Marija Dzeisla: Paplašynuota sirds

Marija Dzeisla: Paplašynuota sirds

Sagataveja: portals lakuga.lv

Pīduovojam portala lakuga.lv skaiteituojim jaunuokūs Marijis Dzeislys dzejūļus. Pavysam naseņ Marija sajēme Latgalīšu kulturys goda bolvu “Boņuks 2021” par debeja kruojumu “vysta smierts”. Sovu identitati Marija vys naatkluoj, tok daudz nūzeimeiguoks ir fakts, ka Marija turpynoj raksteit. Ari par aktualajom nūtikšonom pasaulī. Stypri i smeļdzeigi, kai jau Marija Dzeisla.


***

munā duorzā
šūvosor zīdēs
viņ saulispučis
ni buļbu, ni ogūrču
nasiešu sovā zemē

saulis muosys
ar plotom acim
vērsīs iz kotra
iz saulis rīta
izplēsnēs izdziss
rudinī nūsakuors
gryutom pīrītiejušom
golvom iz zemi
iz rītumim pūstumim
Dvieseļu dīnā
atskrīs putineni
izgaļdeis aizness
īsēs svešajā pusē

par dzagiuzi
puorsamest
aizskrīt par
trejim duorzim
deveņom zemem
dabasim dzilim
aizbyut


***

itūgod dzeraunē
nav ni krīvu, ni latvīšu
apsyta puori skrīnūšī putyni
siežu pi plitys iz beņčeiša
aukleju Jezu
juo asnis nu rānu
pogrobā zapts iz greidys
nav ni gola, ni suokuma
turu iz ceļgolu


***

kod dzeraunē beja izšauti vysi saluti
kod pagaisa i otkon atsaroda vysi sābru suni
kod saskuoba rosols i šuba
es izguoju uorā iz gaņku i vierūs
pamalē austrumūs sorkona bluozme
pādejū reizi tamā naktī
kod palnūs sakryta Ludza
pādejū reizi tamā naktī
kod drupuos sabyrza vacuo Rēzekne
nu austrumu atīt viejs, saule i daguma smoka
stuovu i verūs
ni to bēgt, ni pajimt ciervi
aiz mane Varakļuoni i Reiga


***

kod nav nikuo vuoreiguoka
par betona dzotim izryusiejušim
montuota zvīdrim puordūta dzeda teiruma molā
siedi iz bārza zora teiruma molā
vuolyudzeite

pasauļa staiguotuojam sovi celi ejami
nanūvakteisi ar blisi
nanūduoveisi nanūsausi
feisbuka obrozā napasalīleisi
medinīku grupā naīliksi
navuodēs taidam ni blise ni dzoti
puorskrīs puorliduos puorbyus
i siedi betona rogona plēsnej

betona skombys kai pučis pārnejā zuolē
sazīdēs gaiļapīši i atliduos strodi Mežastrodūs
taids i pavasars putinim puori


***

kod da kara beigu ir palics divpadsmit nedeļu
izjem naudu mozuos banknotēs i nūpierc sev litru benzina
ceri ka nabyus juobāg i nūdadzynoj tyltus aiz seve
tai īsasuoc vysi romani i vysi romani ir celi iz paguotni
puori nūdadzynuotim tyltim i izsautim mīstim
puori nūcierstim mežim i tanku izortim teirumim
puori vacu kinu hroniku hroniskajim malim
puori socialūs teiklu histeriskajai info pandemejai
aizīt da sova vydyskuo bārna nūdzīduot šyupeļa dzīsmi
guli mozū bierneņ gulādams guli
itys ir breineigs pasauļs guli


***

paplašynuota sirds jiuteigi registrēja kotru vulkana izvyrdumu sevkurā pasauļa molā
par malnim kūrmuļa rokumim snīgā klusēja uorā pi jasmiņu kryuma i pļovā pi pierts
zeme itūgod slapņa i solta, tik nazkur vydspusē osni, deigsti, slīči i kūrmuli dzeivoj
tulpu osni dūbēs leidzeigi naseņ dzemdiejušys sīvītis ciču golim zam džempera
tik es otkon bez seita siedieju kuknē pi golda
ar nazi pa vaskadrānys pučem kristeni nulleitis
kai vinnēt dzeivi i smierti i naīraudzeit tuo ziņuos


***

daīs dīna pavysam dreiži
termeni iz pīna paku
byus garuoki nakai tova dzeive
iz pļovys staiguos starki pyrms ceļa
nivīna nanūness, ni atness
pādejai vardivei vysod ir gryutuoks
pyrms saulis lākta vysvairuok solts
pyrms aizīšonys vysvairuok bais

kovida zīma puorīt kara pavasarī
pīrītiejušim vierbu zorim saulis rītā
sorkonim kai starka kuojis, kai cereiba
pīna boltuma pīdzeitim


***

atīs dīna pavysam dreiži
kod saulis lākta byus gona da jaunai dīnai
kod atliduos vysi aizvastī i aizbraukušī
kod ļaudim iz golda byus na tikai maize, bet ari svece
kod gaisma byus na tikai petrūlejis svebelī
bet ari acīs byus mīrs i patikšona
sadzīduosim dzīsmis par mīlesteibu
par tāvu zemi i muotis volūdu
babu i dzedu mīlesteibu
Dīva apredzeibu i gaismys olūtim
tys byus tymā reitā piec ceremonejis
kod kotram byus pa Boņukam
a tam ūtram nabyus nikuo


***

putyns aizasprīde kūka viersyunē
putiņs putinej, ka nasamat
pamasti pamati munā dzeraunē
boltā i leidzonā saļmu goldautā
auss, dzeivuos i byus nikod nanūtykušuos dzeivis
nikod nanūsautī, nanūvastī, nanūkātavuotī

nu vīna kara da ūtra ir viņ puors riņdeņu
seņ pīmastā, tik nikod tai i nanūaustā audumā
ar akmiņu i ceglu zeimem boltā teirumā

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]