgreivys muokslys školys direktors) stuosteis par muokslinīku, keramiki, arhitektu Pēteri Martinsonu. Pīsasaceit var ITE.