Reigā atkluota J. Pīguožņa bolvys Latvejis ainovu gleznīceibā konkursa izstuode

Reigā atkluota J. Pīguožņa bolvys Latvejis ainovu gleznīceibā konkursa izstuode

Rokstu sagataveja: portals lakuga.lv

Reigys Sv. Pītera bazneicā nu 19. marta leidz 15. majam apsaverama Jāzepa Pīguožņa bolvys Latvejis ainovu gleznīceibā konkursa izstuode.

Jāzepa Pīguožņa bolvys Latvejis ainovu gleznīceibā konkursa izstuode kai īrosts nūteik pavasarī. Jau ostoitū godu Reigys pošvaļdeibys kulturys īstuožu apvīneibys Reigys Sv. Pītera bazneicys puorvaļde, turpynojūt tradiceju, aicynuoja muokslinīkus īsnēgt dorbus ar Latvejis ainovys atainuojumu, tai veicynojūt muokslinīku interesi izceļt Latvejis ainovys gleznīceibys nūzeimi myusu dīnu muokslā.

Muokslys zynuotneica Ingrīda Burāne par itū bolvu soka: “Itei ir nūtikšona ar pīnasumu iz prīšku Latvejis kulturys telpā. Tū var apsavērt na viņ kai vīna muokslinīka atceris pasuokumu, kai Latvejis ainovu gleznīceibys žanra kūpšonu, kai myusu zemis skaistuma atkluosmis i mīlesteibys vairuošonys dorbu, tok, īspiejams, dziļuokuo jāga meklejama muokslinīku leidzdaleibā. Izstuodis raksturs ir demokratisks: tei vīnkūpus puļcej kai augstuokūs vuiceibu īstuožu profesorus, tai studentus; ite sasateik vacmeistari i kautreigi īsuoceji.”

Ituo goda dorbu viertiešonys žureja beja: muokslinīks Osvalds Zvejsalnieks (Jāzepa Pīguožņa bolvys Latvejis ainovu gleznīceibā golvonuos bolvys laureats 2021. godā), profesors Aleksejs Naumovs, muokslineica Laura Pīguozne, Preiļu Viesturis i lītiškuos muokslys muzeja ekspoziceju i izstuožu kuratore Silvija Berezovska, muokslinīki Anda Munkevica i Jānis Strupulis.

Itymā godā konkursam tyka īsnāgti 105 muokslinīku 174 dorbi. Nu tūs žureja atlaseja 83 autoru dorbus.

Osvalds Zvejsalnieks pastreipuoja: “Kai līcynoj izstuode, muokslinīki Latveju radz kotrs pa sovam, paļdis Dīvam. Kūpejais itai izstuodei ir vīns, montuots nu Jāzepa Pīguožņa, ari ite ir jiutama mīlesteiba pret sovu zemeiti.”

Izstuodis atkluošonā tyka paziņuoti ari ituo goda Pīguožņa bolvys konkursa nominanti, tī ir septeni muokslinīki: Aivis Pīzelis, Indulis Landaus, Meldra Bula, Elmārs Orniņš, Maija Bērziņa, Inga Jurova i Silvija Meškone.

Bolvys laureats byus zynoms septembrī, izstuodis atkluošonā Preiļu Viesturis i lītiškuos muokslys muzejā.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]