Ar filmu dīnu i koncertu Upītē turpynuos vuokt paleidzeibu Ukrainys ļaudim

Ar filmu dīnu i koncertu Upītē turpynuos vuokt paleidzeibu Ukrainys ļaudim

Rokstu sagataveja: portals lakuga.lv

26. martā Upītis Tautys nomā vysys dīnys garumā ar filmu seansim, koncertu i pīsadaleišonu atkluotajā mieginuojumā var paleidzēt Ukrainai. Īīšonys moksa iz vysu filmu seansim ir 5,00 EUR, iz vīnu filmu – 2,50 EUR. Īvuoktuo nauda tiks pazīduota ziedot.lv i izmontuota paleidzeibai Ukrainys ļaudim.

Upītis Tautys noms jau ilgstūši sasadorboj ar bīdreibu “Kinopunkts”, kas pīduovoj dažaidys jaunuokuos latvīšu filmys i izplota tuos uorpus leluokuom Latvejis piļsātom. Ari itūreiz tyka sajimts pīduovuojums nu “Kinopunkta” – ka ir vareiba demonstrēt latvīšu patriotiskuos filmys i vysus ītierguotūs leidzekļus zīduot Ukrainys atbolstam. Kai soka Andris Slišāns: “Tī nabeja div dūmu i mes iz reizis pīkrytom pīsadaleit.” Koč ari vysys ituos filmys (izjemūt “Valiant! Brauciens uz brīvu Latviju”) ir jau ruodeitys Upītē, Andris cer iz dzeivuotuoju aktivitati i atbolstu. Bez jau pīmynātuos “Valiant! Brauciens uz brīvu Latviju” filmu dīnā Upītē varēs nūsavērt taidus dorbus kai “Mans mīļākais karš”, “Piļsāta pi upis”, “Dvēseļu putenis” i “Melānijas hronika”.

Upītē jau 27. februarī tyka reikuots atbolsta koncerts Ukrainys ļaudim, par tū Andris soka: “Mes saprotom, ka kotrys atbolsts, kotrys eiro, kotra lobuo dūma, kas teik raideita, sasalosa kūpā kosmosā i paleidzēs apturēt ituos šausmys. Aicynuomjom zīduot ziedot.lv, varēja ari iz vītys naudeņu zīduot. Sazīduoja gondreiž 200 EUR, vysu īskaitejam ziedot.lv

Piec filmu vokorā paradzāts ari grupys “Kei-Rei” koncerts. Grupa leidz šam ir dzierdāta saleidzynūši reši, tok pastuov jau nu 2018. goda. Grupys pamatsastuovā ir Kate Slišāne, Domeniks Slišāns, Raina Vasiļjeva i Tuoms Kozlovs. Grupai pīsavīnoj ari vairuoki cyti muzykalī draugi. “Kei-Rei” spieļoj sovys dzīsmis, kurūs vuordu autors ir dzejnīks Ontons Slišāns, muzyku roksta Domeniks Slišāns. Grupa ari izpylda dažaidys latgalīšu grupu dzīšmu kaverversejis.

Koncerta nūsaukumam “Cik ilgi?” ir vairuokys nūzeimis – tai saucās vīna nu grupys dzīšmu, grupa pamozam veidoj sovu pyrmū albumu i vaicoj sev “cik ilgi vēļ?”, sovpus leluo dūma ir vaicuojums par tū, cik ilgi vēļ pasauļs cīss itū nataisneibu, karu, agreseju i terorismu. Dīvamžāļ ir saguojs tai, ka Katis i Domenika vactāvs aba dzeds, kurs reizē beja ari mozbārnu leluokais fans, Jezupa dīnā devēs myužeibā, deļtam itys koncerts teik veļteits ari jam.

26. marta Upītis Tautys noma pasuokuma plans eisumā – vysi verās filmys, pyrma koncerta kotrys ir aicynuots ari īsasaisteit foklorys kūpys “Upīte” atkluotajā mieginuojumā i kūpā muzicēt, doncout voi dzīduot. Piec daņču stuņdis – koncerts, sovpus vāluok – kūpeigs sarunu vokors.

Print Friendly, PDF & Email

Nūtikšonu kalendars

Sep
30
Pīk
11:30 Saruna par Pēteri Martinsonu @ tīšsaistē
Saruna par Pēteri Martinsonu @ tīšsaistē
Sep 30 @ 11:30 – 13:00
Saruna par Pēteri Martinsonu @ tīšsaistē
J. Soikāna Ludzys muokslys škola aicynoj pīsasaceit iz seminaru, kurā Imants Klīdzējs (Mg.art, LMA doktorants, Salacgreivys muokslys školys direktors) stuosteis par muokslinīku, keramiki, arhitektu Pēteri Martinsonu. Pīsasaceit var ITE.