Rokstu sagataveja: portals lakuga.lv

2022. gada 8., 9. i 10. aprelī jau četrpadsmytū reizi nūtiks pasuokums “Satiec savu meistaru”. Itymā pasuokumā pa vysu Latveju pīsadaleis vaira nakai 115 nūtikšonys vītys i 225 meistari.

Latvejis namaterialuo kulturys montuojuma pasuokuma “Satiec savu meistaru” laikā kotram interesentam byus vareiba tikt pi prīškstota par vysaidom omotu prasmem, tautys tradicejom i tū, kai ituos tradicejis teik puormontuotys i pīlāguotys myusu dīnom. Tradiceju i omotu zynuošonys dūt vareibu na viņ pošam tuos izmontuot, tok ari nūviertēt cytu dorbu, atškiert meistaru dorbu i kvalitati.

Itūgod Latgolu puorstuovēs Augšdaugovys, Bolvu, Kruoslovys, Leivuona i Preiļu nūvodi, kai ari Daugovpiļs piļsāta, taipat i daļa nu Jākubpiļs nūvoda.

Latgolā byus vareiba īpazeit klugu peišonys, kūka amatnīceibys prasmis, greidys celeņu ausšonu stuovūs, ari voska sveču līšonys, puzuru taiseišonys i cytys prasmis. Taipoš byus vareiba īpazeit Latgolys kulinaruo montuojuma tradicejis, raugūt pagataveit putrys piec senejim receptim, gordus bleiņus i asuškys. Ar vysu programu var īsapazeit ITE.

Pasuokumu “Satiec savu meistaru” organizej Latvejis Nacionaluos kulturys centrs sadarbeibā ar pošvaļdeibom vysā Latvejā.

[Show slideshow]